Անգամ ոչ շատ ծանր COVID-19-ից հետո հակամարմինները կարող են պահպանվել բավական երկար ժամանակ․ գիտնականներ

19:35 • 25.05.21

Սենթ Լուիսում Վաշինգտոնի համալսարանի գիտնականների անցկացրած նոր հետազոտությունը ցույց է տվել, որ անգամ միջին ծանրության COVID-19-ից հետո օրգանիզմը բավական երկար ժամանակ պաշտպանված է լինում կորոնավիրուսով երկրորդ վարակումից հակամարմինների շնորհիվ։

Ներկայում գիտնականների շրջանում կա տարածված կարծիք, որ կորոնավիրուսով հիվանդացած մարդիկ հակամարմինների միջոցով իմունիտետ են ստանում բավական կարճ ժամանակով, եթե հիվանդությունն ասիմպտոմ կամ թեթև ընթացք է ունեցել։ Այս թեմայով հետազոտություններն սկսվել են անցկացվել դեռ նախորդ տարվա աշնանը, և հենց այդ ժամանակ էլ մասնագետներն սկսել են խոսել այն մասին, որ հիվանդությունն ինքնին բավական կարճ ժամանակով պահպանվող իմունիտետ է ապահովում, որից հետո մարդը կարող է շատ արագ կրկին վարակվել։

Այնուամենայնիվ Վաշինգտոնի համալսարանի գիտնականներն այլ տեսակետ ունեն ու ենթադրում են, որ նախկին եզրահանգումները լիովին չեն համապատասխանում իրականությանը։ Մասնագետների խոսքով՝ բնական է, որ սուր ինֆեկցիոն հիվանդությունից հետո հակամարմինների քանակությունն օրգանիզմում պետք է որոշակիորեն նվազի, սակայն այն երբեք չի հասնի զրոյի, այլ կպահպանվի որոշակի մակարդակի վրա։ Հետազոտության ընթացքում գիտնականները պարզել են, որ հակամարմիններ արտադրող բջիջները հիվանդության առաջին ախտանշանների ի հայտ գալուց հետո անգամ 11 ամիս անց էլ շարունակում են պահպանվել ու կատարում են իրենց գործառույթները։

Այդ բջիջները, բարեբախտաբար, մնալու են մարդու օրգանիզմում ու հակամարմիններ են արտադրելու հիվանդանալուց հետո ամբողջ կյանքի ընթացքում։ Սա վկայում է, որ COVID-19-ն այնուամենայնիվ հանգեցնում է որոշակի իմունային ռեակցիայի, սակայն այն ոչ միշտ է բավարար լինում կրկնակի վարակումից խուսափելու համար։ Բժիշկների փորձը ցույց է տվել, որ եղել են դեպքեր, երբ մարդը երկրորդ անգամ է վարակվել կորոնավիրուսով։ Ընդ որում՝ եղել են անգամ բաղմաթիվ դեպքեր, երբ երկրորդ անգամ վարակվելուց հետո կորոնավիրուսային հիվանդությունը շատ ավելի ծանր ընթացք և անգամ մահվան ելք է ունեցել։

Նյութի աղբյուրը՝ consumer.healthday.com