Գիտնականները պարզել են՝ որ վիտամինն է նպաստում քաղցկեղի զարգացմանը

17:02 • 26.08.20

Բոլորն էլ գիտեն, որ վիտամին Е-ն օրգանիզմի համար ամենակարևոր տարրերից մեկն է, սակայն գիտնականները պարզել են, որ որոշ դեպքերում այն կարող է բավական վտանգավոր լինել։ Բացմաթիվ հետազոտություններ ցույց են տվել, որ այս վիտամինով հարուստ մթերքի գործածությունը նվազեցնում է քաղցկեղի զարգացման հավանականությունը, սակայն Շվեդիայի Կարոլինյան ինստիտուտի գիտնականների նոր ուսումնասիրությունը փաստում է, որ վիտամին Е-ն դեղամիջոցի տեսքով ընդունելը կարող է հակառակ ազդեցությունն ունենալ՝ նպաստելով այս վտանգավոր ախտաբանության զարգացմանը։

Գիտնականների ստացած արդյունքները հրապարալվել են Cell ամսագրում։ Հետազոտությունը ցույց է տվել, որ վիտամին Е-ի հավելումների ընդունումը նպաստում է թոքերի քաղցկեղի ագրեսիվացմանն ու արագացնում է ուռուցքի մետաստազավորման գործընթացը։ Գիտնականները պարզել են, որ այս տարրի ազդեցության տակ ակտիվանում է այն սպիտակուցը, որն օգնում է քաղցկեղի բջիջներին ստանալ ավելի շատ գլյուկոզա և ավելի արագ աճել։

Ավելի ուշ վիտամին Е-ի՝ թոքերի քաղցկեղի զարգացմանը նպաստելու կարողությունը հաստատել են նաև ամերիկացի գիտնականները՝ հայտարարելով, որ այս տարրի ընդունումը հավելումների տեսքով բարձրացնում է թոքերի քաղցկեղի զարգացման հավանականությունը կանանց մոտ 28%-ով։ Ավելին՝ գիտնականները չեն բացառում, որ սինթետիկ վիտամին Е-ի ընդունումը կարող է նմանատիպ ազդեցություն ունենալ նաև քաղցկեղի այլ տեսակների՝ կրծքագեղձի քաղցկեղի, արգանդի քաղցկեղի ու ուղիղ աղիքի քաղցկեղի զարգացման հավանականության վրա։

Գիտնականների կարծիքով՝ նման բացասական ազդեցությունը կարող է պայմանավորված լինել վիտամինային հավելումների բաղադրությամբ։ Բանն այն է, որ սննդամթերքում վիտամին Е-ն պարունակվում է երկու տեսակի մոլեկուլների՝ տոկոֆերոլների ու տոկոտրիենոլների տեսքով, մինչդեռ սինթետիկ վիտամին Е-ն պարունակում է տոկոֆերոլների միայն մեկ տեսակ։ Մեծ է հավանականությունը, որ բնական ու դեղորայքային վիտամինները տարբեր կերպ են ազդում օրգանիզմի վրա հենց այս տարբերության պատճառով։