Մեղրով բնական դեղամիջոցներ լյարդը մաքրելու և օրգանի առողջությունը պահպանելու համար

Առողջ լյարդը մարդու ընդհանուր առողջության գրավականն է, քանի որ հենց այս օրգանն է կատարում օրգանիզմի մաքրման գործառույթը: Այն հեռացնում է օրգանիզմից բոլոր տոքսիններն ու վնասակար տարրերը, որոնք արյան մեջ են հայտնվում սննդի, ըմպելիքների ու օդի միջոցով: Նույնիսկ եթե հաշվի չառնենք լյարդի՝ արյուն և լեղի արտադրելու ֆունկցիաները, միևնույն է այն կատարում է բազմաթիվ այլ գործառույթներ օրգանիզմը մաքուր ու առողջ պահելու համար: Հենց սա է պատճառը, որ անհրաժեշտ է հոգ տանել լյարդի մասին, իսկ այս հարցում անփոխարինելի միջոց է մեղրը:

Ձեր ուշադրությանն ենք ներկայացնում ժողովրդական բժշկության մի քանի բաղադրատոմս, որոնց հիմնական բաղադրիչը մեղրն է: Այս բնական դեղամիջոցները կօգնեն պահպանել լյարդի առողջությունը և մաքրել այն տոքսիններից ու վնասակար տարրերից:

1-ին բաղադրատոմսը. 2 ճաշի գդալ մեղրը և ½ թեյի գդալ մեղվակաթը խառնել և ընդունել առավոտյան սոված ժամանակ: Խառնել մեկ ճաշի գդալ մեղրը մեկ թեյի գդալ մեղվահացի հետ և ընդունել ճաշից հետո:

2-րդ բաղադրատոմսը. 4 ճաշի գդալ հազարաթերթի տերևները, 4 ճաշի գդալ անթառամի ծաղիկները, 4 ճաշի գդալ դառը օշինդրը, 2 ճաշի գդալ սամիթի պտուղները և 2 ճաշի գդալ անանուխը խառնել: Ստացված խառնուրդի 2 ճաշի գդալին ավելացնել 2 բաժակ եռման ջուր, դնել տաք գոլորշու վրա 15 րոպե, թրմել 1 ժամ և քամել: Ստացված թուրմի մեկ բաժակի մեջ լուծել 2 ճաշի գդալ մեղր և ընդունել տաք միճակում ½ բաժակ ուտելուց 15-20 րոպե առաջ: Այս ըմպելիքը շատ օգտակար է հեպատիտի և խոլեցիստիտի դեպքում:

3-րդ բաղադրատոմսը. 8 ճաշի գդալ անանուխը, 5 ճաշի գդալ օշինդրը և 5 ճաշի գդալ անթառամի ծաղիկները խառնել: Ստացված խառնուրդի 2 ճաշի գդալին ավելացնել 2 բաժակ եռման ջուր, դնել տաք գոլորշու վրա 15 րոպե, թրմել ևս 1 ժամ և քամել: Մեկ բաժակ թուրմի մեջ լուծել 1 ճաշի գդալ մեղր և խմել տաք վիճակում ½ բաժակ ուտելուց 20-30 րոպե առաջ: Այս ըմպելիքը խթանում է լեղու արտադրությունը:

4-րդ բաղադրատոմսը. 4 ճաշի գդալ կատվախոտի մանրացրած արմատները, 4 ճաշի գդալ կարմիր երեքնուկը, 3 ճաշի գդալ գայլուկի պտուղները խառնել և ստացված խառնուրդի 1 ճաշի գդալը թրմել 2 բաժակ եռման ջրով 30-40 րոպե: 1 բաժակ թուրմի մեջ լուծել 1 ճաշի գդալ մեղր և խմել տաք վիճակում, օրը 3 անգամ, ուտելուց առաջ ½ բաժակ: Այս ըմպելիքը նույնպես խթանում է լեղու արտադրությունը:

5-րդ բաղադրատոմսը. 4-ական ճաշի գդալ եղերդակի ու խատուտիկի մանրացրած արմատները և 3 ճաշի գդալ անթառամի ծաղիկները խառնել և ստացված խառնուրդի 2 ճաշի գդալը 2 բաժակ եռման ջրով եփել թույլ կրակի վրա 10 րոպե: Թրմել 1 ժամ, քամել և ընդունել օրը 3 անգամ, սոված ժամանակ ½ բաժակ: Միևնույն ժամանակ անհրաժեշտ է ընդունել ½ թեյի գդալ մեղրի և մեղվակաթի խառնուրդ՝ 1:100 հարաբերակցությամբ (պահել բերանում մինչև ամբողջությամբ հալվելը):

6-րդ բաղադրատոմսը. Քրոնիկ հեպատիտների, լյարդի ցիռոզի և խոլեցիստիտների դեպքում օրական 2-3 անգամ ուտելուց 30 րոպե առաջ անհրաժեշտ է ընդունել ½-1 թեյի գդալ մեղվահաց: Բուժման կուրսի տևողությունն է 2-3 ամիս: Բուժումը շատ ավելի արդյունավետ դարձնելու համար կարելի է մեղվահացը համադրել մեղրի հետ (1 ճաշի գդալ մեղրը լուծել 2 ճաշի գդալ ջրի մեջ):

Նյութի աղբուրը՝ med2.ru