Ինչպես չի կարելի կերակրել երեխային. 4 ամենատարածված սխալները

Հաճախ տատիկների ու մայրիկների գլխավոր ցանկությունը երեխային ամեն գնով կերակրելն է լինում։ Սակայն երբեմն նրանք դա փորձում են անել նույնիսկ այն ժամանակ, երբ երեխան բացարձակապես սոված չի լինում, ուստի ծնողները ստիպված են լինում դիմել տարբեր խորամանկությունների։

Եթե երեխան առողջ է, կենսուրախ և չունի քաշի խնդիր, ապա այս հոդվածը կարող է շատ օգտակար լինել։ Ձեր ուշադրությանն ենք ներկայացնում երեխային կերակրելու 4 ամենատարծված սխալները, որոնք կարող են լուրջ հետևանքներ ունենալ։

Ինչպես կերակրել երեխային

Կերակրել ցանկացած գնով

Մեկ տարեկանից բարձր երեխաների համար սնունդը երբեք առաջին տեղում չէ։ Այս տարիքի երեխաները ձգտում են ճանաչել աշխարհը, այլ ոչ թե հագեցնել քաղցը։ Բացի այդ, այս ընթացքում երեխաները սննդի հարցում ավելի կամակոր են դառնում, ուստի ծնողները փորձում են «խաբել» փոքրիկին։ Նրանք նրան տարբեր խաղալիքներ, գաջեթներ են տալիս ուտելու ընթացքում, հեքիաթներ են պատմում, ներկայացումներ են ցույց տալիս կամ նույնիսկ ափսեով ու գդալով վազում են երեխայի ետևից՝ փորձելով ամեն կերպ կերակրել նրան։

Այս դեպքում, չնայած, որ երեխան կերակրված է, միևնույն է խախտվում է սնվելու մշակույթն ու տուժում է առողջությունը։ Եթե երեխայի ուշադրությունն անընդհատ շեղվի, ապա նրա օրգանիզմը չի կենտրոնանա սննդի վրա։ Երեխան ամբողջությամբ չի ընկալի սննդի համը, ինչը կդժվարացնի մարսողությունն ու յուրացումը։ Նման կերպ սնվելու դեպքում հետագայում կարող են առաջանալ մարսողական համակարգի հետ կապված տարբեր խնդիրներ։

Ճիշտ մարսողության համար անհրաժեշտ է լավ ախորժակ։ Այդ դեպքում օրգանիզմը պատրաստ կլինի սննդի ընդունմանը։ Եթե երախան առողջ է ու ակտիվ, սակայն չի ցանկանում ուտել, նշանակում է նա դեռ քաղցած չէ և երբ նրա օրգանիզմը սննդի կարիք ունենա, նա ինքն այդ մասին կասի։ Սակայն եթե երեխան հիվանդ տեսք ունի և հրաժարվում է սննդից, ապա անհրաժեշտ է դիմել բժշկի, այլ ոչ թե ստիպողաբար կերակրել նրան։

Կերակրել մինչև վերջին փշուրը

Հաճախ ծնողները ստիպում են, որպեսզի երեխան ուտի ափսեի մեջ եղած ամբողջ սնունդը, ինչն էլ ավելի է փչացնում փոքրիկի ախորժակը։ Սա կարող է հանգեցնել նրան, որ օրգանիզմը չի ընդունի սնունդը, իսկ երեխան կդադարի հասկանալ իր իսկ օրգանիզմի անհրաժեշտությունները։

Բացի այդ, երեխան կարող է սկսել շատ ուտել, ոչ թե քաղցած լինելու պատճառով, այլ զուտ հաճույքի համար։ Եթե երեխան միշտ ափսեի մեջ սնունդ է թողնում, ապա հարկավոր է նվազեցնել դրա քանակը, իսկ հետագայում, գտնելով «ոսկե միջինը», քիչ-քիչ մեծացնել չափաբաժինը։

Տարատեսակ ուտեստներ

Հաճախ երեխան չի ցանկանում ուտել որևէ ուտեստ, իսկ դրա փոխարեն պահանջում է որևէ այլ բան։ Այս դեպքում մայրիկները սկսում են առաջարկել ուտեստների տեսականի ընտրության համար, ինչն էլ ավելի է «երես տալիս» երեխային։ Հարկ է հիշել, որ եթե երեխան չի ցանկանում ուտել այն, ինչը տալիս են, ապա նա բավականաչափ քաղցած չէ։ Անհրաժեշտ է պարզապես սպասել, և փոքրիկն ինքը կցանկանա ուտել դա։

Սնվելու մշակույթ

Հաճախ ծնողները տանն ուշադրություն չեն դարձնում երեխայի պահվածքին և չեն սովորեցնում նրան սնվելու մշակույթը, սակայն երբ միասին հյուրնընկալում են որևէ մեկին, բարկանում են ու պատժում երեխային այն պահվածքի համար, ինչը տանը համարվում է բնականոն։

Այս դեպքում երեխան չի հասկանում, թե ինչ կարելի է անել և ինչ չի կարելի, ուստի որպեսզի երեխան իրեն միշտ պատշաճ պահի, անհրաժեշտ է, առաջին հերթին, ճիշտ օրինակ ծառայել նրա համար։

Նյութի աղբյուրը՝