Սերժ Սարգսյանի խոսքերն աղավաղվել են. «Ակօսի» գլխավոր խմբագիր

Նախագահ Սերժ Սարգսյանի՝ օրեր առաջ Ծաղկաձորում հայագիտական առարկաների համահայկական օլիմպիադայի մասնակիցների հետ հանդիպման ժամանակ ասած խոսքերն աղավաղված ձևով է ներկայացվել, ինչն էլ իր հերթին դարձել է ապատեղեկատվության պատճառ: Այս մասին ասել է Ստամբուլում լույս տեսնող «Ակօս» շաբաթաթերթի գլխավոր խմբագիր Ռոբեր Քոփթաշը:

Ընդգծելով, որ Սերժ Սարգսյանի խոսքերը պարունակում են ժողովրդավարության և խաղաղության ուղերձ, Ռոբեր Քոփթաշն ասել է. «Սերժ Սարգսյանն իր խոսքում կարևորում է ոչ թե երկրի չափերը, այլ նրա բարեկեցությունը: Իսկ դա խաղաղության ուղերձ է: Մեր կարծիքով` Սարգսյանի խոսքերն աղավաղված ձևով է հրապարակվել: Աշակերտն իր հարցից առաջ խոսում է Տիգրան Մեծ արքայի ժամանակաշրջանի Հայաստանի մասին և հարցնում, թե արդյոք հանարավոր է`իրենք ունենան այդ ժամանակաշրջանի Հայաստանը: Իսկ Սարգսյանն իր պատասխանում նշում է ոչ թե Արարատ լեռը, Արևմտյան Հայաստանը վերցնելու, այլ բարեկեցիկ Հայաստան ունենալու մասին: Նա կարևորում է ոչ թե երկրի մակերեսի չափերը, այլ քաղաքակիրթ երկրների մակարդակին հասնելու հանգամանքը և ընդգծում. «Ահա ձեր սերնդի վրա ընկած պարտականությունը դա է»: Սարգսյանն աշակերտի հարցին պատասխանում է առանց ցնցվելու, շատ հանգիստ տոնով, դիվանագիտական և խաղաղ ուղերձով: Սակայն Սերժ Սարգսյանը չի ասել, թե «Ղարաբաղը մենք վերցրինք, Արարատ լեռն էլ թողնում ենք ձեզ` երիտասարդ սերունդներիդ: Սարգսյանի ուղերձն ամենևին էլ դա չէ»,- ասել է «Ակօսի» գլխավոր խմբագիրը:

Նշենք, որ նախագահ Սերժ Սարգսյանի՝ օրեր առաջ Ծաղկաձորում հայագիտական առարկաների համահայկական օլիմպիադայի մասնակիցների հետ հանդիպման ժամանակ արած հայտարարությունն իսկական իրարանցում է առաջացրել Թուրքիայում:

Այդ հանդիպման մասին հրապարակումներից անմիջապես հետո թուրքական և ադրբեջանական լրատվամիջոցներն սկսեցին լուրեր ատարածել, թե Հայաստանի նախագահն, իբր, բառացիորեն ասել է` «Ղարաբաղը մենք վերցրինք, Արարատ լեռն էլ թողնում ենք ձեզ»:

Սերժ Սարգսյանի հասցեին կոշտ քննադատություններ հնչեցրեց նաև պաշտոնական Անկարան: Բաքվում Թուրքիայի վարչապետ Ռեջեփ Թայիփ Էրդողանը, Սերժ Սարգսյանի խոսքերը որակելով որպես «սադրանք», հայտարարեց, թե Հայաստանի նախագահը «պետք է ներողություն խնդրի թույլ տված սխալի համար»:

«Մեր արտգործնախարարությունը հանդես եկավ շատ կոշտ հայտարարությամբ։ Նման արտահատչաձևը վայել չէ պետական գործչին, երկրի նախագահին։ Ապագա սերունդներին ատելություն սերմանելը վայել չէ պետական գործիչներին։ Սարգսյանի արածը սադրանք է… Ասում է՝ «Ղարաբաղը մենք վերցրինք, Աղրը Դաղըն (Արարատ լեռ,– Tert.am) ձեզ թողեցինք»: Նման դիվանագիտություն չի լինում։ Սարգսյանն այստեղ շատ լուրջ սխալ թույլ տվեց, ինչի համար պետք է ներողություն խնդրի»,- Ադրբեջանի նախագահ Իլհամ Ալիևի հետ համատեղ ասուլիսին ասել էր Էրդողանը:

Անկարայի բարձրացրած աղմուկի առնչությամբ հայտարարությամբ հանդես եկավ Հայաստանի ԱԳ նախարարի տեղակալ Շավարշ Քոչարյանը։ Մեկնաբանելով Թուրքիայի վարչապետի և ԱԳՆ-ի քննադատությունները՝ նա նշել էր, որ Սերժ Սարգսյանի խոսքերի առնչությամբ թուրքերի բարձրացրած հիստերիան շինծու է:

«Ինձ մոտ այնպիսի տպավորություն է, որ թուրքերն ուղղակի չեն կարդացել հարցի ամբողջական պատասխանը կամ պարզապես միահամուռ ասում են այն, ինչ ուզում են ասել` կառչելով խոսքի հատվածներից»,- ասել է Շավարշ Քոչարյանը:

Հիշեցնենք, որ Ծաղկաձորում հուլիսի 23-ին Սերժ Սարգսյանը պատասխանել էր Հայոց լեզվի, գրականության և հայագիտական գիտելիքների համահայկական 5-րդ օլիմպիադայի մասնակիցներին հետաքրքրող հարցերին:

Ի պատասխան մասնակիցներից մեկի այն հարցին, թե «…Մեզ սպասվում է ապագա, որը հիշեցնելու է Բաթումի պայմանագի՞րը, որի ժամանակ մի գերմանացի դիվանագետի վկայությամբ՝ մեզ Սևանում լողանալու տեղ թողեցին, սակայն չորանալու տեղ չթողեցին, թե՞ ապագա, որը մեզ կվերադարձնի Արևմտյան Հայաստանը` Արարատով հանդերձ», Սերժ Սարգսյանը հայտարարել է. «Այդ ամբողջը կախված է քեզնից և քո սերնդից: Իմ սերունդը, կարծում եմ, իր առջև դրած պարտականությունը կատարեց, երբ 90-ական թվականների սկզբներին անհրաժեշտ էր մեր հայրենիքի հատվածներից մեկը` Ղարաբաղը պաշտպանել թշնամիներից, մենք կարողացանք դա անել: Եվ ես սա ասում եմ ոչ նրա համար, որ որևէ մեկին կշտամբեմ: Ուզում եմ ասել, որ յուրաքանչյուր սերունդ իր պարտականությունն ունի, և այդ պարտականությունը պետք է կարողանա կատարել ու՝ լավ կատարել: Եթե դու և քո հասակակիցները ջանք ու եռանդ չխնայեք, եթե ձեզնից ավագներն ու ձեզնից կրտսերները ձեզ նման վարվեն՝ մենք ունենալու ենք աշխարհի լավագույն երկրներից մեկը: Հավատա, որ շատ դեպքերում հողի չափերով չէ երկրի կշիռը որոշվում. երկիրը պետք է լինի ժամանակակից, երկիրը պետք է լինի անվտանգ, լինի բարեկեցիկ, և սրանք այն պայմաններն են, որոնք հնարավորություն են տալիս ցանկացած ժողովրդի նստել աշխարհի հայտնի, ուժեղ, ճանաչված ժողովուրդների կողքին: Բոլորս մեր պարտքը պետք է կատարենք, բոլորս պետք է լինենք ակտիվ, պետք է լինենք աշխատասեր, կարողանանք բարիք ստեղծել: Իսկ մենք դրան կարող ենք հասնել, շատ հանգիստ կարող ենք հասնել, և մեկ անգամ չէ, որ պատմության ընթացքում հասել ենք դրան: Ես դրանում չեմ կասկածում և ուզում եմ, որպեսզի դու էլ չկասկածես: Մենք մի ժողովուրդ ենք, որ, այո՛, փյունիկի պես միշտ հառնում ենք»: