«Ինքն է որոշում, որ ժամին գնամ աշխատանքի, որ ժամին գամ տուն». Քեթրին Մանասյանը՝ որդու հետ վեճերի, անձնականի ու նոր առաջարկների մասին

Կիսատ մնացած գործերի ու նոր առաջարկների, որդու հետ վեճերի ու անձնականում նոր հարաբերությունների մասին Tert.am Life-ը զրուցել է Կամերային թատրոնի դերասանուհի Քեթրին Մանասյանի հետ:

Տարին չկատարվածի մասին էր

Օգոստոսից թատրոնը գնալու է արձակուրդ, այս թատերաշրջանը փակվում է, սեպտեմբերին նորից կսկսենք: Անկեղծ պիտի ասեմ, որ այս տարին ինձ համար ավելի շատ չկատարվածի մասին էր, քան կատարվածի, որովհետև բազում առաջարկներ ու ռեալ նախագծեր են եղել, որոնց շուրջ աշխատանք է արվել ու անհասկանալի պատճառներով չեն իրականացել: Թե՛ սիթքոմ պիտի լիներ, թե՛ ներկայացում էր մեկ տարի պատրաստվում: Ստեղծագործող մարդու համար շատ դաժան է, երբ աշխատում ես և վերջնարդյունք չկա:

Բարի երեխայից վերածվել է պահանջկոտ տղամարդու

Տղայիս կյանքում իր հայրը մասնակցություն ունի, իրար տեսնում են, բալիկս իր դասերով, տարբեր պարապմունքներով, երեխայական առօրյայով է զբաղված: Սեպտեմբերին կդառնա 10 տարեկան, փոխադրվում է 5-րդ դասարան:

Հիմա ամեն ինչ շատ արագ է կատարվում, դու նույնիսկ չես հասցնում կյանքի նոր տենդենցը յուրացնել ու հաջորդին դիմավորել: Բոլորս դա զգում ենք մեզ վրա, նույնն էլ երեխաների հարցում: Հասունացումը հիմա ավելի շուտ է լինում, ամեն ինչ համացանցից սովորում են, հիմա ինքը կարծես ամուսնանալու տարիքում լինի: Շատ կտրուկ է ամեն ինչ, բարի երեխայից վերածվել է պահանջկոտ տղամարդու, կարծես իմ կյանքում ինքն է որոշելու ինչ-որ բաներ՝ աշխատանքի երբ գնամ, երբ գամ: Այդ տեսակ վեճերն արդեն սկսվել են:

Ես աննորմալ չեմ, որ բացառեմ նոր հարաբերությունները

Հավատացեք, մարդիկ մեր բոլորից լավ գիտեն մեր անձնականը: Ես ունեմ կոլեգաներ, որոնց հետ մտերիմ եմ, անկեղծ, երբեք չենք փորփրում իրար անձնական: Դրսում մարդիկ հաճախ են կանգնեցնում, զրուցում, ու զրույցը հանկարծ արագ փոխվում է ուրիշ հայտնի մարդկանց մասին անձնական տվյալներ հարցնելով: Օրինակ՝ «դուք գիտե՞ք, որ «այսինչը» բաժանվել է»: Իրենք ինձանից շատ գիտեն, ես հիմա ինչ-որ արտառոց բան չեմ ասի: Ոչ մի նորություն չկա, ոչ էլ իմ մտահորիզոնում կա: Ես իմ գործի և երեխայի հետ եմ: Ես ոչ ուզում եմ, ոչ մերժում եմ: Ուղղակի չկա անձնականում ոչինչ, երևի ենթագիտակցական այդ կողպեքը դրվում է և էդպես էլ մարդը շարունակում է: Իսկ, որ երբևէ կունենամ նոր հարաբերություններ չեմ բացառում, այս աշխարհում ոչինչ չեմ բացառում: Աննորմալ կլինի ասել, որ բացառում եմ նոր հարաբերությունները: Իսկ ես նորմալ, առողջ մարդ եմ:

Թամադա աշխատելու բազում առաջրկներ եմ մերժում

Ես նաև հայտնի գրողների ստեղծագործություններն եմ ներկայացնում, չեմ ասմունքում, այլ՝ որպես արտիստ մոնոլոգի ձևով կարդում եմ: Վերջերս Գյումրիում էի, որտեղ կայացավ ամերիկաբնակ բանաստեղծուհի Սոնա Վանի հետ հանդիպում, ում ստեղծագործություննները 15 տարի ներկայցնում եմ և՛ Հայաստանում, և՛ ԱՄՆ-ում: Ցավում եմ, որ այս տեսակ գործերը երբեք չեն լուսաբանվում:

Իմ ընկերներից շատերն են թամադա աշխատում, ես ինքս կուզեի հաղթահարել և ընդունել բազմաթիվ առաջարկները:

Ներկայումս հետաքրքիր ստեղծագործության վրա եմ աշխատում, որն առաջիկայում կներկայացնեմ հանդիսատեսին: Շատ պրեմիերաներ են սպասվում Կամերային թատրոնում, հուսամ ես էլ ներգրավված կլինեմ այդ ներկայացումներում:

Հեղինակ՝ Անի Մնացականյան