«Առանց փոխադարձ անկեղծության, ինչքան էլ քարը քարին դնես` մի օր փուլ կգա». Իննա Խոջամիրյանը՝ սիրո, 29-ամյակի և երազանքի նախագծի մասին

Tert.am Life-ի զրուցակիցը դերասանուհի Իննա Խոջամիրյանն է, ով, մեր ընթերցողին է վստահել օրերս 29-ամյակը յուրահատուկ նշելու, ներկա փուլում իր զբաղվածության ու սիրո մեջ առողջ հարաբերությունների մասին մանրամասները: 

-Պատմեք ներկայումս Ձեր զբաղվածության մասին, ի՞նչ նոր նախագծեր են սպասվում:

- Վերջին 7 տարիների ընթացքում՝ այս ամռանը, ես ինձ վերջապես կարողացա թույլ տալ երբևէ իմ ունեցած ամենաերկար հանգիստը, և իմ սրտով ճամփորդել: Աշունն ինձ մոտ բուռն աշխատանքային է սկսվել, մի շարք նոր նախագծեր են սպասվում:
Հոկտեմբերի 23-ին պրեմիերա ունենք` «Երկնագույն շան աչքերը», խաղացանկում է նաև «Հարսանեկան պինգ պոնգ»-ը: Զուգահեռ տևական ժամանակ է, ինչ աշխատում եմ նոր նախագծի վրա, որի փակագծերը դեռևս չեմ ուզում բացել:

-Ձեր 29-ամյակը յուրահատուկ նշելու մասին պատմեք...

- 2020-ից հետո այնպես ստացվեց, որ իմ ոչ մի ծնունդ որպես այդպիսին չեմ նշել. պատճառները հասկանալի են:
Այս անգամ, չնայած ընկերներիս պնդումներին, որ վերջապես հավաքույթ կազմակերպեմ ու մի լավ նշենք` ես այնուամենայնիվ որոշեցի նորից ալտերնատիվ կերպ դիմավորել ծնունդս:
29-ը դիմավորել եմ Կիպրոսում. հրաշալի բնություն, հրաշալի լուսաբաց ու մայրամուտներ, լռություն, Միջերկրական ծով:

-Ի՞նչ է պակասում Ձեզ 29 տարեկանում երջանիկ կին լինելու համար:

-29-ում, 30-ում, 35-ում ... ինչ կապ ունի. այդ տեսանկյունից, որ նայենք, մարդուն միշտ մի բան պակասում է կատարյալ երջանիկ լինելու համար:
Հատկապես ինձ: Ես մելանխոլիկ տեսակ եմ...
Բայց երջանկությունն իրականում այն է, որ 29 տարի է արդեն ապրում եմ իմ լավագույն կյանքը, և փառք Աստծո, ապրում եմ այն բացարձակ առողջ ու անհոգ:
Իհարկե, առջևում նորանոր նշաձողեր ու երջանիկ պահեր սահմանելով:

-Ի՞նչն եք համարում առաջնային՝ սիրո մեջ առողջ հարաբերություններ ունենալու համար:

-Բացարձակ անկեղծությունը, բառի ամենալայն իմաստով: Առանց փոխադարձ անկեղծության ինչքան էլ քարը քարին դնես` մի օր փուլ կգա:
Եվ պատասխանատվությունն է ինձ համար շատ կարևոր:
Չէ՞ որ մենք պատասխանատու ենք նրանց համար, ում ընտելացրել ենք:

-Սիրում եք հաճոյախոսություններ լսե՞լ, թե՞ նվերներ ստանալ:

-Տարիքային է: Հաճոյախոսությունների սիրահար եմ եղել միշտ:
Հիմա ինքնաբավ եմ: Նվերներ եմ սիրում, ավելի շուտ` անակնկալներ:
Նյութականն ընդ որում կապ չունի, կանխամտածված ու ստացված անակնկալ նվերներ, որոնցից կարող եմ անսահման երջանկանալ:  

-Որոշիչ պահերից մեկը Ձեր կյանքում, որը փոխեց տեսլականը կամ նպատակները:

-Իմ կյանքում այնքան որոշիչ պահեր են եղել. բայց եթե այդ ժամանակավոր քամիները պիտի փոխեն իմ ալիքի ուղղությունը, ապա կստացվի ես նպատակներ ու տեսլական չունեմ: Դեռևս հաստատուն եմ իմ ունեցած տեսլականի մեջ: 

-Ո՞րն է Ձեր երազանքի նախագիծը:

- Ամեն նախագիծ մի երազանք է, որը պետք է ի կատար ածել պատվով: Չեմ կարող կանգ առնել: Երազանքներս դառնում են իրականություն, փոխարենը նոր երազանքներ են ծնվում: Վերջը դեռ չի երևում:

-Ձեզ համար ո՞րն է դերասանի ամենամեծ հաջողությունը, և ինչի՞ վրա եք առավելագույն ուշադրություն դարձնում Ձեր կարիերայում:

- Ամենամեծ հաջողությունը հանդիսատեսի բուռն արձագանքն է քո տաժանակիր ու նպատակասլաց աշխատանքի դիմաց, որպես կատարվածի հավուր պատշաճի գնահատական: Իսկ ուշադրությունս միշտ կենտրոնացած է ինքնակրթվելու վրա. անդադար, անսպառ, անկուշտ:
Ես այն բարձրաձայն չեմ անում, բայց այն, ինչ գիտեմ ու սովորում եմ` միշտ քիչ է ինձ համար:

-Կա՞ դեր, որը երբեք չեք մոռանա և ինչու՞ հենց դա:
- Պարադոքս է, թե նորմա ` չգիտեմ, բայց ես երբեք չեմ մոռանում իմ մարմնավորած և ոչ մի կերպար: Վերջինը, թարմը բնականաբար Սահմին է: Սահմին եկավ իմ կյանք ու խորը հետքեր թողեց (լավ իմաստով:

-Ինչպե՞ս եք արձակվում ծանր աշխատանքից հետո:

- Շա՜տ երկար ժամանակ չեմ իմացել ինչ բան է աշխատանք - հանգիստ բալանսը: Հիմա կարծես բռնել եմ երջանկության զարկերակը. ինձ ինտենսիվ աշխատանքից հետո ճամփորդելն է փրկում.
Նոր երկիրը, նոր մշակույթը, նոր խոհանոցը, նոր մարդիկ և ժպիտները ստիպում են ինձ արագ վերալիցքավորվել:Հեղինակ՝ Անի Մնացականյան