ԱՄՆ-ում սկսվել են COVID-19-ի դեմ ճապոնական դեղամիջոցի կլինիկական փորձարկումները. Boston Globe

Ամերիկյան Մասաչուսեթս նահանգի երեք հիվանդանոց երկրում առաջին անգամ ճապոնական «Ավիգան» դեղամիջոցի կլինիկական փորձարկումներն անցկացնելու թույլատվություն են ստացել։ Ինչպես գրում է Boston Globe պարբերականը՝ հղում անելով իր աղբյուրներին, ենթադրվում է, որ ճապոնական դեղամիջոցը կարող է օգտագործվել կորոնավիրուսի բուժման համար։

Ավելի վաղ հաղորդվում էր, որ «Ավիգան» դեղամիջոցի՝ որպես կորոնավիրուսի նոր տեսակով պայմանավորված ատիպիկ թոքաբորբի բուժման արդյունավետ միջոցի կլինիկական փորձարկումները Ճապոնիայում սկսվել են մարտի վերջին։ Դեղամիջոցը, որը հայտնի է նաև «Ֆավիպիրավիր» և «Ֆավիլավիր» անվանումներով, ստեղծվել է Fujifilm Toyama Chemical Co ընկերության կողմից հինգ տարի առաջ գրիպի բուժման համար։ Սակայն կենդանիների վրա անցկացված գիտափորձերի ժամանակ նկատվել են կողմնակի բարդություններ պտղի զարգացման համար։ Արդյունքում այն հակցուցված է հղիներին և դասվում է այն դեղամիջոցների շարքին, որոնց գործածությունը հնարավոր է միայն կառավարության հատուկ թույլատվության դեպքում, եթե մյուս դեղամիջոցները բավական արդյունավետ չլինեն։

Միևնույն ժամանակ չինացի բժիշկները նկատել են, որ այն արդյունավետ է նոր տեսակի կորոնավիրուսով պայմանավորված թոքաբորբի բուժման համար։ Պարբերականի տվյալներով՝ ԱՄՆ Սննդամթերքի և դեղորայքի որակի վերահսկողության վարչությունը (FDA) երեքշաբթի թույլ է տվել փորձարկել դեղամիջոցը, սակայն ոչ մեծ քանակությամբ։

Ճապոնական Կիոդո գործակալությունը՝ հղում անելով իր աղբյուրներին, ավելի վաղ հաղորդել էր, որ ներկա պահին Ճապոնիայում կա «Ավիգանի» բավարար պաշար գրիպով վարակված երկու միլիոն մարդու և կորոնավիրուսի նոր տեսակով վարակված 700 հազար մարդու բուժելու համար։ Ավելին՝ Ճապոնիայի կառավարության գլխավոր քարտուղար Յոսիհիդա Սուգան ավելի վաղ հայտարարել էր, որ Տոկիոն դիտարկում է այլ երկրներին թոքաբորբով հիվանդների բուժման համար դեղամիջոցն անվճար տրամադրելու հնարավորությունը Նրա խոսքով՝ այս պահին իրենք դիվանագիտական ուղիներով նման հայցեր են ստացել 30 երկրից։

Հիշեցնենք, որ Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին, իսկ մարտի 11-ին ԱՀԿ-ն նոր կորանավիրուսը համավարակ էր հայտարարել: Հայտնի է, որ համաճարակը բռնկվել է Չինաստանի Հուբեյ նահանգի 11 մլն բնակչություն ունեցող Ուհան քաղաքում: 

Համաճարակի օջախ Չինաստանի սահմաններից դուրս վարակը տարածվել է 204 երկրում: Ջոնս Հոփքինսի անվան համալսարանի հրապարակած տվյալների համաձայն՝ աշխարհում այժմ 18 երկիր է հաշվվում, որտեղից նոր տեսակի կորոնավիրուսի վարակման մասին տեղեկություններ չեն ստացվել։ Խոսքը Վանուատուի, Եմենի, Կիրիբատիի, Հյուսիսային Կորեայի, Կոմորյան կղզիների, Լեսոտոյի, Մարշալյան կղզիների, Միկրոնեզիայի, Նաուրուի, Պալաուի, Սամոայի, Սան Տոմե և Պրինսիպիի, Սողոմոնյան կղզիների, Տաջիկստանի, Տոնգայի, Թուրքմենստանի, Տուվալուի և Հարավային Սուդանի մասին է:

Վերջին տվյալներով՝ աշխարհում գրանցվել է վարակման  1 434 861 դեպք, 82 161-ը՝ մահվան ելքով, ապաքինվել է 302 470 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 881 է, բուժվածների թիվը 114 է, փաստացի բուժվողներինը՝ 758, բացասական թեստերը՝ 4571, մահվան ելքերը՝ 9: