Ամերիկացի գիտնականներին հաջողվել է լուսանկարել մահացու կորոնավիրուսը (լուսանկար)

15:54 • 14.02.20

ԱՄՆ-ի ալերգիաների և ինֆեկցիոն հիվանդությունների ազգային ինստիտուտի գիտնականներին հաջողվել է լուսանկարել մահացու կորոնավիրուսի նոր տեսակը: Ինչպես գրում է actualnews.org կայքը, վտանգավոր միկրոօրգանիզմի լուսանկարը գիտնականները հրապարակել են համացանցում:

Հետազոտություններն անցկացվել են վերոնշյալ գիտական հաստատությունում, որը գտնվում է Մոնտանա նահանգում: Լուսանկարը հաջողվել է անել սքանավորող ու տրանսմիսիոն էլեկտրոնային միկրոսկոպիայի մեթոդի կիրառմամբ: Լուսանկարների անալիզը ցույց է տվել, որ արտաքնապես կորոնավիրուսի նոր տեսակը նման է իր նախորդին, որն էլ դարձել էր 2002-2003 թվականներին տարածված համաճարակի պատճառ:

Գիտնականների կիրառած մեթոդը ենթադրում է, որ մի փունջ էլեկտրոններ անցկացվում են հետազոտվող նմուշի միջով, այնուհետև այդ ճառագայթները մեծացվում են հզոր մագնիսական ոսպնյակների միջոցով, որից հետո պատկերը գրանցվում է CCD-մատրիցայի վրա:

Ստացված լուսանկարները մասնագետները հատուկ ծրագրի միջոցով գունավորել են, քանի որ ի սկզբանե դրանք սև-սպիտակ էին: Մասնագետներն ընդգծում են, որ կորոնավիրուսն իր անվանումն ստացել է միկրոսկոպիկ փշերի պատճառով, որոնք տեղակայված են մանրէի մակերևույթին և պսակ են հիշեցնում:

В США сфотографировали коронавирус

Հիշեցնենք, որ ավելի վաղ գիտնականներն արդեն ցույց էին տվել, թե ինչ տեսք ունի ամբողջ աշխարհում սրընթաց տարածվող մահացու կորոնավիրուսը: Նրանք հատուկ ուշադրություն էին դարձրել շտամի մակերևույթին գտնվող փշերին, որոնք էլ հենց այն «թագերն» են, որոնց շնորհիվ վիրուսների այս ընտանիքն ստացել է իր անվանում:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Վերջին տվյալներով՝ Չինաստանում վարակվածների ընդհանուր թիվը գերազանցել է 63,8 հազարը, մահացել է 1380 մարդ, Չինաստանի սահմաններից դուրս վարակվել է 505 մարդ: