«Երևա՛ն, հենց այս լիալուսնի տակ մենք կունենանք այնպիսի համերգ, որը երբևէ չի եղել»․կայացավ Մոտի երևանյան համերգը և մանրամասներ՝ ինչու է ռեփերը տեղափոխվել հիվանդանոց (լուսանկարներ, տեսանյութեր)

10:02 • 03.07.23

Ժամանց

Լիալուսնի օրը, Full moon fest-ի շրջանակում երեկ կայացավ երևանյան ամենասպասված իրադարձություններից մեկը, երբ հանդիսատեսը լիալուսնի տակ լսեց ռեփեր Մոտին։ Tert.am Life–ը ներկա է եղել միջոցառմանը և ներկայացնում է մանրամասներն ու լուսանկարները։

Համերգի առաջին հատվածում երեկ ելույթ է ունեցել երիտասարդ երգչուհի D Litte–ը՝ կատարելով իր հեղինակային երգերը և քավըրները։ Երգչուհիներ D Litte–ը և Անահիտ Ադամյանը նաև կատարել են իրենց հայտնի «Առանց քեզ» զուգերգը, որից հետո համերգի ընթացքում կայացավ D Litte–ի «Էմոցիա» երգի պրեմիերան, որը շուտով կլինի հասանելի։

Համերգի երկրորդ հատվածում կայացել է ռուսաստանաբնակ երգիչ Սևակ Խանաղյանի ելույթը, որը կատարեց իր հիթային երգերը և նշեց, որ հասցրել է կարոտել հայ հանդիսատեսին։

Ինչպես նշում է The moon production -ի հիմնադիր Լուսինե Աչոյանը նախորդ տարվա փորձից ելնելով՝ այս տարի համերգը կայացել է ավելի մեծ տարածքում։
«Հանդիսատեսի հետաքրքրությունը նախորդ համերգի նկատմամբ ապշեցնող էր, այդ իսկ պատճառով նախորդն ավարտելուց անմիջապես հետո սկսեցինք պատրաստվել 2023–ի համերգին և հունվարին ունեինք Մոտի հետ պայմանավորվածություն, որից հետո կնքվեց պայմանագիրը և իսկապես բարդ էր օր ֆիքսելը, քանի որ մեզ համար խորհրդանշական է, որ այն լիներ լիալուսնի ժամանակ, իսկ Մոտի համերգային գրաֆիկը շատ խիտ էր»,– ասաց Լուսինե Աչոյանը։

Երբ երկնքում պարզ երևում էր լիալուսինը ծափերի ներքո բեմահարթակ եկավ երեկոյի ամենասպասված հյուրը՝ Մոտը, որին ողջ ընթացքում ուղեկցում էր կինը։

«Ինչքան էի ես ձեզ կարոտել, միայն՝ իմանաք։ Ինչքան ժամանակ է մենք չենք տեսել միմյան և դա աններելի սխալ է, բայց այսօր մենք այստեղ ենք և այս հրաշալի երևանյան երկնքի տակ, մենք կանենք այնպիսի համերգ, որը երբևէ չի կայացել։ Պատրաստ եղեք այսօր ծիծաղել, արտասվել երջանկությունից և փշաքաղվել, իսկ մենք կպարենք Երևանում այնպես, ինչպես երբեք չեն պարել, իսկ այլ լիալուսինը կնայի մեզ»,– համերգի բացման ժամանակ նշեց երգիչը։

Համերգի ողջ ընթացքում կուլիսներում նրան քաջալերում էր կինը՝ երգակցելով ամուսնուն, իսկ հանդիսատեսն անմասն չէր մնում հիթային երգերը բարձր երգակցելուց։

Երեկոյի ընթացքում հնչեցին ռեփերի ամենահիթային աշխատանքները, որոնք ունեն միլիոնավոր դիտումներ։

Ռեփերը վերջին երգերից մեկը կատարելու ժամանակ ստացել է վնասվածք՝ տեղափոխվելով հիվանդանոց, իսկ համերգի կազմակերպիչները Tert.am Life–ին հայտնել են մանրամասները։

«Մոտը պարի ընթացքում վնասվածք ստացավ և իջավ բեմից: Նրան տեղափոխեցին հիվանդանոց, պարզվեց, որ հոդախախտ ունի (ժողովրդական լեզվով ասած թեևը դուրս է ընկել): Երգիչն ինքն էլ սթորի է արել և ներողություն խնդրել այդպես անսպասելի բեմից իջնելու համար: Որևէ մեկը չէր կարող ենթադրել, որ ելույթի ժամանակ նման վնասվածք կստանա,- ասաց համերգի կազմակերպիչը։

Ինսատագրամյան իր էջում ռեփերն ու կինը ևս արել են հրապարակումներ՝ տեղեկացնելով, որ այս պահին ամեն բան լավ է և նրանք կրկին հետագայում վերադառնալու են Երևան։