Քրոնիկ հոգնածություն, հևոց և այլն․ որ ախտանշաններն են հուշում սրտամկանի բնածին արատի մասին

17:28 • 14.02.23

Սրտի բնածին արատները դասվում են ամբողջ աշխարհում երեխաների շրջանում ամենատարածված բնածին արատների շարքին: Այս խնդիրները սովորաբար ազդում են այն բանի վրա, թե ինչպես է արյունն անցնում սրտամկանով և շրջանառվում ամբողջ մարմնով:

Սրտի բնածին արատներն ըստ ծանրության կարող է տարբեր լինել՝ համեմատաբար թեթև, աննշան խնդրից մինչև լուրջ հիվանդություն։ Բացի այդ, այն կարող է ախտահարել սրտամկանի ցանկացած հատվածը՝ ներառյալ զարկերակները, փականները, խոռոչները և այլն:

«Սրտի բնածին արատների որոշ ծանր կատեգորիաներ ներառում են փորոքի բացակայությունը, միջնապատի արատը, ընդհատված աորտայի կամարը, Էբշտեյնի անոմալիան, զարկերակային տրանսպոզիցիան և շատ այլ խնդիրներ», - MedikForum-ի հետ զրույցում ասել է վիրաբույժ Եվգենի Շիրյաևը:

Նման խնդիրները կարող են շատ վտանգավոր լինել, ուստի դրանց ախտանշաններն իմանալը կարող է կենսական նշանակություն ունենալ։ Մասնագետի խոսքով՝ այդ ախտանշանները սովորաբար նկատվում են արդեն հասուն տարիքում, մինչդեռ վաղ ախտորոշումը շատ կարևոր է։

Սրտի բնածին արատների մասին հուշող ախտանշանների շարքի են դասվում․

սրտի անկանոն ռիթմը (առիթմիա),
մաշկի, շուրթերի, եղունգների կապտավուն երանգը,
հևոցը,
քրոնիկ հոգնածությունը,
հաճախակի այտուցները։

Հայտնի է, որ սրտի բնածին արատները սովորաբար ժառանգաբար են փոխանցվում, և, հետևաբար, կարող է լինել գենետիկ հիվանդություն: Բացի գենետիկ նախատրամադրվածությունից, դրանց զարգացմանը նպաստող գործոն կարող են դառնալ նաև հղիության ընթացքում կարմրախտով վարակվելը կամ գեստացիոն շաքարային դիաբետը, որը լինում է հղիների մոտ։

Բացի այդ, հղիության ընթացքում ծխախոտի ու ալկոհոլային ըմպելիքների գործածությունը, ինչպես նաև որոշ դեղամիջոցների ընդունումը նույնպես կապված են երեխայի մոտ սրտի արատի զարգացման բարձր ռիսկի հետ, հավելել է բժիշկը: