Գիտնականները կորոնավիրուսային վարակի հինգ տեսակ են առանձնացրել

Բոնի համալսարանի գիտնականներն առաջարկել են առանձնացնել կորոնավիրուսային վարակի դեպքերի հինգ տեսակ՝ կախված մարդու իմունային համակարգի արձագանքից։ Ինչպես գրում է «ՌԻԱ Նովոստի»-ն, գիտնականների հետազոտությունների արդյունքները հրապարակվել են Genome Medicine ամսագրում։

Հետազոտության շրջանակներում մասնագետները վերլուծել են 95 կամավորի իմունային գեների աշխատանքը։ Կամավորների թվում կային ինչպես առողջ մարդիկ, այնպես էլ COVID-19-ով հիվանդներ։ Վերլուծության արդյունքում գիտնականներին հաջողվել է առանձնացնել հիվանդության հինգ տեսակ, որոնցից առաջին երկուսը COVID-19-ի ծանր ընթացքով դեպքերն էին, իսկ հաջորդ երեքի դեպքում հիվանդությունը համեմատաբար թեթև ընթացք էր ունենում։

Նշված խմբերը գիտնականներին հաջողվել է առանձնացնել նեյտրոֆիլային գրանուլոցիտների գեների վիճակի ուսումնասիրության արդյունքում։ Այդ բջիջները պատկանում են լեյկոցիտների դասին ու պատասխանատու են բնածին իմունիտետի համար, որն ակտիվանում է անմիջապես այն բանից հետո, ինչ ախտածին տարրը հայտնվում է մարդու օրգանիզմում։ Հետազոտությունը ցույց է տվել, որ կորոնավիրուսով վարակվելու դեպքում նեյտրոֆիլային գրանուլոցիտներն աշխատում են հինգ տարբեր եղանակով։

Բացի այդ, գիտնականները նաև պարզել են, որ նեյտրոֆիլային գրանուլոցիտների գեների ակտիվությունը SARS-CoV-2-ի դեպքում տարբերվում է այն ակտիվությունից, որը սովորաբար նկատվում է գրիպի, ՄԻԱՎ-ի կամ տուբերկուլոզի դեպքում։

Միևնույն ժամանակ գիտնականները չեն բացառել նաև, որ կորոնավիրուսային վարակը կարող է ավելի շատ տեսակներ ունենալ, քան այն տեսակները, որոնք հնաավոր է որոշել նեյտրոֆիլային գրանուլոցիտների միջոցով, ինչն էլ նշանակում է, որ այս ուղղությամբ դեռ հարկավոր է որոշակի հետազոտություններ անցկացնել։

Հիշեցնենք, որ Առողջապահության համաշխարհային կազմակերպությունը նոր կորոնավիրուսը համավարակ էր հայտարարել 2020 թվականի մարտի 11-ին: Համավարակի օջախ Չինաստանի սահմաններից դուրս վարակը տարածվել է ավելի քան 200 երկրում:

Վերջին տվյալներով՝ ամբողջ աշխարհում գրանցվել է կորոնավիրուսով վարակվելու 97 425 574 դեպք, որից 2 086 210-ը՝ մահվան ելքով։ Ընդհանուր առմամբ, ապաքինվել է վարակվածների կեսից ավելին՝ 70 002 991 մարդ։ 

Հայաստանում, վերջին տվյալներով, գրանցվել է վարակվելու 165 528 դեպք։ Հիվանդության հետևանքով մահացել է 3021 մարդ, վարակված ևս 742 մարդ մահացել է այլ հիվանդության հետևանքով։ Ապաքինվել է 154 046 մարդ, փաստացի բուժում են ստանում 7719-ը։ Առ այսօր արվել է 630 604 թեստ։