Կորոնավիրուսը կարող է մաշկի համար վտանգավոր հետևանքներ ունենալ. գիտնականներ

Գիտնականները վաղուց են հայտնել, որ կորոնավիրուսային վարակը կարող է ուղեկցվել մաշկային խնդիրներով, սակայն այժմ հետազոտությունները ցույց են տվել, որ այս հիվանդությունը կարող է մաշկի համար բավական տհաճ հետևանքներ ունենալ, քանի որ դրա դեպքում մաշկային խնդիրները կարող են քրոնիկական բնույթ ստանալ և պահպանվել անգամ ապաքինումից հետո։ Այս մասին ամերիկացի գիտնականները հայտնել են Մաշկաբանության ու վեներոլոգիայի եվրոպական ակադեմիայի 29-րդ վեհաժողովի ժամանակ։

Ինչպես գրում է medikforum.ru կայքը՝ հղում անելով ТАСС-ին, Բոստոնում գտնվող Մասաչուսեթսյան ընդհանուր պրոֆիլի հիվանդանոցի գիտնականները պարզել են, որ կորոնավիրուսով վարակվելուց հետո մարդիկ կարող են բախվել մաշկի քրոնիկ հիվանդությունների ու բորբոքումների խնդրին։ Հետազոտությունները ցույց են տվել, որ հիվանդության ընթացքում վիրուսով պայմանավորված մաշկային խնդիրները կարող են պահպանվել անգամ ապաքինումից հետո։ Ընդ որում՝ նման խնդիր հատկապես հաճախ է նկատվում մաշկի ցրտահարմանը նման ախտահարումների դեպքում,

Հետազոտության շրջանակներում գիտնականները վերլուծել են աշխարհի 40 երկրից ստացված COVID-19-ով հիվանդների հիվանդությունների պատմությունները։ Բոլոր հիվանդների մոտ նկատվում էր մաշկային ցան, բորբոքումներ ու մաշկային այլ ախտահարումներ։

Մասնագետների խոսքով՝ որոշ դեպքերում այս խանգարումների ախտանշաններն ի հայտ էին գալիս ապաքինումից անգամ երկու ամիս անց։ Ընդ որում՝ մասնագետները դեռ պետք է պարզեն, թե ինչով է պայմանավորված ախտաբանական գործընթացի նման երկար պահպանումը։

Գիտնականները նախազգուշացնում են, որ մաշկը մարդու իմունային պաշտպանության գործընթացում պատնեշային գործառույթ կատարող օրգան է, ինչը նշանակում է, որ մաշկի ամբողջականության քրոնիկ խանգարումները թուլացնում են իմունային համակարգն ու բարձրացնում են վարակվելու հավանականությունը՝ թուլացնելով օրգանիզմի դիմադրողականությունը։

Հիշեցնենք, որ նոր կորոնավիրուսի առաջացրած հիվանդության բռնկումը 2019-ի վերջին գրանցվել է Կենտրոնական Չինաստանում, այնուհետև տարածվել 215-ից ավելի երկրում և տարածքում: Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին, իսկ մարտի 11-ին ԱՀԿ-ն նոր կորանավիրուսը համավարակ (պանդեմիա) էր հայտարարել: 

Վերջին տվյալներով՝ աշխարհում գրանցվել է վարակման  45 059 310 դեպք, 1 183 042-ը՝ մահվան ելքով, ապաքինվել է 32 855 189 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 85 034 է, բուժվածների թիվը 53 257 է, փաստացի բուժվողներինը՝ 30 151, մահվան ելքերը՝ 1 626: Ընդհանուր առմամբ թեստավորվել է 392 660 քաղաքացի: