Կուտակայինի պարտադիր բաղադրիչը 1 տարով հետաձգելն իրավիճակային լուծում կլինի. Արմեն Մարտիրոսյան

Tert.am-ի հետ զրույցում «Ժառանգություն» կուսակցության փոխնախագահ Արմեն Մարտիրոսյանն անդրադարձել է հնարավոր սցենարին, որ իշխող կուսակցությունը երկրում առկա լարվածությունը ժամանակավորապես թուլացնելու համար մեկ տարով կհետաձգի պարտադիր կուտակային կենսաթոշակային համակարգի պարտադիր բաղադրիչը։ Ըստ նրա, եթե դա այդպես լինի էլ, որևէ բան չի փոխելու: Անդրադառնալով «Ազատության հրապարակում» մարտի 1-ի «Հայ ազգային կոնգրեսի» կողմից հրավիրվելիք հանրահավաքին՝ Արմեն Մարտիրոսյանը նշում է, որ քանի որ «Մարտի 1-ը» բոլորինն է՝ և՛ որպես ցավ, և ինչ-որ չափով նաև՝ հպարտություն, «Ժառանգությունը» ևս լինելու է Ազատության հրապարակում:

-Պարո՛ն Մարտիրոսյան, «Հայկական ժամանակը» գրում է, որ ՀՀԿ վերնախավում քննարկվում է այս տարվա հունվարի 1-ից գործողության մեջ մտած կենսաթոշակային նոր համակարգի պարտադիր կուտակային բաղադրիչի ներդրումը գոնե մեկ տարով հետաձգելու տարբերակը։ Հավանական համարո՞ւմ եք նման սցենարը:

- Այդքան էլ չէ: Որովհետև այդ գումարները ի սկզբանե պետք է պետական բյուջե ուղղվեն պետական պարտատոմսերի տեսքով և պարզ է, որ խնդիր ունեն…

-Գուցե կան այլընտրանքային միջոցներ: Երեկ վարչապետն օրինակ՝ խոսեց Ռուսաստանի կողմից Հայաստանին դրամաշնորհ տալու մասին:

- Ես դրան չեմ հավատում, ես իշխանությունների ոչ մի խոսքին չեմ հավատում, հատկապես գազի հայտի այդ պայմանավորվածություններից հետո, երբ 3 տարի թանկացած է եղել և բոլորը ստում էին բառիս բուն իմաստով, որ գազը չի թանկանալու, պայմանավորվենք, բանակցենք, վերջացնենք, կասենք: Բայց պարզվում է՝ արդեն այդ ժամանակ են պայմանավորված եղել: Էլ մնացածի մասին չեմ խոսում.«Ազատ, արդար, թափանցիկ» ընտրություններ, արդարադատության համակարգ, կոռուպցիայի դեմ պայքար:

-Այնուամենայնիվ, եթե հետաձգելու մասին քաղաքական որոշում կայացվի՞:

- Մեկ տարով հետաձգելը խնդիրը լուծո՞ւմ է, իհարկե ոչ: Ասենք թե մի քանի ամիս է՝ տրանսպորտի ուղեվարձի ավելացումը հետաձգվում է, քանի որ անընդհատ լարվածությունն ավելանում է, ևս մի օջախ չեն ուզում ստեղծել: Բայց դրանով, կրկնում եմ, ոչ մի խնդիր չի լուծվում ու պարզ է՝ վաղ թե ուշ բարձրացնելու են: Այնպես որ, ժամանակավոր, իրավիճակային փոփոխությունները որևէ լուծում չեն տա:

-Եթե նման որոշում կայացվի, ապա ի՞նչ եք կարծում դա մարտի 27-ին կկատարվի Սահմանադրական դատարանի միջոցո՞վ, երբ նախատեսված է օրենքի՝ Սահմանադրությանը համապատասխանելու հարցը:

-Պարտադիր ինքը մի վերաբերմունք պետք է արտահայտի: Բայց չգիտեմ ինչպես, որովհետև ինքը պետք է քննի սահմանադրականության վերաբերյալ հարցը, ոչ թե հետաձգման: Ինքը չի կարող ասել՝ սահմանադրական է, բայց մի տարով հետաձգում է: Սահմանադրական դատարանն ընդամենը մեկ բան պետք է ասի՝ սահմանադրակա՞ն է, թե՞ ոչ, սա բխո՞ւմ է մեր Սահմանադրությունից: Իսկ հետաձգումը հնարավոր է անել Ազգային ժողովի միջոցով, որը մերժեց ԱԺ 4 ուժերի առաջարկը:

-Բայց Սահմանադրական դատարանն ունի լայն մեկնաբանություններով ինչ-որ նախադեպային իրավունքի պրակտիկա սահմանելու ավանդույթ:

-Դե Հայաստանի պարագայում, եթե պատվեր իջնի Բաղրամյան 26-ից, պարզ է, որ ինչ-որ բան կգրեն: Բայց նորից եմ կրկնում՝ դա խնդրի լուծում չէ, դա ընդամենը խնդիրը հետաձգել է:

- Վաղը չէ մյուս օրը մարտի մեկն է, «Ժառանգության» առաջնորդ Րաֆֆի Հովհաննիսյանը Գյումրիում հայտարարել է, որ մարտի 1-ին կուսակցությունը ձեռքերը ծալած չի նստելու ու ասել է՝ միացյալ հրապարակ: Ի՞նչ ձևաչափով եք Դուք,  Րաֆֆի Հովհաննիսյանը, «Ժառանգությունը» մասնակցելու Ազատության հրապարակում «Հայ ազգային կոնգրեսի» հրավիրած միջոցառմանը:

- Րաֆֆի Հովհաննիսյանը հայտարարել է, որ ինքը մասնակցելու է, և ինչպես միշտ, միասնության կողմնակից է, մարտի 1-ին ևս մասնակցելու է՝ այդ միասնականությունը հրապարակում ապահովելու համար։ Ես ինքս մասնակցելու եմ, և կարծում եմ, որ «Մարտի մեկը» որևէ քաղաքական ուժի մենաշնորհը չէ, «Մարտի մեկը» բոլորինս է: Բոլորիս ցավն է ու միաժամանակ՝ հպարտությունը, որ մեր ժողովուրդն ընդունակ է պայքարելու: Եվ պետք է նշեմ, որ հենց «Ժառանգությունն» էր, որ ի սկզբանե ժողովրդի հետ էր, ժողովրդի մեջ էր, կողքին և այդպես էլ միշտ լինելու է: Եվ ինչպես ցանկացած մարտի 1-ին եղել ենք ժողովդի մեջ, այնպես էլ այս մարտի 1-ին ենք լինելու: