Գերմանիայում գլխուղեղի քաղցկեղի դեմ առաջին պատվաստանյութի կլինիկական փորձարկումները

17:58 • 01.04.21

Գերմանիայում անցկացվել են քաղցկեղի ամենավտանգավոր ու ծանր տեսակներից մեկի՝ գլխուղեղի քաղցկեղի դեմ առաջին պատվաստանյութի կլինիկական փորձարկումները։ Այս մասին գրում է korrespondent.net-ը՝ Medical Express-ին հղումով։

Ինչպես հաղորդում է պարբերականը, դեղամիջոցն ստեղծվել է եռահիմն օքսիթթուներ սինթեզող IDH1 փոփոխված սպիտակուցի մի մասից։ Գիտնականների խոսքով՝ գենի մեջ տեղի է ունենում մուտացիա, որն էլ արգելափակում է IDH1 սպիտակուցը։ Նման խանգարումներ են հայտնաբերվել գլիոմայով հիվանդների 75%-ի մոտ։ Հենց այդ մուտացիան էլ հանգեցնում է գլխուղեղում չարորակ բջիջների զարգացմանը։

«Մարդու իմունային համակարգը կարող է մուտացիայի ենթարկված IDH1 սպիտակուցն օտար համարել ու գործարկել Т-լիմֆոցիտների շարքին դասվող Т-բջիջների յուրահատուկ պատասխան ռեակցիան», – բացատրում են մասնագետները։

Գլիոմայի դեմ պատվաստանյութն ստեղծվել է մի քանի տարի առաջ։ Գիտնականները փորձարկել են այն լաբորատոր առնետների վրա և ապացուցել, որ այն ունակ է դադարեցնել այն քաղցկեղի բջիջների աճը, որոնցում ընթանում է մուտացիայի գործընթացը։

Այժմ պատվաստանյութը փորձարկվել է գլիոմայով 32 հիվանդի վրա։ Գիտափորձի մասնակիցներն անցել են պատվաստումների ամբողջ կուրսը, որը կազմված էր 8 ներարկումից։

Հարկ է նշել, որ գիտնականները չեն նկատել որևէ ծանր կողմնակի բարդություն, սակայն միևնույն ժամանակ հիվանդներից ոմանց մոտ գրանցվել է ուռուցքի աճ։

«Ակտիվացված իմունային բջիջներն արդյունավետ կերպով ներթափանցում ու գործում էին ուռուցքի հյուսվածքներում։ Պատվաստման նկատմամբ յուրահատուկ իմունային պատասխան ունեցող հիվանդների 82 տոկոսի մոտ ուռուցքը երեք տարի չի զարգացել», – նշում են գիտնականները։

Այս պահի դրությամբ արդյունքները դեռ չեն համեմատվել վերահսկող խմբի արդյունքների հետ, սակայն այնուամենայնիվ դրա անվտանգությունն ու իմունային պատասխան առաջացնելու կարողությունն ապացուցված են, ուստի փորձարկումները շարունակվելու են։