Պարզ ու արդյունավետ բնական միջոցներ՝ տեսողությունը վերականգնելու համար

Ներկայում մարդկանց անառողջ կենսակերպը, ինչպես նաև համակարգիչների, բջջային հեռախոսների և այլ գաջեթների գործածությունը խիստ բացասաբար է ազդում աչքերի վրա՝ հանգեցնելով տեսողության աստիճանաբար վատացման: Ցավոք՝ շատ քչերն են ուշադրություն դարձնում այս խնդրին, մինչդեռ խնդրի հետագա խորացումից կարելի է խուսափել՝ պարզապես ժամանակին միջոցներ ձեռնարկելով:

Մասնագետները հաճախ նշում են, որ հիվանդությունները շատ ավելի հեշտ է կանխարգելելը, քան հետագայում դրանց հետևանքով առաջացած տարատեսակ բարդությունների դեմ պայքարելը, ուստի հարկավոր է շատ ուշադիր լինել առողջության հանդեպ: Հարկ է հիշել, որ տեսողության վատացման առաջին իսկ ախտանշանների ի հայտ գալու դեպքում հարկավոր է դիմել ակնաբույժին և կանխարգելիչ միջոցներ ձեռնարկել:

Սակայն  կան նաև մի շարք արդյունավետ բնական միջոցներ, որոնք կօգնեն խուսափել նման խնդիրներից և բարելավել տեսողությունը: Ձեր ուշադրությանն ենք ներկայացնում դրանցից մի քանիսը:

·        Հալվե

Հալվեն ամենաօգտակար ու առողջարար բույսերից է, որը կիրառվում է ժողովրդական բժշկության մեջ տարբեր հիվանդություններից ազատվելու համար: Սակայն այն նաև հիանալի միջոց է տեսողության բարելավման համար, ուստի ձեր ուշադրությանն ենք ներկայացնում հալվեով երկու արդյունավետ միջոց:

1.      Հարկավոր է կտրել հալվեի մեկ տերև, փաթաթել այն անձեռոցիկով և դնել փոքրիկ արկղի մեջ: Հաջորդ օրը հարկավոր է նույն կերպ կտրել ու պահել երկրորդ տերևը, իսկ երրորդ օրը՝ երրորդը: Չորրորդ օրը հերթական տերևը արկղի մեջ դնելուց հետո հարկավոր է վերցնել առաջին օրը կտրած տերևը, լավ լվանալ, կտրել փշերը և ուտել հում վիճակում մի փոքր մեղրով: Հաջորդ օրը հարկավոր է պահել 5-րդ տերևը և ուտել երկրորդ օրվա պահածը: Այս կերպ հարկավոր է ուտել 19 տերև:

2.      0.5 կգ հալվեի թարմ տերևները փաթաթել թղթով կամ փայլաթիթեղով (լույսի ազդեցությունից խուսափելու համար) և 2 շաբաթ պահել սառնարանում: Այնուհետև հարկավոր է տերևները լավ լվանալ, կտրել փշերը և մանրացնել մսաղացով: Ստացված զանգվածին հարկավոր է ավելացնել 0.5 լիտր կագոր (գինի) և մեղր, խառնել մինչև ստացվի համասեռ զանգված, այնուհետև լցնել լավ փակվող ապակյա տարաների մեջ և պահել սառնարանում: Ստացված դեղամիջոցն անհրաժեշտ է ընդունել օրական մեկ ճաշի գդալ (ամեն առավոտ դատարկ ստամոքսին), այնուհետև մի փոքր գոլ ջուր խմել:

·        Եղինջ

Տեսողության վատացման դեպքում շատ օգտակար կարող է լինել նաև եղինջը: Այս բույսը հատկապես օգտակար է տարեց հիվանդների համար: Մասնագետները խորհուրդ են տալիս հաճախ պատրաստել թարմ եղինջով ապուրներ, իսկ տերևներն ավելացնել աղցաններին:

Բացի այդ, շատ օգտակար կարող է լինել եղինջի ցողուններով ու տերևներով պատրաստված թուրմը: Այն պատրաստելու համար հարկավոր է 1 ճաշի գդալ չորացրած ու մանրացրած երկտուն եղինջին ավելացնել մեկ բաժակ եռման ջուր, մեկ ժամ թրմել, այնուհետև քամել և ընդունել ստացված թուրմն օրական երեք անգամ 1/3 բաժակ:

Սակայն հարկ է հիշել, որ այս բույսը հակացուցված է արյան բարձր մակարդելիության ու այն արյունահոսությունների դեպքում, որոնք պայմանավորված են պոլիպներով, կիստաներով ու արգանդի և դրա հավելումների ուռուցքներով: Հատկապես զգույշ պետք է լինեն երիկամների հիվանդություններից տառապողները:

·        Կաղամբ

Տեսողությունը բարելավող շատ արդյունավետ միջոց է նաև կաղամբը: Ընդ որում՝ կաղամբի տերևների եփուկը ոչ միայն վերականգնում է տեսողությունը, այլև բարելավում է քնի որակը: Պարզապես հարկավոր է սառը ջրով լվանալ կաղամբի տերևները, այնուհետև եփել դրանք մինչև փափկեն և թողնել սառեն: Կաղամբի խաշած տերևները հարկավոր է ուտել օրվա ընթացքում, այնուհետև խմել նաև ստացված եփուկը:

·        Գազարի տերևուք (վերին հատվածը՝ տերևներն ու ցողունները)

Գազարն առհասարակ շատ օգտակար է առողջության համար, իսկ դրա տերևուքը կօգնի մոռանալ տեսողության վատացման մասին: Մասնագետները խորհուրդ են տալիս ավելացնել այն աղցաններին ու տարբեր ուտեստներին կամ պարզապես չորացնել և օգտագործել համեմունքի տեսքով:

Նյութի աղբյուրը՝ fithacker.ru