Էլեն Սաֆարյանը՝ հայտնի երգչի դուստր լինելու բարդության, նեգատիվի մեծ ալիքի, Ռուբենի հետ «սիրավեպի», նոր երգերի ու ֆիլմում՝ նոր առաջարկի մասին (տեսանյութ, լուսանկարներ)

Tert.am Life-ը զրուցել է «Հատուկ դասարան» նախագծից հեռուստադիտողին հայտնի դարձած դերասանուհի, երգչուհի Էլեն Սաֆարյանի հետ: Նա պատմել է իրեն՝ որպես Արսեն Սաֆարյանի դուստր ընդունելու դժվարությունից, իր հասցեին հնչած վատ մեկնաբանություններից ու նեգատիվ վերաբերմունքից, Ռուբեն Եսայանի հետ համագործակցությունից, ու նոր երգերից, ինչպես նաև նոր նախագծում՝ Անաիսի կերպարից:

Նեգատիվի մեծ ալիք եկավ, մինչև անձնական վիրավորանք...

Երբ հայտնվեցի «Հատուկ դասարան» նախագծում, ու հայտնի դարձա, առաջին տհաճ խոսակցությունները սկսվեցին: Բոլորը մտածում էին, որ ինձ ճանապարհ են տալիս որպես Արսեն Սաֆարյանի դուստր, բայց ինձ շատ փոքր դեր էր վստահված սկզբում: Հենց այդ ժամանակ ինձ նկատեց ռեժիսոր Հովհաննես Ղազարյանը, և ասաց, որ ուզում է ինձ համար կերպար գրել: Այդպես ինձ վստահվեց առաջին դերը:

Նեգատիվի մեծ ալիք եկավ, մեկնաբանությունները կարդում, ապշում էի: Բացի քննադատելը  նաև անձնական վիրավորանք էին գրում: Հայրս էլ խորհուրդ տվեց լուրջ չվերաբերվել: Հասկացա, որ ուզում եմ ադեկվատ զանգվածի համար աշխատել և գործով պիտի ապացուցեմ: Եթե ընկնեմ մեկնաբանությունների հետևից, ոչինչ չեմ անի: Հիմա նույնիսկ ծիծաղում ենք այդ ամենի վրա:

Այսօր արդեն մեր 2-րդ՝ « Ցավի» երգի և տեսահոլովակի պրեմիերան է

Ռուբենին անձամբ ճանաչել եմ «Հատուկ դասարան» նախագծի շրջանակներում, մինչ այդ գիտեի նրան որպես վիդեո բլոգեր, բայց անձամբ ծանոթացանք, երբ մեր կերպարները սցենարային առնչվեցին, և մենք ընկերացանք: Ընթացքում, երբ նկարահանվում էին ուրիշ տեսարաններ, որտեղ մենք զբաղված չէինք, Ռուբենը բերում էր իր կիթառը, քավերներ էինք անում, քննարկում էինք, թե ամեն մեկս ինչ ոճի երաժշտություն է սիրում ու լսում: Նախագծից հետո մենք ավելի մտերմացանք, և նա ինձ ցույց տվեց մի քանի երգ, ասաց, որ ինքն է գրել, և ուզում է վերցնել հին երգեր ու մոդեռն տարբերակով ներկայացնել, և դրա համար իրեն պետք է վոկալիստ: Երգերը ցույց տալուց հետո ասաց, որ ես համապատասխանում եմ, և կարող եմ այդ երգերը ճիշտ մատուցել:

Ինձ մոտ մի շրջան էր, որ ես կասկածներ ունեի, ու կարծում էի, որ դեռևս պատրաստ չեմ լինել բենդի վոկալիստ: Այդ ընթացքում գնում էի վոկալի դասերի, ձայնս մշակում էի: Որոշ ժամանակ անց նա կրկին հիշեցրեց առաջարկի մասին, և հասկացա, որ արդեն պատրաստ եմ, և ուզում եմ համագործակցել: Կարծում եմ, դա ճիշտ որոշում էր, և ճիշտ ժամանակին սկսեցինք համագործակցել:

Շատ արագ ձայնագրեցինք մեր առաջին համատեղ երգը՝ «Լսի էս երգը», և նույնքան արագ էլ նկարեցինք տեսահոլովակը, որպեսզի հասցնեինք բենդի պրեմիերան անել Ռուբենի «Վանականներն ունեն գաղտնիք» գրքի շնորհանդեսի ժամանակ:

Շատ հետաքրքիր է նրա հետ համագործակցելը, և՛ փորձերի ընթացքը, և՛ նկարահանումները: Ինձ համար բացահայտում էր, որ Ռուբենը նաև որպես երաժիշտ է այդքան տաղանդավոր: Կարծում եմ, երկուսս էլ իրարից սովորելու բան ունենք:  

Շտապողականությունն իր հերթին ինչ-որ խնդիրներ էր առաջացնում: Շնորհանդեսից 2 օր առաջ մենք գիշերը նորից նկարեցինք տեսահոլովակը: Շատ հապճեպ ստացվեց ամեն ինչ, բայց արձագանքները շատ լավն էին: Միևնույն է՝ ստացվեց մեր պատկերացրածը:

Շնորհակալ եմ Ռուբենին՝ ինձ վստահելու և այս հնարավորությունն ընձեռելու համար: Ինձ համար շատ կարևոր է այս համագործակցությունը: Իհարկե, զուգահեռ պլանավորում եմ նաև սոլո կարիերա սկսել, վստահ եմ, մեկը մյուսին չի խանգարի:

Այսօր արդեն մեր 2-րդ՝ « Ցավի» երգի և տեսահոլովակի պրեմիերան է կայացել, աշխատում ենք նաև 3-րդ երգի վրա, շատ հետաքրքիր գործեր են սպասվում:

Իհարկե, ինչպես բոլոր համագործակցություններից հետո, մեր դեպքում ևս սկսեցին սիրավեպի վերածել մեր հարաբերությունները: Հաճախ քննարկում են, հարցեր են տալիս և՛ ինձ, և՛ Ռուբենին: Ես փորձում եմ նորմալ ու ադեկվատ արձագանքել: Ես ու Ռուբենը շատ լավ ընկերներ ենք, ու գործընկերներ, կարծում եմ, մարդկանց ավելի շատ պիտի հետաքրքրի մեր համատեղ աշխատանքը:

Ուրախ եմ, որ մարմնավորում եմ Անաիսին

Ունեմ ֆիլմում նկարահանվելու նոր առաջարկ, որի մասին ուզում եմ անպայման պատմել: Նախագիծը 24 մասից բաղկացած մելոդրամա է: Այն զուգահեռներ ունի հայտնի ու սիրված «1+1» և «Me Before you» ֆիլմերի հետ, բայց սյուժեն տարբերվող է: Նկարահանում է «Menq» հոլդինգը, նկարահանումներն այնքան արագ սկսվեցին, որ ֆիլմի անվանումը դեռ քննարկման փուլում է: Տարբերակներից մեկն է՝ «Եթե ես կրկին պարեմ», բայց դեռ վերջնական չէ: Ես մարմնավորում եմ Անաիսի կերպարը, շատ պայծառ էներգիայով ու պոզիտիվ աղջիկ է, ով կյանքը շատ է սիրում և վառ գույներով է տեսնում այն: Հոր բուժման համար գումար է հարկավոր, նա շտապ աշխատանք է փնտրում բարձր աշխատավարձով: Ընկերուհու օգնությամբ գտնում է խնամակալի աշխատանք, հանդիպում է Արմենին, ում պետք է խնամի: Այստեղից էլ զարգանում է գործողությունը:

Խաղընկերս բելետի արտիստ Րաֆֆի Գալստյանն է, ով շատ տաղանդավոր է: 2 օր է, ինչ սկսել ենք աշխատել, բայց արդեն հեշտ լեզու ենք գտել, և նրա հետ աշխատելը շատ հետաքրքիր է: Կադրից դուրս էլ շատ դրական ու թեթև մթնոլորտ է: Ռեժիսորը Հայկ Վարդանյանն է, պրոդյուսերը՝ Սերգեյ Հայրապետյանը: Նրանց հետ աշխատելը նույնպես շատ հետաքրքիր է, քանի որ մանրակրկիտ են աշխատում կերպարի վրա, և օգնում են ինձ մաքսիմալ ճիշտ հասկանալ կերպարը: Պրոցեսը շատ հետաքրքիր է, և ուրախ եմ, որ այս նախագծում մարմնավորում եմ Անաիսին:

Հեղինակ՝ Անի Մնացականյան