Որովայնի ցավը կարող է լինել COVID-19-ի մասին հուշող ամենավաղ ախտանշանը. Express

Ամբողջ աշխարհում տարածված COVID-19-ի համավարակի ֆոնին մասնագետները հորդորում են մարդկանց շատ զգոն լինել ու չանտեսել չոր հազը և բարձր ջերմությունը, որոնք համարվում են կորոնավիրուսային վարակի մասին հուշող հիմնական ախտանշանները, սակայն Վուսթերի հանրային առողջապահության տնօրեն Մայքլ Հիրշը նշում է, որ ներկա պահին հիվանդանոցներում կան կորոնավիրուսի նոր տեսակով վարակված հիվանդներ, որոնց մոտ առկա միակ ախտանշանը որովայնի ցավերն են։

«Որովայնի ցավը կարող է լինել COVID-19-ի ամենավաղ ախտանշանը, և հարկավոր է շատ զգոն լինել նման խնդրի առկայության դեպքում։ Որոշ հիվանդներ հայտնել են, որ որովայնի ցավեր են ունեցել մյուս հայտնի ախտանշանների՝ հազի, բարձր ջերմության ու հևոցի ի հայտ գալուց անմիջապես առաջ», - նշել է փորձագետը բրիտանական Express պարբերականի հետ զրույցում։

Ավելի վաղ Գաստրոէնտերոլոգիայի ամերիկյան ամսագիրը հայտնել էր գիտնականների ուսումնասիրության մասին, որը ցույց էր տվել, որ կորոնավիրուսային վարակի մասին կարող են վկայել նաև մարսողական խնդիրներն ու փորլուծությունը։ Մասնագետները նկատել են, որ Չինաստանի Հուբեյ նահանգում COVID-19-ով վարակված հիվանդների 48,5%-ը հոսպիտալացվել է մարսողական համակարգի հետ կապված խնդիրներով, այդ թվում՝ արտաթորանքի փոփոխություններով, փսխումով ու որովայնի ցավերով։

«Ստամոքսի ցավերը կապված են թոքերի ստորին հատվածներում թոքաբորբի զարգացման հետ։ Բորբոքումները գրգռում են ստոծանին, ինչը կարող է դառնալ որովայնի ցավերի պատճառ», - բացատրում է Մայքլ Հիրշը՝ հավելելով, որ կորոնավիրուսի այս ախտանշանն առավել բնորոշ է երիտասարդ հիվանդներին, մինչդեռ տարեցների մոտ հիվանդությունը սովորաբար դրսևորվում է շնչառական համակարգի հիվանդություններին բնորոշ ախտանշաններով։

COVID-19-ի մասին հուշող մյուս քիչ հայտնի ախտանշաններն են անոմալ քնկոտությունն ու հոգնածությունը, համերն ու հոտերը տարբերելու ունակության կորուստը, գլխացավերը, քթի փակվածությունն ու աչքերի կարմրածությունը։

Հիշեցնենք, որ Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին, իսկ մարտի 11-ին ԱՀԿ-ն նոր կորանավիրուսը համավարակ էր հայտարարել: Հայտնի է, որ համաճարակը բռնկվել է Չինաստանի Հուբեյ նահանգի 11 մլն բնակչություն ունեցող Ուհան քաղաքում: Համաճարակի օջախ Չինաստանի սահմաններից դուրս վարակը տարածվել է 203 երկրում:

Վերջին տվյալներով՝ աշխարհում գրանցվել է վարակման  1 040 656 դեպք, 55 189-ը՝ մահվան ելքով, ապաքինվել է 222 240 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 736 է, բուժվածների թիվը` 43, մահվան ելքերը՝ 7։