Ամենաարդյունավետ բնական միջոցները կոկորդի ցավը մեղմելու համար. 10 բաղադրատոմս

20:09 • 28.10.20

Կոկորդի ցավը շնչառական համակարգի հիվանդություններին բնորոշ ամենատարածված ախտանշաններից մեկն է, սակայն այն կարող է հանդես գալ նաև որպես առանձին խնդիր: Նման ցավը բավական տհաճ է և բացասաբար է անդրադառնում կյանքի որակի վրա, ուստի զարմանալի չէ, որ մարդիկ փորձում են հնարավորինս շուտ ազատվել դրանից:

Նման դեպքերում հաճախ կիրառվում են բուժիչ օշարակներ կամ սառնաշաքարներ, սակայն նմանատիպ ազդեցությամբ օժտված դեղամիջոցներ կարելի է պատրաստել նաև ինքնուրույն՝ օգտագործելով միայն բնական բաղադրիչներ:

Aif.ru կայքը ներկայացրել է մի քանի արդյունավետ ու փորձված ժողովրդական դեղամիջոցի բաղադրատոմս, որոնք կօգնեն հեշտությամբ մեղմել կոկորդի ցավը:

2 ճաշի գդալ խնկեղեգի մանրացրած արմատներին ավելացնել մի բաժակ եռման ջուր, 20-30 րոպե դնել տաք գոլորշու վրա, այնուհետև ստացված թուրմն օգտագործել կոկորդն օրական մի քանի անգամ ողողելու համար։

30 գրամ հալվե վերայի տերևները կոտորակիչով լավ մանրացնել, այնուհետև ստացված խյուսին ավելացնել մի բաժակ եռացրած (սակայն ոչ եռման) ջուր, թողնել մեկ ժամ թրմվի, այնուհետև դնել կրակին ու եռացնել երեք րոպե։ Ստացված թուրմը քամել և ստացված հեղուկն օգտագործել օրական երեք անգամ կոկորդը ողողելու համար։

1 ճաշի գդալ լորենու չորացրած ծաղիկներին ավելացնել մի բաժակ եռացող ջուր, թրմել մինչև հեղուկը սառչի, այնուհետև քամել։ Ստացված թուրմը հարկավոր է ընդունել օրական 3-4 անգամ մեկական ճաշի գդալ։

Քամել երեք կիտրոնի հյութը, այնուհետև թարմ հյութն ավելացնել մի բաժակ մեղրին, լավ խառնել ու ընդունել ստացված խառնուրդն օրական 3-4 անգամ մեկական թեյի գդալ։ Խառնուրդը հարկավոր է ոչ թե անմիջապես կուլ տալ, այն սպասել մինչ այն դանդաղ հալչի։

1 ճաշի գդալ անանուխի չորացրած ու մանրացրած տերևներին ավելացնել մի բաժակ եռման ջուր, թրմել 45 րոպե, այնուհետև քամել։ Ստացված թուրմը խմել որպես թեյ կոկորդի ցավն ու տհաճ զգացողությունները մեղմելու համար։

1 ճաշի գդալ լորենու չորացրած ծաղիկները կամ ազնվամորու չորացրած տերևները լցնել թերմոսի մեջ, ավելացնել մի բաժակ եռման ջուր, այնուհետև թրմել մեկ ժամ։ Ստացված թուրմը հարկավոր է քամել և խմել որպես թեյ կոկորդի ցավն ու տհաճ զգացողությունները մեղմելու համար։

2:3 հարաբերակցությամբ խառնել լորենու և երիցուկի ծաղիկները, այնուհետև ստացված խառնուրդի 2 ճաշի գդալին ավելացնել մի բաժակ եռման ջուր, թրմել 20 րոպե, որից հետո քամել։ Ստացված թուրմն օգտագործել կոկորդի ողողումների համար։

Մի բաժակ եռացրած գոլ ջրին ավելացնել մեկ ձվի սպիտակուց ու մեկական թեյի գդալ կերակրի սոդա և աղ, լավ խառնել ու ստացված լուծույթն օգտագործել կոկորդի ողողումների համար։

1 թեյի գդալ սոճու փշատերևները խառնել նույն քանակությամբ դեղատնային երիցուկի ծաղիկներին, ավելացնել մի բաժակ եռման ջուր ու թրմել կես ժամ։ Ստացված բուրավետ բուժիչ թուրմն օգտագործել ինհալացիաների համար։

1 ճաշի գդալ եղեսպակին ավելացնել մի բաժակ եռման ջուր, թողնել կես ժամ, թրմվի, այնուհետև տացված լուծույթն օգտագործել կոկորդի ողողումների համար։

Այս բնական միջոցները շատ արդյունավետ են տհաճ զգացողությունները մեղմելու համար, սակայն հարկ է հիշել, որ առողջական լուրջ խնդիրների դեպքում հարկավոր է անպայման դիմել մասնագետին, քանի որ ինքնաբուժությունը կարող խիստ վնասակար լինել ու էլ ավելի վատթարացնել հիվանդի վիճակը: Նման խնդիրներից խուսափելու համար հարկավոր է անպայման խորհրդակցել բժշկի հետ, քանի որ միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: