Գիտնականները պարզել են՝ երբ են COVID-19-ով հիվանդներն առավել վարակիչ. Nature Medicine

17:58 • 20.04.20

Չինացի գիտնականները պարզել են՝ երբ են COVID-19-ով հիվանդներն առավել վարակիչ լինում։ Մասնագետների անցկացրած ուսումնասիրությունները ցույց են տվել որ 44 տոկոս դեպքերում նոր կորոնավիրուսը տարածվում է այն հիվանդների միջոցով, որոնց մոտ դեռ հիվանդությանը բնորոշ ակնհայտ ախտանշաններ ի հայտ չեն եկել։ Ընդ որում՝ հիվանդներն առավել վարակիչ են լինում հիվանդության դրսևորումների ի հայտ գալուց 1-2 օր առաջ։ Հետազոտության արդյունքները հրապարակվել են Nature Medicine պարբերականում։

Գիտնականները հետազոտել են 2020 թվականի հունվարի 21-ից փետրվարի 14-ն ընկած ժամանակահատվածում Չինաստանի Գուանչժոու քաղաքի Ութերորդ ժողովրդական հիվանդանոց դիմած քաղաքացիների քթից ու կոկորդից վերցված քսուքի նմուշները։ Ուսումնասիրվել են 24 պացիենտից ստացված տվյալները։ Ընդ որում՝ 32 օրվա ընթացքում գիտնականները բոլոր վարակվածներից պարբերաբար նմուշներ են վերցվել հետազոտությունները շարունակելու համար։

Փորձագետների խոսքով՝ վերցված նմուշներում վիրուսի գենետիկ նյութի առկայությունն առավել բարձր էր հիվանդության ախտանշանների ի հայտ գալու առաջին օրը, իսկ հաջորդ երեք շաբաթվա ընթացքում այդ ցուցանիշն աստիճանաբար նվազել է։ Ինչպես բացատրում են մասնագետները, սա խոսում է այն մասին, որ վարակված մարդն առավել շատ վիրուս է «արտադրում» հիվանդության առաջին օրերին՝ դեռ մինչ այն պահը, երբ իմունային համակարգն ակտիվանում է ախտանշաններ առաջացնելու և վիրուսը ոչնչացնելու համար։

Գիտնականներն ուսումնասրել են ևս 77 դեպք, որոնց դեպքում հայտնի է եղել ինչպես վարակողը, այնպես էլ վարակվողը։ Այս դեպքերի ուսումնասիրությունը ցույց է տվել, որ այս հիվանդության հպավարանցիկությունը (կոնտագիոզություն) առավել բարձր է լինում վարակակրի մոտ հիվանդության ախտանշանների ի հայտ գալուց 2,3 օր առաջ և իր գագաթնակետին է հասնում ախտանշանների ի հայտ գալուց 0,7 օր առաջ։

Հիշեցնենք, որ Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին, իսկ մարտի 11-ին ԱՀԿ-ն նոր կորանավիրուսը համավարակ էր հայտարարել: Հայտնի է, որ համաճարակը բռնկվել է Չինաստանի Հուբեյ նահանգի 11 մլն բնակչություն ունեցող Ուհան քաղաքում: Համաճարակի օջախ Չինաստանի սահմաններից դուրս վարակը տարածվել է 210 երկրում։

Վերջին տվյալներով՝ աշխարհում գրանցվել է վարակման 2 428 274 դեպք, 166 123-ը՝ մահվան ելքով, ապաքինվել է 636 723 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 1 339 է, բուժվածների թիվը 580 է, փաստացի բուժվողներինը՝ 737, մահվան ելքերը՝ 22: Ընդհանուր առմամբ թեստավորվել է 13 373 քաղաքացի: