Հայտնի լինելն իմ կյանքում ոչինչ չփոխեց, ընդամենը տեղաշարժս դժվարացավ. Վաչե Երիցյան

Նոր ներկայացումների ու ֆիլմերի, ներկայիս զբաղվածության, «Սյուրպրիզ» նախագծի վերջին եթերաշրջանի, աստղային հիվանդության, երկրում տիրող խառը իրավիճակի ու երազանքների մասին Tert.am Life-ը զրուցել է դերասան Վաչե Երիցյանի հետ: 

Խաղում ենք բնության գրկում

Գոյ թատրոնում աշխատանքը ժամանակավոր կանգնած է, ԿԳՄՍ նախարարության հետ բանակցություններ են ընթանում: Հուսանք շուտով կբացվի թատրոնը ու նորից նույն հունով կգնանք առաջ: Հիմա զբաղված եմ «Ալպիական մանուշակ» ներկայացման մեջ, որի պրեմիերան նոր է տեղի ունեցել, 26-ին կխաղանք ներկայացումը: ֆորմատը բացօթյա է, խաղում ենք Երևանից դուրս՝ բնության գրկում:

Բակունցի «Ալպիական մանուշակ» պատմվածքն է, ես նկարչի կերպարն եմ մարմնավորում: Հետաքրքիրն այն է, որ երկու թիմով ենք խաղում, 1-ին խմբում Սամվել Թոփալյանը, Արծրուն Հարությունյանն ու Անահիտ Կիրակոսյանն են զբաղված, 2-րդ խմբում Նարինե Պետրոսյանը, Սամսոն Ստեփանյանն ու ես: Հանդիսատեսը սիրեց այս ֆորմատը:

«Սյուրպրիզ» նախագիծն ինձ ավելի հայտնի դարձրեց

«Սյուրպրիզ» նախագծի 4-րդ եթերաշրջանում եմ զբաղված, որն արդեն գնում է դեպի հանգուցալուծում: Այս նախագծից հետո լսարանս մեծացավ, սկսեցին ինձ ավելի շատ ճանաչել, այս կոնտեքստում ինձ հաջողություն բերեց: Առաջին բանը, որ ինձ դուր է գալիս այս նախագծում, մարդկանց հետ շփումն է, ռեժիսոր, սցենարիստներ: Մարդիկ շատ լավն են, շփումը՝ հետաքրքիր: Իսկ հայտնի լինելն իմ կյանքում ոչինչ չփոխեց, ընդամենը տեղաշարժս դժվարացավ, բայց ես նույն Վաչեն եմ: Աստղային հիվանդություն կոչվածն էլ չի դիպչեն, համենայնդեպս՝ արձագանքներ չեն եղել:

Ե՛վ գեղարվեստական, և՛ մի քանի մասանոց Ֆիլմերում ունեմ նոր առաջարկներ: Քանի որ ֆիլմի ստեղծողները դեռ չեն խոսում դրա մասին, ես կլռեմ, բայց կասեմ, որ շատ հետաքրքիր առաջարկներ են:

Չեմ մասնակցում քաղաքական շարժումների

Ես կարծում եմ, որ այն մարդը չեմ, ով ինչ որ բան կասի ու դա ինչ որ բան կփոխի մեր երկրում, դրա համար աշխատում եմ չխոսել: Անգամ սթորիների տարբերակով խուսափում եմ հայտարարություններ կամ կոչեր անելուց: Հավատացեք, ես այն մարդկանց առաջնաշարքերում եմ, ովքեր ուզում են, որ երկրի վիճակը լավ լինի ու լինելու է, բայց չեմ մասնակցում քաղաքական շարժումների: Հիմա դժվար գտնվի մարդ, ում չհետաքրքրի քաղաքականություն, որովհետև դա անընդհատ մեր ականջին է: Բայց ես, ինչպես շատերը դրանից բան չեմ հասկանում ու աշխատում եմ չխոսել:

Վստահ եմ, որ ամեն ինչ լավ է լինելու, պետք է ընդամենը ամեն մեկս մեր գործին լավ տիրապետենք ու ազնիվ անենք մեր գործը, դրանից ավելի մեծ հայրենասիրություն չկա:

Ուզում եմ օդաչու դառնալ

Ունեմ նպատակներ, որոնց ուզում եմ հասնել: Երազանքներ չունեմ: Կուզեի դաշնամուր նվագել կարողանայի: Գլխավոր նպատակս հիմա օդաչուի դասերին մասնակցելն է, որը հասանելի նպատակ է, զուտ ֆինանսի խնդիր է:

Հեղինակ՝ Անի Մնացականյան