Մեծ Բրիտանիայում անցկացվում են COVID-19-ի դեմ դեղամիջոցների ամենամասշտաբային փորձարկումներն աշխարհում. The Guardian

Մեծ Բրիտանիայի հիվանդանոցներում այժմ անցկացվում են կորոնավիրուսի նոր տեսակով պայմանավորված COVID-19-ի դեմ դեղամիջոցների ամենամասշտաբային փորձարկումներն աշխարհում։ Ինչպես գրում է The Guardian-ը, միաժամանակ փորձարկվում է մի քանի դեղամիջոց և դրանց տարբեր համադրությունները։ Հետազոտությունը ղեկավարում է Օքսֆորդի համալսարանի ինֆեկցիոն հիվանդությունների և համաշխարհային առողջապահության ոլորտի մասնագետ, պրոֆեսոր Պիտեր Հորբին։

Գիտնականների հիմնական խնդիրն է գնահատել այս կամ այն դեղամիջոցի արդյունավետությունը։ «Վերականգնում» անունը կրող հետազոտություններին մասնակցում է ավելի քան հինգ հազար հիվանդ բրիտանական 165 հիվանդանոցից։ Փորձարկումների ընթացքում պացիենտները պատահականության սկզբունքով ստանալու են փորձարկվող դեղամիջոցներից մեկը կամ պլացեբո։ Դեղամիջոցներից յուրաքանչյուրը փորձարկվելու է 500-900 պացիենտից բաղկացած խմբի վրա։

Նախագծի շրջանակներում բժիշկներն ուսումնասիրելու են հիդրոքսիքլորոխին հակամալարիային դեղամիջոցն ու ազիտրոմիցին հակաբիոտիկը։ Բացի այդ, այս պահին ուսումնասիրվում է նաև ՄԻԱՎ-ի բուժման ընթացքում կիրառվող երկու հակառետրովիրուսային դեղամիջոցի՝ լոպինավիրի և ռիտոնավիրի համադրությունը։ Մասնագետները մտադիր են հետազոտությանը ներառել ևս մի դեղամիջոց՝ տոցիլիզումաբ իմունամոդուլացնող դեղը, որը կիրառվում է ռևմատոիդ արթրիտի բուժման համար։

Բացի այդ, փորձագետները դիտարկում են մեկ այլ հետազոտության հավանականությունը, որի ժամանակ բուժումը կիրականացվի արյան պլազմայի միջոցով, որը մասնագետները COVID-19-ով հիվանդացած ու բուժված այն մարդկանցից, որոնց օրգանիզմը վարակի դեմ հակամարմիններ է արտադրել։

Հորբիի խոսքով՝ փոքր է հավանականությունը, որ գիտնականների իր թիմը կստեղծի «հրաշագործ միջոց»։ «Կարծում եմ՝ մենք պետք է նվազեցնենք մարդկանց սպասելիքներն այս դեղերից։ Հնարավոր է՝ դրանցից որոշներն արդյունավետ կլինեն, սակայն հավանական է, որ դրանց արդյունքը չնչին կլինի», - նշում է Հորբին՝ ընդգծելով, որ գիտնականները ցանկանում են գտնել արդյունավետ դեղամիջոցներ COVID-19-ի դեմ, իսկ հետո ուսումնասիրել դրանց համադրությունները, որոնք կլինեն իսկապես արդյունավետ։

Հիշեցնենք, որ Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին, իսկ մարտի 11-ին ԱՀԿ-ն նոր կորանավիրուսը համավարակ էր հայտարարել: Հայտնի է, որ համաճարակը բռնկվել է Չինաստանի Հուբեյ նահանգի 11 մլն բնակչություն ունեցող Ուհան քաղաքում: Համաճարակի օջախ Չինաստանի սահմաններից դուրս վարակը տարածվել է 210 երկրում։ 

Վերջին տվյալներով՝ աշխարհում գրանցվել է վարակման  2 206 535 դեպք, 148 651-ը՝ մահվան ելքով, ապաքինվել է 558 437 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 1 201 է, բուժվածների թիվը 402 է, փաստացի բուժվողներինը՝ 780, մահվան ելքերը՝ 19: Ընդհանուր առմամբ թեստավորվել է 10 793 քաղաքացի: