Ամենաարդյունավետ բնական միջոցները բրոնխաբորբի բուժման համար․ 6 բաղադրատոմս

Բրոնխաբորբը բրոնխների լորձաթաղանթների բորբոքումն է և մարդու շնչառական համակարգի առավել հաճախ հանդիպող հիվանդություններից մեկը։ Այս հիվանդության դեպքում հարկավոր է դիմել մասնագետին և հետևել նրա ցուցումներին, քանի որ կախված հիվանդության բնույթից բուժումը կարող է տարբեր լինել։

Բրոնխաբորբի բուժման համար մասնագետները հաճախ նշանակում են հակաբիոտիկներ կամ հակավիրուսային դեղեր (կախված է հիվանդության հարուցիչից), սակայն կան նաև շատ արդյունավետ ժողովրդական միջոցներ, որոնք կարող են մեղմել հիվանդության ախտանշաններն ու հիանալի հավելում դառնալ հիմնական բուժմանը՝ արագացնելով ապաքինման գործընթացը։

Aif.ru կայքը ներկայացրել է բրոնխաբորբի բուժման վեց արդյունավետ ժողովրդական միջոց, որոնք հասանելի են և չեն առաջացնում որևէ կողմնակի բարդություն։

• 100 գրամ չամիչը մանրացնել (կարելի է մսաղացով), ավելացնել մի բաժակ ջուր, դնել թույլ կրակին և 10 րոպե եռացնել։ Ստացված եփուկը քամել և ընդունել օրական մի քանի անգամ։
• Հալվե վերայի տերևը մանր կտրատել, ավելացնել 300 գրամ մեղր և կես բաժակ ջուր ու լավ խառնել, այնուհետև խառնուրդը դնել թույլ կրակին ու եփել 2 ժամ։ Ստացված եփուկը լավ խառնել, թողնել սառչի և պահել հով տեղում։ Դեղամիջոցը հարկավոր է ընդունել օրական 3 անգամ մեկական ճաշի գդալ։
• Սև բողկը քերիչով մանրացնել ու հյութը քամել, այնուհետև 250 գրամ հյութին ավելացնել 100 գրամ մեղր ու լավ խառնել։ Ստացված խառնուրդն ընդունել սնվելուց ու քնելուց առաջ երկուական ճաշի գդալ։
• Տևական հազից ազատվելու համար կարելի է խմել եղինջի ծաղիկներով թեյ, որը պատրաստելու համար հարկավոր է մի պտղունց ծաղիկներին ավելացնել 800 մլ եռման ջուր ու թրմել։
• 2 ճաշի գդալ (6 գրամ) տուղտի չորացրած արմատին ավելացնել 200 մլ եռացրած տաք ջուր, 30 րոպե դնել տաք գոլորշու վրա, այնուհետև թողնել սառչի և քամել։ Ստացված թուրմին ավելացնել մի փոքր եռման ջուր, որպեսզի հեղուկը դառնա 200 մլ, այնուհետև  ընդունել տաք վիճակում օրական 3-4 անգամ ½-⅓ բաժակ սնվելուց հետո։
• 1 ճաշի գդալ տատրակի տերևներին ավելացնել 200 մլ եռացրած տաք ջուր ու 15 րոպե դնել տաք գոլորշու վրա՝ անդադար խառնելով թուրմը։ Թողնել թուրմը թրմվի ևս 45 րոպե, որից հետո քամել և ընդունել գոլ վիճակում օրական 2-3 անգամ ½-⅓ բաժակ սնվելուց մեկ ժամ առաջ։

Այս բնական միջոցները շատ պարզ են ու արդյունավետ, սակայն դրանք ոչ մի դեպքում չեն կարող լինել հիմնական բուժմանը փոխարինող միջոց։ Հարկ է հիշել, որ նման միջոցները կարելի է կիրառել միայն մասնագետի հետ խորհրդակցելուց հետո, քանի որ որ առողջական լուրջ խնդիրների և ուժեղ ցավերի դեպքում ինքնաբուժությունը կարող է շատ վտանգավոր լինել ու լուրջ բարդություններ առաջացնել: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: