ԱՀԿ-ն, Աֆրիկայում կապիկի ծաղկի նոր համաճարակի ֆոնին, արտակարգ դրություն է հայտարարել․ նոր բռնկումը պայմանավորված է շատ ավելի վտանգավոր հիմնամանրէով

Առողջապահության համաշխարհային կազմակերպությունը (ԱՀԿ) Աֆրիկայում կապիկի ծաղկի համաճարակը հայտարարել է արտակարգ դրություն, որը սպառնում է ամբողջ աշխարհին։ Այս մասին հայտնում է BBC-ի ռուսական ծառայությունը։

Կապիկի ծաղկի բռնկում եղել է նաև 2022-2023 թվականներին, սակայն ներկայիս համաճարակը պայմանավորված է շատ ավելի վտանգավոր հիմնամանրէով (շտամ): Նոր համաճարակը սկսվել է Կոնգոյի Դեմոկրատական Հանրապետությունում տեղի ունեցած բռնկմամբ, որից հետո տարածվել է Կենտրոնական ու Արևելյան Աֆրիկայում։ 

ԱՀԿ ղեկավար Թեդրոս Ադհանոմ Հեբրեյեսուսը հայտարարել է, որ այս տարվա առաջին վեց ամսվա ընթացքում վարակվածների թիվն արդեն իսկ գերազանցել է նախորդ տարի գրանցված դեպքերը, ուստի ինքը, ԱՀԿ արտակարգ իրավիճակների կոմիտեի առաջարկությամբ, նոր համաճարակը «հանրային առողջության ոլորտում միջազգային նշանակության արտակարգ դրություն» է հայտարարում։

«Այս բռնկումը դադարեցնելու և մարդկանց փրկելու համար մեզ անհրաժեշտ է միջազգային հանրության համակարգված արձագանք», - հայտարարել է Հեբրեյեսուսը:

Կապիկի ծաղիկը խիստ վարակիչ վիրուսային հիվանդություն է։ Վիրուսը փոխանցվում է մարդուց մարդուն անմիջական շփման դեպքում, ինչպես նաև օդակաթիլային ճանապարհով, եթե հիվանդը շատ մոտ է գտնվում առողջ մարդուն:

Հիվանդությունն ուղեկցվում է գրիպի նշաններին նմանվող ախտանշաններով, ինչպես նաև մաշկային ցանով և բշտիկներով։ Հարյուրից չորսի դեպքում կապիկի ծաղիկը մահվան ելք է ունենում:

ԱՀԿ-ն հիշեցնում է, որ 2022 թվականի մայիսին այս հիվանդությունն անսպասելի ու կտրուկ տարածվեց Եվրոպայում ու Հյուսիսային և Հարավային Ամերիկաներում, ինչից հետո վարակման դեպքեր սկսեցին գրանցվել ամբողջ աշխարհում։ Նախորդ բռնկման ժամանակ վարակման դեպքեր գրանցվեցին 110 երկրում, վարակվածների թիվը հասավ 87 հազարի, որից 112-ի կյանքը փրկել չհաջողվեց։

Այնուամենայնիվ նախորդ բռնկումը պայմանավորված էր համեմատաբար քիչ վտանգավոր հիմնամանրէով, մինչդեռ ներկայիս համաճարակի պատճառն ավելի վտանգավոր հիմնամանրէն է, որի դեպքում մահացության մակարդակը հասնում է 10 տոկոսի։ Միայն Կոնգոյի Դեմոկրատական Հանրապետությունում այս տարի գրանցվել է կապիկի ծաղկի ավելի քան 13,700 դեպք, մահացել է առնվազն 450 մարդ: ԿԴՀ-ից բացի, վարակման դեպքեր են արձանագրվել նաև Կենտրոնական Աֆրիկյան Հանրապետությունում, Բուրունդիում, Քենիայում, Ռուանդայում և այլ երկրներում:

Արտակագ դրություն հայտարարելով՝ ԱՀԿ-ն ակնկալում է, որ Աֆրիկայից դուրս գտնվող երկրներն ավելի շատ ջանք ու ռեսուրս հատկացնեն հիվանդության ուսումնասիրությանն ու դրա դեմ պայքարին, մասնավորապես՝ պատվաստումներին:

Նշենք, որ Հիվանդությունների վերահսկման և կանխարգելման աֆրիկյան կենտրոններ կազմակերպությունն արտակարգ դրություն է հայտարարել ԱՀԿ-ից մեկ օր շուտ՝ օգոստոսի 13-ին։