5 «միֆ» ջուր խմելու մասին. ինչպես ճիշտ խմել ջուրը

Ջուրն անչափ կարևոր է մարդկային օրգանիզմի համար: Ավելին՝ այն կենսական նշանակություն ունեցող տարր է, որի պակասը կարող է լուրջ խնդիրներ առաջացնել: Սակայն ոչ պակաս վտանգավոր կարող է լինել նաև ջրի չարաշահումը:

Թվում է, թե ջուր խմելու մեջ ոչ մի բարդ բան չկա, սակայն գոյություն ունեն բազմաթիվ «միֆեր»՝ ջուրը ճիշտ խմելու մասին: Ձեր ուշադրությանն ենք ներկայացնում դրանցից մի քանիսը:

«Միֆ» առաջին. օրվա ընթացքում հարկավոր է խմել երկու լիտր ջուր

Համարվում է, որ օրվա ընթացքում մարդը պետք է օգտագործի 1 լիտր ջուր մարմնի զանգվածի յուրաքանչյուր 30 կգ-ի դիմաց, ուստի 2 լիտր ջուր պետք է խմեն միայն նրանք, ովքեր կշռում են 60 կգ, իսկ մյուսների դեպքում այդ թիվն այլ կլինի: Սակայն, հետևելով այս բանաձևին, անորեքսիայից տառապող մարդու օրգանիզմը կարող է ջրազրկվել, իսկ ճարպակալումից տառապող մարդը կմահանա ջրային ինտոքսիկացիայից:

Այս դեպքում կարելի է օգտվել ԱՄՆ Գիտությունների ազգային ակադեմիայի գիտնականների առաջարկած բանաձևից, որը ենթադրում է, որ օրվա ընթացքում օգտագործած յուրաքանչյուր մեկ կիլոկալորիայի դիմաց հարկավոր է խմել 1 մլ ջուր: Ներկայում մարդիկ օրական օգտագործում են 2000-2500 կկալ, ինչը նշանակում է, որ հարկավոր է խմել մոտ 2 լիտր ջուր, սակայն անհրաժեշտ է հաշվի առնել, որ այդ երկու լիտրը ներառում է նաև սննդից ստացված հեղուկը:

Այս ամենից կարելի է հետևություն անել, որ ընդունած հեղուկի քանակությունը հաշվելու փոխարեն հարկավոր է պարզապես ավելի ուշադիր լինել օրգանիզմի տված ազդանշանների հանդեպ և ջուր խմել ծարավի զգացում ունենալու դեպքում:

«Միֆ» երկրորդ. դիետաների ժամանակ հարկավոր է նվազեցնել ոչ միայն սննդի քանակությունը, այլև ջրի, այլապես դիետան անարդյունավետ կլինի

Ջուրն ավելորդ քաշի դեմ պայքարելու լավագույն միջոցներից մեկն է, քանի որ այն օգնում է մաքրել օրգանիզմը սպիտակուցների, ճարպերի ու ածխաջրերի քայքայումից մնացած մնացորդներից:

Շատերը դիետաների ժամանակ նվազեցնում են օգտագործվող ջրի քանակությունը, քանի որ կարծում են, որ հակառակ դեպքում կառաջանան այտուցներ, իսկ ավելորդ կիլոգրամները չեն պակասի: Սակայն հարկ է հիշել, որ այտուցները պայմանավորված են լինում ոչ միայն խմած հեղուկով, այլև աղի ու կծու սննդամթերքով, որոնք թույլ չեն տալիս, որ այդ հեղուկը դուրս գա օրգանիզմից:

Սննդակարգում կծու և աղի սննդամթերքը սահմանափակելու դեպքում արդյունքը շատ արագ ակնհայտ կլինի: Սակայն երիկամների կամ միզապարկի խնդիրներ ունեցող մարդիկ պետք է շատ զգույշ լինեն դիետաներին հետևելիս և առհասարակ առաջնորդվեն միայն բժշկի ցուցումներով:

«Միֆ» երրորդ. ուտելիս չի կարելի ջուր խմել, քանի որ այն նոսրացնում է ստամոքսահյութը և առաջանում են մարսողական խնդիրներ

Այս տեսությունը միայն վերջերս է տարածվել, սակայն ոչ մի լուրջ հիմնավորում չունի: Իրականում ուտելու ընթացքում խմած ջրի շնորհիվ մարդն ավելի երկար է ծամում սնունդը, այն փափկում է և ավելի հեշտ է մարսվում: Բացի այդ, ջուրն օգնում է քիչ սնունդ օգտագործել:

Հարկ է հիշել, որ ստամոքսահյութին խառնված ջուրը չի նվազեցնում դրա քանակությունը, ուստի այս հարցում այն մեծ դեր չի խաղում: Բացի այդ, ջուրը շատ արագ դուրս է գալիս ստամոքսից, ինչը նշանակում է, որ անահանգստանալու կարիք չկա:

Սակայն ուտելու ընթացքում շատ սառը ջուր խմել խորհուրդ չի տրվում, քանի որ գիտնականները վաղուց ապացուցել են, որ, օրինակ, շիլայից անմիջապես հետո շատ սառը ըմպելիք խմելու դեպքում այն ստամոքսում կմնա 4-5 ժամի փոխարեն 20 րոպե: Սա նշանակում է, որ քաղցի զգացումը շատ շուտով կվերադառնա, կբարձրանա ճարպակալման հավանականությունը, իսկ «արագացված» մարսողությունն օրգանիզմին ոչ մի օգուտ չի տա:

Ջուր կարելի է խմել և՛ ուտելուց մեկ ժամ առաջ, և՛ ուտելու ընթացքում, սակայն ուտելուց հետո մեկ ժամվա ընթացքում խորհուրդ չի տրվում հեղուկ օգտագործել, քանի որ այդ դեպքում ստամոքսը կարող է ձգվել ու լայնանալ, ինչի հետևանքով հաջորդ անգամ քաղցը հագեցնելու համար ավելի շատ սննդի կարիք կլինի:

«Միֆ» չորրորդ. առավոտյան դատարկ ստամոքսին հարկավոր է մի բաժակ ջուր խմել, իսկ քնելուց առաջ ջուր խմել չի կարելի

Առավոտյան ջուր խմելն իսկապես օգտակար է, քանի որ այն օգնում է արթնանալ, ակտիվացնում է նյարդային համակարգը և բարելավում ինքնազգացողությունը:  Էլ ավելի օգտակար է մի շերտ կիտրոնով ջուրը: Ցանկալի է կիտրոնը ջրի մեջ դնել երեկոյան. այդ դեպքում առավոտյան կարելի է խմել հիանալի վիտամինային թուրմ:

Սակայն երեկոյան ջուր խմելու արգելքը շատ վիճելի հարց է: Համարվում է, որ այդ դեպքում առավոտյան դեմքը կարող է այտուցվել, սակայն առողջ երիկամների և դրանց անխափան աշխատանքի դեպքում նման խնդրի առաջացումը քիչ հավանական է:

Առհասարակ մասնագետները նշում են, որ հեղուկը հարկավոր է ընդունել փոքր չափաբաժիններով և հավասարապես բաշխելով օրվա ընթացքում: Օրիանակ՝ առավոտյան դատարկ ստամոքսին կարելի է կիտրոնով հյութ խմել, իսկ նախաճաշից առաջ՝ մի բաժակ բուսական թուրմ կամ եփուկ: Բացի այդ, հարկավոր է անպայման որևէ բան խմել ճաշից առաջ և երկու բաժակ բուսական թեյ, հյութ կամ ջուր օրվա առաջին ու երկրորդ կեսերին:

Տարվա շոգ եղանակին, երբ օրգանիզմն ավելի շատ հեղուկ է կորցնում և ծարավի զգացումն ուժեղանում է, հարկավոր է ավելի շատ հեղուկ օգտագործել: Այս դեպքում մի բաժակ ջուրն անհրաժեշտ է խմել ոչ թե անմիջապես, այլ աստիճանաբար (կարճ ընդմիջումներ անելով 1-2 կում ջուր խմել):

«Միֆ» հինգերորդ. սպորտով զբաղվելիս ջուր խմելը վնասակար է, քանի որ մեծանում է օրգանիզմի վրա գործադրվող ծանրաբեռնվածությունը և դանդաղում է ավելորդ կիլոգրամներից ազատվելու գործընթացը

Բոլորն էլ գիտեն, որ մարզումների ընթացքում քրտնելու և որոշ ժամանալ ոչինչ չխմելու դեպքում մարմնի զանգվածը մի փոքր կնվազի, սակայն ջուր խմելուց հետո այն կրկին կվերականգնվի: Բանն այն է, որ բջիջները, այդ թվում նաև ճարպային բջիջները, մասամբ բաղկացած են ջրից, իսկ մարզումների ժամանակ դրանք կորցնում են այդ ջուրը և մարդկանց թվում է, թե իրենք նիհարել են: Սակայն այդ դեպքում ճարպային բջիջների քանակը չի նվազում և որոշ ժամանակ անց դրանք վերականգնում են նաև կորցրած հեղուկի քանակությունը: Սա նշանակում է, որ մարզվելիս օրգանիզմը ջրազրկելով մարդն արդյունքի չի հասնի: Ճարպից ազատվելու համար հարկավոր է վերանայել սննդակարգը և փոխել վարժությունները, սակայն ոչ մի դեպքում չի կարելի զրկել օրգանիզմը ջրից:

Բացի այդ, ջուրը ոչ մի կերպ չի ավելացնում ծանրաբեռնվածությունը: Մարզումների ժամանակ մարմնի ջերմնաստիճանը բարձրանում է, իսկ քրտնարտադրությունն առատանում, ինչի արդյունքում նվազում է շրջանառվող արյան քանակությունը և այն թանձրանում է: Այս դեպքում բարձրանում է թրոմբոէմբոլիայի առաջացման ու զարկերակային ճնշման անկման հավանականությունը, իսկ ջրի գործածությունը կօգնի խուսափել նման տհաճ հետևանքներից:

Ինտենսիվ մարզումների ժամանակ բժիշկները խորհուրդ են տալիս պարապմունքից 1.5-2 ժամ առաջ խմել մի բաժակ ջուր, այնուհետև ևս կես բաժակ ջուր խմել մարզումից 10-15 րոպե առաջ: Պարապմունքի ժամանակ հարկավոր է յուրաքանչյուր 15 րոպեն մեկ խմել 100-150 մլ ջուր, սակայն ջուրը պետք չէ ստիպողաբար խմել, ուստի ցանկության բացակայության դեպքում կարելի է չխմել: Մարզումից հետո յուրաքանչյուր 15 րոպեն մեկ անհրաժեշտ է խմել 150-200 մլ ջուր, մինչև օրգանիզմի կորցրած հեղուկի մակարդակն ամբողջությամբ վերականգնվի:

Նյութի աղբյուրը՝ medportal.ru