Մուտացիայի ենթարկված SARS-CoV-2-ի նոր շտամը մի քանի անգամ ավելի վտանգավոր է, քան Չինաստանում հայտնաբերվածը. գիտնականներ

15:14 • 30.06.20

Ամերիկացի գիտնականները հայտնել են SARS-CoV-2 կորոնավիրուսի մուտացիայի և նոր շտամի մասին, որը շատ ավելի վտանգավոր է, քան այն, որն ի սկզբանե հայտնաբերվել է Չինաստանում։ Ինչպես գրում է Daily Mail-ը, Ֆլորիդայի գիտնականները նշում են, որ մուտացիայի ենթարկված վիրուսն ունի շատ ավելի բարձր կայունություն և հազվադեպ է ոչնչանում մարդկային օրգանիզմում։

Հետազոտությունները ցույց են տվել, որ «սպիտակուցային փշերը», որոնք վիրուսն օգտագործում է շնչուղիների բջիջներին կպչելու համար, մշտապես կատարելագործվում են՝ փորձելով ադապտացվել մարդկային հյուսվածքների առանձնահատկություններին։ Այժմ SARS-CoV-2 կորոնավիրուսը հեշտությամբ արգելափակում է ընկալիչները, որպեսզի հասանելիություն ստանա անհրաժեշտ հատվածներին։

Գենետիկ մուտացիայի հետևանքով կորոնավիրուսը ոչ միայն ավելի կայուն է դարձել, այլև արագացրել է իր բազմացման արագությունը, ինչը նշանակում է, որ ախտածնի վարակելիությունը զգալիորեն բարձրացել է։ Գիտնականների խոսքով՝ այժմ վիրուսը մոտ 10 անգամ ավելի վարակիչ է, քան 2019 թվականի վերջին էր։

Արդեն մայիսին ԱՄՆ-ում, Մեծ Բրիտանիայում և Իտալիայում գերիշխում էր մուտացված վիրուսը։ Գիտնականները համեմատել են վիրուսի երկու տարբերակի «սպիտակուցային փշերն» ու նկատել, որ մուտացիայի ենթարկված վիրուսը շատ ավելի արագ է անցնում АСЕ-2 ընկալիչների պատնեշը, ինչն էլ բացատրում է արևմտյան երկրներում COVID-19-ի նման կտրուկ տարածումը։

Մասնագետներն ընդգծում են, որ վիրուսները, ինչպես և ցանկացած այլ կենդանի օրգանիզմ, կարող են մուտացիայի ենթարկվել։ Այս կերպ նրանք փորձում են ավելի արագ բազմանալ, ավելի արագ վարակել ու անխոցելի դառնալ։ Միևնույն ժամանակ վիրուսների համար չափազանց մահաբեր լինելը «շահաբեր չէ», քանի որ այդ դեպքում դրանք պարզապես շատ արագ կսպանեն իրենց «տիրոջն» ու չեն կարողանա շարունակել բազմանալ։

Հիշեցնենք, որ Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին, իսկ մարտի 11-ին ԱՀԿ-ն նոր կորանավիրուսը համավարակ էր հայտարարել: Հայտնի է, որ համաճարակը բռնկվել է Չինաստանի Հուբեյ նահանգի 11 մլն բնակչություն ունեցող Ուհան քաղաքում: Համաճարակի օջախ Չինաստանի սահմաններից դուրս վարակը տարածվել է ավելի քան 200 երկրում։

Վերջին տվյալներով՝ աշխարհում գրանցվել է վարակման 10 433 437 դեպք, 508 805-ը՝ մահվան ելքով, ապաքինվել է 5 692 120 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 25 542 է, բուժվածների թիվը 14 048 է, փաստացի բուժվողներինը՝ 10 904, մահվան ելքերը՝ 590: Ընդհանուր առմամբ թեստավորվել է 111 844 քաղաքացի: