5 ամենատարածված «միֆերը» մանկական տակդիրների մասին

17:56 • 20.10.16

Բժշկական գիտությունների թեկնածու, բժիշկ-մանկաբույժ Վլադիմիր Ստուդենիկին ներկայացրել է ծնողների շրջանում տարածված 5 ամենահայտնի «միֆերը» միանգամյա օգտագործման մանկական տակդիրների մասին:

Միֆ 1. Երեխան հետագայում չի կարողանա օգտվել մանկական գիշերանոթից

Երեխային գիշերանոթից օգտվել սովորեցնելը գրեթե միշտ շատ բարդ է՝ անկախ տակդիրների օգտագործումից:

Մեկանգամյա տակդիրները կարող են խանգարել միայն այն դեպքում, եթե ծնողը շարունակում է դրանք օգտագործել նույնիսկ երեխայի 2 տարին լրանալուց հետո: Առհասարակ երեխայի 18-24 ամիսը լրանալուն պես խորհուրդ է տրվում աստիճանաբար հրաժարվել տակդիրների գործածությունից:

Միֆ 2. Ջերմոցային էֆեկտ

Ջերմոցային էֆեկտը մարմնի ջերմաստիճանի և տակդիրի տակ եղած հատվածների վրա խոնավության մակարդակի բարձրացումն է: Վերջերս այս մասին գրվել է նույնիսկ ծնողների համար նախատեսված հատուկ ամսագրում:

Վերջին ժամանակներում անցկացրած ուսումնասիրությունները ցույց են տվել, որ միանգամյա օգտագործման տակդիրների մեջ ջերմաստիճանը չի գերազանցում բնական կտորներից պատրաստված բազմակի օգտագործման տակդիրներում եղած ջերմաստիճանը:

Ժամանակին տակդիրը փոխելու և ճիշտ խնամելու դեպքում կարելի է խուսափել ջերմոցային էֆեկտից:

Միֆ 3. Տակդիրները կարող են դառնալ իմպոտենցիայի կամ անպտղության պատճառ

Նման պնդումների համար բացարձակապես ոչ մի հիմք չկա: Եթե միանգամյա օգտագործման տակդիրները սկսել են արտադրվել 90-ական թվականների սկզբին, ապա ե՞րբ է հասցրել մեծանալ վերարտադրողական գործառույթի խանգարում ունեցող սերունդը:

Վերջին 20 տարվա ընթացքում կուտակված փորձը նույնպես անհանգտանալու տեղիք չի տալիս:Շատ ավելի լուրջ անհանգստանալու առիթ պետք է հանդիսանան չափազանց նեղ ներքնաշորերն ու հագուստը, որոնք իսկապես կարող են առաջացնել իմպոտենցիա և անպտղություն:

Միֆ 4. Երեխայի ոտքերը ծուռ կլինեն

1-2 տարեկան երեխաների ստորին վերջույթների ծռվածությունն ավելի շուտ կարող է լինել որևէ հիվանդության (առաջին հերթին՝ ռախիտ) կամ այդքան տարածված մանկական քայլակների օգտագործման հետևանքով: Բացի այդ, երեխայի ոտքերը կարող են ծռվել նույնիսկ երբեք տակդիր չօգտագործելու դեպքում:

Ավելին՝ միանգամյա օգտագործման տակդիրները սովորաբար ապահովում են ներածինների կոնքա-ազդրային հոդերի այն դիրքը, որը նման է այսպես կոչված «ազատ» բարուրման ապահոված դիրքին, որն այդքան գովում են մանկաբույժները:

Միֆ 5. Աղջիկների մոտ կարող է առաջանալ ցիստիտ

Փոքրիկ երեխաների մոտ ցիստիտը (միզապարկի բորբոքային հիվանդություն) սովորաբար զարգանում է սխալ խնամքի, այդ թվում նաև տակդիրները ժամանակին չփոխելու, հետևանքով: Սա ոչ մի կապ չունի այն բանի հետ, որ հաճախ հիվանդության բուժման ընթացքում տակդիրներ չեն օգտագործվում, քանի որ այդ կերպ ավելի հեշտ է հետևել երեխայի միզելու հաճախականությանն ու մեզի ծավալին, իսկ խոնավ կտորը երկար ժամանակ չի դեպչում երեխայի սեռական օրգաններին:

Եթե այս «միֆերից» գոնե մեկն անգամ մասամբ համապատասխաներ իրականությանը, ապա այդ «վնասակար» տակդիրներն անմիջապես կոչնչացվեին, սակայն, բարեբախտաբար, դրանք միայն «միֆ» են:

Նյութի աղբյուրը՝ podelkidetkam.ru