Սեր, թե՞ սիրահարվածություն․ մասնագետը ներկայացրել է հարաբերությունների կառուցման տարբերությունը կանանց ու տղամարդկանց մոտ

12:35 • 14.05.24

Հայ Ամերիկյան Առողջության Կենտրոնի սեքսապաթոլոգ, դոցենտ Սևադա Հակոբյանը ներկայացրել է հիմնական տարբերությունները սիրո ու սիրահարվածության միջև՝ նշելով, թե ինչպես են հարաբերություններ կառուցում կանայք ու տղամարդիկ։

«Սիրահարվելն ավելի շատ տպավորություն ու սպասում է, իսկ սերն արդեն փոխհարաբերություն է, օբյեկտիվության ընդունում:

Հիմնականում կանայք ունեն պլատոնային ուղղվածություն և քանի որ սխալ ընտրության պատճառով ավելի շատ են տուժում, մշտապես զգուշանում են։ Տղամարդիկ ավելի շատ կենտրոնացած են սենսացիաների ու տպավորությունների վրա:

Տղամարդկանցից քչերն են ի սկզբանե հարաբերություններ կառուցում սիրո, ընտանիքի ձևաչափով՝ գիտակցելով նման արարքի կարևորության և պատասխանատվության մասին: Երբ սիրահարվածությանը փոխարինում է սերը, տղամարդը ավելի շատ հոգատարություն է ցուցաբերում և պլանավորում ապագան:

Սիրահարվելու և սիրելու միջև, որպես կանոն, անցնում է մի քանի ամիս: Երբ հարաբերությունները զարգանում են, այդ ժամանակ մարդիկ կապվում են ավելի ու ավելի շատ։ Սկսում են գերիշխել հուզական, նյութական, սեռական և այլ զգացողությունները։ Սակայն այն պարագայում, երբ զգացմունքների տպավորությունները սկսում են թուլանալ, պարզ է դառնում, որ ոչինչ չի կառուցվել։ Այդ ժամանակ սկսվում է հիասթափության փուլը:

Նրանք, ովքեր հարաբերություններ կառուցել գիտեն, գտնվում են մշտական զարգացման և երջանիկ հարաբերությունների մեջ: Նրանք, ովքեր չգիտեն, թե ինչպես ընտրել, զարգացնել և կառուցել փոխադարձ ներդաշնակություն, հաճախ հիասթափվում են և կրկին սխալ ընտրություն կատարում:

Երբեք ուշ չէ սխալները շտկել, նորոգել և ներդաշնակություն մտցնել ձեր հարաբերություններում և ներաշխարհում:

Իրականում սիրահարվածությունից դեպի սեր և հակառակ ուղղին տանող ճանապարհի քարտեզը հենց ձեր ձեռքերում են», - նշել է մասնագետը: