Անանուխի հյութահանուկը կարող է բարելավել մարդու մտավոր կարողությունները. հետազոտություն

Անանուխը շատ տարածված բույս է, որը լայն կիրառում ունի խոհանոցում: Այն օգտագործվում է տարբեր ուտեստների ու ըմպելիքների բաղադրության մեջ, սակայն այս դեղաբույսը նաև հիանալի միջոց է առողջական տարբեր խնդիրների դեմ պայքարի համար, քանի որ հարուստ է մեծ քանակությամբ բնական կենսաակտիվ քիմիական նյութերով: Հայտնի է, որ անանուխը մեղմում է թույլ ցավերը, ազատում է այտուցներից ու մարսողական խնդիրներից, սակայն գիտնականների վերջին հետազոտությունները ցույց են տվել, որ անանուխը կարող է նաև բարելավել գլխուղեղի աշխատանքը:

Ինչպես գրում է Nutrition Research ամսագիրը, ամերիկացի գիտնակաների հետազոտությունը ցույց է տվել, որ անանուխի հյութահանուկի երկարատև գործածությունը կարող է զգալիորեն բարելավել երիտասարդ ու ֆիզիկապես ակտիվ մարդկանց կոգնիտիվ կարողությունները: Ավելին՝ անանուխը ոչ միայն բարելավում է նրանց կենտրոնանալու կարողությունը, այլև նպաստում է տեղեկությունը մտապահելու և վերլուծելու գործընթացի բարելավմանը:

Նախորդ հետազոտությունները ցույց էին տվել, որ անանուխի հյութահանուկը դրական ազդեցություն է ունենում հիշողության հետ կապված խնդիրներ ունեցող 50-70 տարեկան մարդկանց կոգնիտիվ գործառույթների վրա: Պարզելու համար, թե արդյոք այն նույնքան օգտակար է նաև երիտասարդների համար, գիտնականներն անցկացրել են ևս մի հետազոտություն, որին մասնակցել է 150-50 տարեկան 142 առողջ ու ակտիվ մարդ: Կամավորները բաժանվել են երկու խմբի, որոնցից առաջինի մասնակիցներն օրական 900 մգ անանուխի հյութահանուկ են ստացել, իսկ երկրորդ խմբի մասնակիցները՝ պլացեբո: Գիտափորձը տևել է 90 օր:

Գիտնականները մասնակիցների կոգնիտիվ կարողությունները գնահատում էին կոգնիտիվ թեստերի միջոցով, իսկ քնի, տրամադրության կամ կյանքի որակները՝ հարցաթերթիկների: Գնահատումներն իրականացվել են հետազոտությունից առաջ, ինչպես նաև գիտափորձի 7-րդ, 30-րդ և 90-րդ օրերին:

Հետազոտությունները ցույց են տվել, որ գիտափորձի 30-րդ և 90-րդ օրերին անանուխի հյութահանուկ ընդունած կամավորների կոգնիտիվ կարողությունները զգալի բարելավվել են. կամավորներին հաջողվում էր ավելի լավ կենտրոնանալ որևէ գործընթացի վրա և պահպանել կենտրոնացումը բավական երկար ժամանակ: Այս հմտությունը թույլ է տալիս մարդկանց ավելի լավ կատարել այն հանձնարարությունները, որոնց համար կարող է երկար ժամանակ պահանջվել:

Ընդհանուր առմամբ՝ անանուխի հյութահանուկ ընդունած մարդկանց մոտ դրական փոփոխություններ են նկատվել նաև գիտափորձի 7-րդ օրը. ի տարբերություն պլացեբո ստացած կամավորների՝ նրանց հաջողվում էր ավելի լավ յուրացնել ու պահպանել տեղեկությունը և ավելի ճիշտ օգտագործել այն:

՝