Կեղծ սեռական խանգարումներ. մասնագետը նշել է՝ որոնք են դրանց պատճառները

13:19 • 22.01.24

Հայ Ամերիկյան Առողջության Կենտրոնի սեքսապաթոլոգ, դոցենտ Սևադա Հակոբյանն անդրադարձել է կեղծ սեռական խանգարումներին և դրանց պատճառներին․

«Կարծեցիալ /կամ կեղծ/ իմպոտենցիան սեքսուալ խանգարում է, որի հիմքում ընկած է նորմալ սեքսուալ ակտիվության և ֆունկցիայի ոչ ճիշտ, սուբեկտիվ գնահատումը: Կեղծ սեքսուալ խանգարումների ժամանակ տուժում է առողջ սեռական դրսևորման սուբյեկտիվ գնահատումը, որը երկրորդային ճանապարհով առաջացնում է տրամադրության անկում, տագնապ ինչպես սեռական հարաբերությունից առաջ,այնպես էլ դրանից հետո: Այս խանգարումները հանգեցնում են սեռական ակտիվության իջեցման և ի վերջո սեքսուալ կյանքից խուսափմանը:

Այս խանգարումների ժամանակ իհարկե, մեծ նշանակություն ունի նաև տեղեկատվական տեխնոլոգիաների միջոցով երիտասարդների՝ սեռակրթության մասին գիտելիքների ստանալը տարբեր լրատվական աղբյուրներից, որը, հնարավոր է, պարունակի նաև դեզինֆորմացիա: Եվ դրանից է, որ սեքսոլոգիայում մենք արձանագրում ենք նույնիսկ պաթոլոգիաներ, հիվանդություններ, որոնք պայմանավորված են սեռական կյանքի մասին ապատեղեկատվությամբ: Այս կամ այն ֆիզիոլոգիական երևույթը, որը կարող է տվյալ տարիքային խմբում դրսևորվել տվյալ երիտասարդի մոտ, և, որը նորմայի սահմանում է, կարող է սխալ ընկալվել և դառնալ սեքսուալ պաթոլոգիայի պատճառ, եթե տվյալ անձնավորությունը չունենա համապատասխան գիտելիքներ՝ ֆիզիոլոգիական երևույթի ճիշտ մեկնաբանման համար, կամ որևէ մի տեղեկատվական աղբյուրից ստանա սխալ պատկերացումներ կամ գիտելիքներ: Հաճախ են հանդիպում նաև մաստուրբացիաների մասին ունացած սխալ պատկերացումների հետևանքով առաջացած սեքսուալ խանգարումները: Օրինակ գոյություն ունեն մաստուրբացիաների տեսաակներ, որոնք համարվում են ֆիզիոլոգիական, և տարիքային որոշ խմբերում ( դեռահասային ) այն դրսևորվում է 90-92% դեպքերում, բայց երիտասարդը, չունենալով համապատասխան գիտելիքներ, կարող է դեզինֆորմացիայի պատճառով սխալ ընկալել և որը հնարավոր է հետագայում առաջացնի հոգեբանական բարդույթներ, վստահության կորուստ, վախ սեռական հարաբերություններից, կանանց մոտ՝ վագինիզմի երևույթներ, էմոցիոնալ պաթոլոգիկ լարվածություն կենակցումից առաջ և այլն: Ինֆորմացիոն աղբյուրների բազմազանության պատճառով ներկայումս նկատվում է վիրտուալ փոխհարաբերությունների աճման տենդենց որոնք, իրենց հերթին սահմանափակելով մարդկանց միջանձնային իրական փոխհարաբերությունները, հետագայում կարող են պատճառ դառնալ նաև սեռական կյանքում սեքսուալ աններդաշնակությունների առաջացման և այլ պաթոլոգիաների ձևավորման համար:

Այս կոնտեքստում մեծ նշանակություն է ձեռք բերում սեքսոլոգիական խորհրդատվությունը, որի ընթացքում բավականին լրջորեն հետազոտվում է պացիենտի հոգեսեռական և մարմնասեռական զարգացման էտապները, պարզաբանվում է բոլոր ֆիզիոլոգիական երևույթների մանրամասները և ևս մեկ երիտասարդ կամ երիտասարդ ընտանիք խուսափում է կեղծ սեռական խանգարման «զոհը» դառնալուց»: