Նախագահական նստավայրի մոտ գազի սակագնի բարձրացման դեմ ակցիան ավարտվեց (տարբերակ 6, լուսանկարներ, տեսանյութ)

ԹԱՐՄԱՑՎՈՒՄ Է


Մի քանի տասնյակ մարդ բողոքի ցույցի են դուրս եկել Կառավարության շենքի դիմաց՝ ընդդեմ գազի սակագինը թանկացնելու վերաբերյալ «ՀայՌուսգազարդ» ընկերության մտադրության:

Ներկա են շարքային քաղաքացիներ, «Հայ Յեղափոխական Դաշնակցություն» կուսակցության անդամ Արմեն Ռուստամյանը, «Բարև Երևան» դաշինքից Գագիկ Բաղդասարյանը, «Հայաստանի սպառողների միության» նախագահ Արմեն Պողոսյանը, բնապահպան ակտիվիստներ:

Կառավարության դիմաց, ուր քիչ հետո տեղի կունենա նորանշանակ կաբինետի նիստը, ցուցարարները պարզել են «Ապահով Հայաստանում գազը թանկացնում եք, որ ի՞նչ անեք», «ՀայՌուսգազարդ+ ՀՀԿ=գենոցիդ», «Գազը թանկացնեք, հարկերը չենք մուծելու», «Մենք մեր ատոմակայանի հոսանքն ենք ուզում», «Գազի գնի բարձրացումը կդառնա վարչախմբի տապալման սկիզբը» և բովանդակությամբ գրություններ։

Հիշեցնենք, որ «ՀայՌուսգազարդը» դիմել էր Հանրային ծառայությունների կարգավորման հանձնաժողով՝ առաջարկելով գազի գործող սակագինը 132 000 դրամից բարձրացնել 221 000 դրամի, այսինքն՝ առաջարկն ընդունվելու դեպքում գազը կթանկանա մոտ 67 տոկոսով` 1000 խորանարդ մետրի դիմաց:


Բողոքի ցույցին ներկա է նաև «ՀՀԿ-ական տատիկը», որն իրարանցում է սարքել. սովորության համաձայն գոռգոռում է՝ «ապահով Հայաստան», հարձակվում ցուցարարների վրա, սակայն որոշ ժամանակ անց նրան ոստիկանները հեռացրեցին:

Ակցիայի մասնակիցները նշում են, որ հավաքն ինքնաբուխ է:

Հիշեցնենք, որ Facebook սոցցանցում ստեղծված «Եկե՛ք կանխենք գազի թանկացումը, միացե՛ք հայեր» խորագրով նախաձեռնությունը ՀՀ քաղաքացիներին կոչ էր անում մայիսի 16-ին՝ առավոտյան ժամը 10-ին, հավաքվել ՀՀ կառավարության շենքի մոտ և բողոքել գազի գինը բարձրացնելու «ՀայՌուսգազարդ» ընկերությունը մտադրության դեմ։

11.01

«Թռչկան» քաղաքացիական նախաձեռնության իրավաբան Մերի Խաչատրյանը նամակ փոխանցեց Կառավարության նամակների ու դիմումների վարչության պետ Ալեքսանդր Ղազարյանին, ով վերցրեց այն, խոստացավ ծանոթանալ բովանդակությանը և հեռացավ:

Քաղաքացիները տեղում կազմակերպել են ստորագրահավաք՝ գազի թանկացման դեմ:

Նշենք, որ այսօր կառավարության դիմաց բողոքի ակցիա են կազմակերպել նաև «Տոնուս քոնսթրաքշն» ընկերությունից տուժած ՀՀ քաղաքացիներ, որոնք պնդում են, որ շինարարական ընկերությանը գումարներ են տվել բնակարաններ ձեռք բերելու դիմաց՝ Դավիթաշեն 4-րդ թաղամասում կառուցվող շենքում բնակարանների համար, սակայն պարզվում է, որ իրենց բնակարանները գրավադրված են «Արցախբանկում»:

11.20

Ցուցարարները պատրաստվում են շարժվել դեպի Սարյան 22, որտեղ գտնվում է Հանրային ծառայությունները կարգավորող հանձնաժողովը: Իսկ ավելի ուշ պատրաստվում են գնալ Բաղրամյան 26՝ նախագահական նստավայր:

12.09
 

Ցուցարարները Կառավարության շենքի դիմացից շարժվեցին դեպի ՀՀ հանրային ծառայությունները կարգավորող հանձնաժողով, որը գտնվում է Սարյան 22 հասցեում։ Այստեղ նրանց դիմավորեց հանձնաժողովի աշխատակազմի ղեկավար Միքայել Սողոմոնյանը, ով լրագրողների և ցուցարարների բազմաթիվ հարցերին ի պատասխան, միայն ասաց, որ իրենք «ՀայՌուսգազարդի» հայտը ստացել են և օրենքով սահմանված կարգով կքննարկեն այն և նոր միայն կպատասխանեն հարցերին։

Նա պնդում էր, որ գազի թանկացման վերաբերյալ դեռ պաշտոնական  հաստատում չկա, այնինչ վարչապետ Տիգրան Սարգսյանն այսօր հայտարարել է, որ պետությունը 30 տոկոսով կսուբսիդավորի անապահով ընտանիքներին։

Միքայել Սողոմոնյանն առաջարկեց, որպեսզի ցուցարարներից 2-3 մարդ ներս մտնեն և  խնդիրը բարձրաձայնեն հանձնաժողովի նախագահին, սակայն ցուցարարները պնդեցին, որ առանց լրագրողների իրենք ներս չեն մտնի ինչին ի պատասխան Միքայել Սողոմոնյանն ասաց, որ շենքային պայմանները թույլ չեն տալիս նման հանդիպում անցկացնել։

Այնուհետև նա խոստացավ բանակցել հանձնաժողովի նախագահի հետ, որից հետո կվերադառնա և կտեղեկացնի բանակցությունների արդյունքների մասին։

Այս պահին բոլորը շենքի մուտքի մոտ սպասում են նրան։

12.42

Հանրային ծառայությունները կարգավորող հանձնաժողովի նախագահի Ռոբերտ Նազարյանն ընդունելով լրագրողներին՝ ասաց, որ «ՀայՌուսգազարդ» ընկերությունը հայտ է ներկայացրել սակագնի վերանայման հետ կապված, որի հիմքն այն է, որ սահմանի վրա գազի գինը ռուսական կողմը սահմանել է 270 դոլար նախկին 170–ի փոխարեն։

«Գազի գինը բարձրանալու է, ես էլ շատ կուզենայի ընդհանրապես չբարձրանար այն, բայց, իհարկե, բարձրանալու է, իսկ թե ինչ չափով, դա է հիմա քննարկվում»,– ասաց նա՝ նշելով, որ իրենք կսկսեն հանրային լսումներ, որոնք կլինեն բաց բոլորի համար։

«Թռչկան» քաղաքացիական նախաձեռնության իրավաբան Մարիամ Խաչատրյանի հարցին ի պատասխան՝ Հանրային ծառայությունները կարգավորող հանձնաժողովի նախագահի տեղակալ Շիրազ Կիրակոսյանն ասաց, որ գներն, իհարկե,կարող են ազդեցությունն ունենալ տնտեսության տարբեր ոլորտների վրա։

«Իսկ թե մեր բնակչությունը պատրա՞ստ է դրան, թե ոչ, ես չեմ կարող պատասխանել»,– ասաց նա՝ ընդգծելով, որ իրեն որևէ մեկը թույլ չի տա ավելին անել, քան օրենքով սահմանված իր լիազորություններն են։

Իսկ հարցին, թե արդյոք սոցիալական վիճակը հաշվի է առնվո՞ւմ, թե ոչ, նա ասաց, որ դա, իհարկե, բոլորին հետաքրքրում է, բայց դրա համար կան համապատասխան կառույցներ։

13։58

 Նախագահական նստավայրի մոտ գազի գնի թանկացման դեմ ակցիան ավարտվեց։ Ցուցարարները իրենց բողոք-նամակը փոխանցեցին նախագահ Սերժ Սարգսյանին և հեռացան։

Ակտիվիստներից Անի Դաղինյանը նամակը փոխանցելուց հետո հայտարարեց, որ իրենք պատրաստվում են աշխատանքային խումբ ստեղծել, որը կփորձի պարզել, թե որքանով է հիմնավոր գազի գնի թանկացումը։