Որ ախտանշաններն են հուշում զարակերակային ճնշման նվազման մասին և ինչ է հարկավոր անել նման դեպքերում

17:38 • 25.12.22

Զարկերակային հիպոթենզիան կամ հիպոտոնիան ախտաբանական վիճակ է, որը բնորոշվում է զարկերակային ճնշման նվազմամբ (100/60 մմ/սս-ից պակաս)։ Սա կարող է շատ վտանգավոր լինել, սակայն կան որոշակի ախտանշաններ, որոնք թույլ կտան ժամանակին հայտնաբերել խնդիրն ու միջոցներ ձեռնարկել։ Սրտաբան Ռաշիդ Սոնգուրովը gazeta.ru-ի հետ զրույցում անդրադարձել է այս խնդրին՝ ներկայացնելով զարկերակային ճնշման անկման հիմնական ախտանշանները։

«Եթե մարդու ճնշումը նվազել է, նա կարող է գլխապտույտ ու գլխացավեր ունենալ։ Կարող է նկատվել նաև հավասարակշռության կորուստ, սրտխառնոց ու փսխում։ Բացի այդ, հիպոտոնիայի հաճախակի հանդիպող ախտանշանների շարքին են դասվում արտահայտված թուլությունը, նախաուշագնացային վիճակը, հիշողության ու աշխատունակության վատթարացումը։ Ճնշման կտրուկ անկման դեպքում հնարավոր է գիտակցության կորուստ։ Բացի այդ, այս հիվանդության դեպքում հաճախ են նկատվում վերջույթների սառնություն ու ձեռքերի մատների թմրածություն», - նշել է մասնագետը։

Ինչպես ընդգծել է սրտաբանը, ախտանշանների ընդգծվածությունը կախված է լինում զարկերակային ճնշման նվազման աստիճանից։ Բացի այդ, հիվանդի վիճակը վատթարանում է կանգնած ժամանակ և բարելավվում պառկած դիրքով մնալու դեպքում։ Սակայն մասնագետը ոչ մի դեպքում խորհուրդ չի տալիս ստուգել ճնշման տատանումները դիրքը փոխելու միջոցով, քանի որ դա ճիշտ մեթոդ չէ։

Վերոնշյալ ախտանշանների առկայության դեպքում մասնագետը խորհուրդ է տվել հորիզոնական դիրք ընդունել, պառկել մեջքի վրա և ոտքերը մի փոքր վեր բարձրացնել։ Բացի այդ, հարկավոր է ապահովել թարմ օդի հոսքը, անհրաժեշտության դեպքում ազատել հիվանդին նեղ հագուստից, թունդ թեյ տալ և ծածկել տաք ծածկոցով, քանի որ հիպոտոնիան սովորաբար ուղեկցվում է մարմնի ջերմաստիճանի նվազմամբ։