Հայաստանի ԱԳՆ-ն չի քննարկում Կահիրեից ՀՀ դեսպանատան աշխատակիցներին հետ կանչելու հարցը. ԱԳՆ խոսնակ

Եգիպտոսում զանգվածային բնույթ ստացած քաղաքացիական բախումների պատճառով Կահիրեում Հայաստանի Հանրապետության դեսպանատան աշխատակիցներին հետ կանչելու հարց Հայաստանի արտգործնախարարությունում չի քննարկվել: Այս մասին Tert.am-ին հայտնեց ՀՀ արտգործնախարարության խոսնակ Տիգրան Բալայանը:

Հիշեցնենք, որ չորեքշաբթի օրվանից սկիզբ առած բախումների հետևանքով, ըստ «Մուսուլման եղբայրների» տարածած հաղորդագրության, զոհվել է 3.000 մարդ։ Սակայն երկրի առողջապահության նախարարության տվյալներով՝ զոհվածների թիվը 638 է։

Նշենք նաև, որ պաշտոնից հեռացված նախագահ Մուհամեդ Մուրսիին աջակցող «Մուսուլման եղբայրներ» շարժումը, որը ցանկանում է հետ բերել իշխանությունը, կոչ է արել երկրում «ցասման ուրբաթ» իրականացնել:

Տիգրան Բալայանի խոսքով՝ արտգործնախարարության նախնական տվյալներով, Եգիպտոսում բնակվում է մոտ 400 երկքաղաքացիներ, այդ թվում՝ ՀՀ քաղաքացիներ:

Հիշեցնենք, որ Եգիպտոսում հայերը դարեր ի վեր բնակվում են և հիմնականում կենտրոնացած են երկու խոշոր քաղաքներում` Կահիրեում և Ալեքսանդրիայում, որոնցում, ըստ ՀՀ ԱԳՆ պաշտոնական կայքի, Կահիրեում կա 4000, իսկ Ալեքսանդրիայում՝ 2000 հայ:

Հայերի հիմնական միգրացիան դեպի Եգիպտոս սկսվել է 19-րդ դարասկզբին, չնայած այն փաստին, որ դեռևս 11-րդ դարի վերջերին Եգիպտոսում բնակվում էր 300.000 հայ և ունեին 37 գործող եկեղեցի: Հայերը պահպանել են հայերենը, ունեն դպրոցներ, եկեղեցիներ և սոցիալական բնութագիր:

«Ինչ վերաբերում է զբոսաշրջիկներին, ապա հիմա փորձում ենք տուրօպերատորներից ճշտել հստակ թիվը, թե քանի ՀՀ քաղաքացի է գտնվում Եգիպտոսում»,- ասաց ԱԳՆ խոսնակը:

Հիշեցնենք, որ ՀՀ ԱԳՆ-ն ամռան սկզբին հանդես եկավ կոչով՝ ձեռնպահ մնալ Եգիպտոս՝ զբոսաշրջային նպատակով այցելություններից, իսկ մի քանի օր անց հայտարարվեց թեժ գծի հեռախոսահամարը, որը գործում է Կահիրեում ՀՀ դեսպանատանը:

Ըստ Տիգրան Բալայանի ամփոփման՝ այս ընթացքում չի եղել դեպք, երբ մարդիկ ցանկացել են վերադառնալ, սակայն նրանց չի հաջողվել:

Օրերս իր քաղաքացիներին նման կոչ է ուղղել նաև ՌԴ արտգործնախարարությունը, նշելով, որ բացի զանգվածային անկարգություններից՝ Եգիպտոսում ավելացել են հանցագործությունների թիվը և հարձակումները ինչպես քրիստոնեական տաճարների, այնպես էլ մզկիթների վրա:

Ինչպես Tert.am-ի հետ զրույցում նշեց եգիպտահայ համայնքից քաջատեղյակ անձը, ի տարբերություն սիրիահայերի, որոնք հիմնականում պաշտպանում էին Բաշար ալ Ասադին, եգիպտահայերը կատարյալ չեզոքություն են պահպանում «Մուսուլման եղբայրների» և զինվորականների հարցում:

Նշենք, որ նախկինում Երևանի պետական համալսարանի Արևելագիտական ֆակուլտետի ուսանողները շատ հաճախ վերապատրաստում էին անցնում Եգիպտոսում, սակայն ներկա պահին Հայաստանը Եգիպտոսում ուսանողներ չունի:

«Արդեն 1,5 տարի է՝ մենք Եգիպտոս ուսանողներ չենք ուղարկում, չե՞ ք տեսնում՝ ի՞նչ է կատարվում, միայն երեկ 500 մարդ է զոհվել»,- Tert.am-ի հետ զրույցում պատճառների մասին տեղեկացրեց ԵՊՀ Արևելագիտության ֆակուլտետի դեկան Գուրգեն Մելիքյանը:

«Արահետ թրեվլ» հոգևոր-զբոսաշրջային ընկերության տնօրեն Լիլիթ Սարգսյանը Tert.am-ի հետ զրույցում ասաց, որ կոնկրետ իրենց ընկերությունը Եգիպտոսի ուղղությամբ զբոսաշրջիկներ չի ուղարկել և չունի:

Նույնը հայտնեց «Սպուտնիկ» ընկերության տուրօպերատորը, որ ի պատասխան հարցին, թե չե՞ն ուզում, ասաց. «Ո՛չ, որովհետև մենք խորհուրդ չենք տալիս, իսկ հիմա՝ ընդհանրապես»:

Ւսկ «Արենի» տուրիստական ընկերությունից, որը ևս Եգիպտոսում զբոսաշրջիկներ չուներ, հայտնեցին, որ նախ՝ Հայաստանից Եգիպտոս ինքնաթիռը հանվել է, և ցանկացողները մեկնում են Վրաստանից, երկրորդ, որ այնտեղ հազիվ թե զբոսաշրջիկներ լինեն՝ հաշվի առնելով, որ «սեզոն չէ», այսինքն՝ 40 և ավելի աստիճան է: