Ինչ կողմնակի բարդությունների պատճառ կարող են դառնալ հակաբիոտիկները

Հակաբիոտիկները շատ կարևոր դեղամիջոցներ են, որոնք օգնում են պայքարել մի շարք վտանգավոր հիվանդությունների դեմ, սակայն այս դեղամիջոցների չարաշահումը կամ սխալ կիրառումը կարող է շատ ավելի լուրջ խնդիրների պատճառ դառնալ։ Վերջերս Հարվարդի համալսարանի բժշկական քոլեջի գիտնականներն ապացուցել են, որ հակաբիոտիկների հաճախակի գործածության դեպքում զարգանում են աղիների բորբոքային հիվանդությունների տարբեր ենթատեսակներ, ինչը նշանակում է, որ այս դեղամիջոցները համարվում են աղիների բորբոքային հիվանդության զարգացմանը նպաստող գործոններից մեկը։ 

Այս վտանգավոր խանգարման ամենատարածված ենթատեսակներն են խոցային կոլիտն ու Կրոնի հիվանդությունը, որոնք կարող են բավական երկարատև ընթացք ունենալ և առաջացնել բազմաթիվ տհաճ զգացողություններ։ Նման բարդությունների զարգացումը պայմանավորված է նրանով, որ հակաբիոտիկները կիրառվում են բազմաթիվ ինֆեկցիոն հիվանդությունների բուժման համար, սակայն դրանք ոչնչացնում են ոչ միայն վնասակար բակտերիաները, այլև որոշ օգտակարները։ Օրինակ` մակրոլիդների, ցեֆալոսպորինների, պենիցիլինների և ֆտորխինոլների դասին պատկանող հակաբիոտիկները կարող են հանգեցնել մարսողության խանգարման, սրտխառնոցի, փոխման, փորլուծության ու աղեստամոքսային տրակտի հետ կապված այլ խանգարումների զարգացման։ 

Բացի այդ, հակաբիոտիկները կարող են դառնալ նաև լուսազգայունության պատճառ, որի դեպքում մարդու մաշկն ու աչքերը շատ ավելի զգայուն են դառնում լույսի նկատմամբ։ Նման ազդեցություն ունեցող հակաբիոտիկներից առավել վտանգավոր է տետրացիկլինը, որը բավական տարածված է։ Բարեբախտաբար նման տհաճ կողմնակի բարդությունն անհետանում է դեղամիջոցի ընդունումը դադարեցնելուց հետո։

Բազմաթիվ դեղամիջոցներ, այդ թվում նաև հակաբիոտիկները, կարող են հանգեցնել մարմնի ջերմաստիճանի բարձրացման, ինչը պայմանավորված է լինում ալերգիկ ռեակցիայով։ Բացի այդ, հակաբիոտիկների ընդունումը նվազեցնում է հեշտոցում օգտակար լակտոբակտերիաների քանակությունը, մինչդեռ այս բակտերիաները պաշտպանում են կանանց սեռական օրգանները սնկերից։ Նման ազդեցությունը հանգեցնում է Candida սնկերի անկառավարելի բազմացման, ինչն էլ դառնում է վագինալ սնկային վարակների զարգացման պատճառ։

Հակաբիոտիկները կարող են վտանգավոր լինել նաև ատամների համար։ Օրինակ՝ տետրացիկլինի և դոքսիցիկլինի գործածությունը կարող է դառնալ ատամների մշտական գունազրկման պատճառ։ Նման կողմնակի բարդությունը հատկապես հաճախ է հանդիպում մինչև 8 տարեկան երեխաների մոտ, քանի որ նրանց ատամները դեռ լիովին չեն կազմավորվել։ Նման ազդեցության պատճառով այս դեղորայքը խորհուրդ չի տրվում ընդունել հղիության ընթացքում, քանի որ դրանք կարող են ազդել երեխայի ատամների զարգացման գործընթացի վրա։

Նյութի աղբյուրը՝ The Health Site