ԴԱՀԿ-ն ՃՈ դիմումով՝ առանց դատարանի վճռի, սառեցնում է վարորդների հաշիվները՝ նոր օրենքից ելնելով. ՄԻՊ-ն այս հարցով կդիմի ՍԴ

Վերջին շրջանում մի շարք վարորդներ, այդ թվում հանրության կողմից ճանաչում ունեցող անձինք՝ հաղորդավար Պետրոս Ղազարյանը, շոումեն Գարիկ Պապոյանը, երգիչ Նարեկ Բավեյանը բարձրաձայնեցին այն մասին, որ երթևեկության կանոնները խախտելու մասին ժամանակին չեն ստացել ծանուցում, սակայն ամիսներ անց տեղեկացել են, որ Դատական ակտերի հարկադիր կատարման ծառայության կողմից (ԴԱՀԿ) իրենց բանկային հաշիվները սառեցված են`վարչական տուգանքը չվճարելու պատճառով: 

Մարդու իրավունքների պաշտպանի խորհրդական Տաթևիկ Խաչատրյանն այս կապակցությամբ Tert.am-ին ասաց, որ 2014թ-ի սկզբից ուժի մեջ մտած օրենքով՝ վարչական մարմինը՝ այս դեպքում ոստիկանությունը, իր վճարման կարգադրությունը ընդունելիս, շրջանցում է դատարանը և միանգամից գործը հայտնվում է ԴԱՀԿ-ում։

Ճանապարհային ոստիկանության պետի տեղակալ, ոստիկանության փոխգնդապետ Արմեն Խաչատրյանը Tert.am-ի հետ զրույցում հարցի շուրջ տվեց պարզաբանումներ և նշեց, որ թեև նման խնդրի հանդիպած վարորդները քիչ չեն, բայց ՃՈ-ն այս հարցում որևէ մեղավորություն չունի, քանի որ օրենքով սահմանված կարգով ծանուցում է վարորդներին իրենց տուգանքների մասին:

«Եթե վարորդներն իրենց իսկ կողմից նշված հասցեով չեն բնակվում կամ ՀՀ-ում չեն գտնվում, ի՞նչ մեղք ունի այստեղ Ճանապարհային ոստիկանությունը: Պրակտիկորեն անհնար է գտնել բոլոր վարորդներին ու նամակները հանձնել իրենց: Եթե վարորդի կողմից կատարված խախտումը արձանագրվում է տեսախցիկի ու արագաչափի կողմից, ապա որոշում կայացնելուց հետո եռօրյա ժամկետում փոստային ծառայությունների միջոցով վարչական ակտը ուղարկում ենք հասցեատիրոջը՝ այսինքն խախտում կատարած անձին: Փոստային ծառայությունը երկու անգամ տանում է նամակը հասցեով, հետո ծանուցում է թողնում, հետո որոշ ժամանակ նամակը թողնում է փոստային բաժանմունքում, այնուհետև ակտը հետ են ուղարկում մեզ: Նման դեպքում մենք նշում ենք անում մեզ մոտ, որ վարորդը չի ծանուցվել, որպեսզի հետագայում վարորդը չմուծի եռապատկված կամ հնգապատկված չափով»,-ասաց նա:

Պարզելու, թե այս ընթացքում քանի՞ վարորդի բանկային հաշիվ է սառեցվել, Tert.am-ը գրավոր հարցում ուղարկեց ԴԱՀԿ, որտեղից էլ խոստացան օրենքով սահմանված 5-օրյա ժամկետում պատասխանել:

Այդուհանդերձ, ՃՈ պետի տեղակալը նշեց, որ վարորդը իրազեկված է համարվում այն ժամանակ, երբ վարչական ակտը ստանալիս ստորագրում է, իսկ տանը բնակվող այլ անձինք, որոնք չունեն լիազորագիր, չեն կարող վարորդի փոխարեն ստանալ այն: Միաժամանակ տեղեկացրեց, որ Վարչական օրենսգրքի 283 հոդվածի համաձայն՝ վարորդը իրազեկված է համարվում նաև այն դեպքերում, երբ առաքումը կատարվել է այն հասցեով, որ հասցեն քաղաքացին նշել է մեքենայի գրանցման կամ վարորդական իրավունքը ստանալու ժամանակ:

«Եթե փոստային ծառայությունը մի քանի անգամ փորձում է վարորդին ծանուցել, սակայն վարորդը տանը չի լինում, անձը համարվում է ծանուցված, անկախ այն հանգամանքից՝ նամակը ստորագրվե՞լ է, թե ոչ: Ծանուցում է համարվում նաև այն, երբ վարորդը հրաժարվում է ստորագրել: Այդ մասին փոստային ծառայությունը աշխատողը նշում է անում»,-ասաց նա:

Արմեն Խաչատրյանը հիշեցրեց, որ ի վերջո ոստիկանության կայքում՝ police.am-ում տեղադրվում է բոլոր վարչական ակտերի մասին տեղեկատվությունը, և ցանկացած վարորդ կարող է պարբերաբար ստուգել՝ արդյո՞ք ինքը տուգանքներ վճարելու պարտավորություն ունի, թե ոչ:

«Վարչական ակտը կազմելուց հետո երեք օրվա ընթացքում տեղադրվում են բոլոր ակտերը՝ անկախ հանգամանքից անձը ծանուցվե՞լ է, թե ոչ: Սա լրացուցիչ միջոց է վարորդներին իրազեկելու: Բայց կայքում տեղադրված լինելը մեզ համար հիմք չէ, որ համարենք անձին ծանուցված և գումարը հետագայում եռապատկենք կամ հնգապատկենք»,-ասաց նա և նշեց, որ եթե անձը տարբեր պատճառներով չի ծանուցվել, ապա իրենք ընդառաջում են, հետ կանչում ԴԱՀԿ-ից իրենց պահանջը և թույլ տալիս վճարել միայն տուգանքի մայր գումարը:

Ճանապարհային ոստիկանության պետի տեղակալը հորդորեց բոլոր վարորդներին՝ օգտվել էլեկտրոնային տարբերակից ևս և ընդգծեց, որ տուգանքների մասին ծանուցվելու համար վարորդը պարտավոր է տալ այնպիսի հասցե, որտեղ հնարավոր լինի իրեն գտնել:

Մարդու իրավունքների պաշտպանի խորհրդական Տաթևիկ Խաչատրյանը նշեց, որ խնդրի հետ կապված իրենք ստացել են դիմումներ և պարզել ոլորտում առկա երկու կարևոր խնդիր: Դրանցից մեկը կապված է «Վարչական իրավախախտումների մասին» օրենսգրքի վերջին փոփոխությունների հետ, որոնք մտել են ուժի մեջ 2014թ-ի սկզբից:

«Եթե նախկին գործող կարգի համաձայն վարչական մարմինը կայացնում էր անձին տուգանելու մասին որոշում՝ այսինքն կազմում էր ակտ, և անձը չէր մուծում սահմանված ժամկետում, այն ուղարկում էր դատարան: Դատարանի որոշման հիման վրա ԴԱՀԿ ծառայությունը համապատասխան միջոցներ էր կիրառում՝քաղաքացուն ստիպելով վճարել: Ներկայումս վարչական մարմինը՝ այս դեպքում ոստիկանությունը, իր վճարման կարգադրությունը ընդունելիս, շրջանցում է դատարանը և միանգամից գործը հայտնվում է ԴԱՀԿ-ում: Սա մեր կարծիքով խնդրահարույց է Սահմանադրության տեսակետից»,-ասաց նա և հիշեցրեց, որ Սահմանադրությունը ամրագրում է անձի սեփականության անձեռնմխելիության իրավունքը, և սեփականության տնօրինումը սահմանափակելը միայն դատական կարգով պետք է իրականացվի, իսկ անձի դրամական միջոցները բանկում հենց անձի սեփականությունն են:

Տաթև Խաչատրյանը նաև ընդգծեց, որ երբ շրջանցվում է դատարանը, անձը զրկվում է իր իրավունքները դատարանում պաշտպանելու և բողոքարկելու իրավունքից:

«Մենք առաջիկայում պատրաստվում ենք դիմել Սահմանադրական դատարան՝ հարցի սահմանադրականությունը վիճարկելու համար»,-ասաց նա:

Առկա մյուս խնդիրը, ըստ ՄԻՊ խորհրդականի, այն է, որ ոստիկանությունը ծանուցումները պատշաճ չի կատարում՝ տարբեր պատճառներով:

«Նրանք հիմնավորում են, որ քաղաքացին սխալ հասցե է ներկայացրել և այդ սխալ նամակը ուղարկելուց հետո, համարում են, որ քաղաքացին ծանուցված է: Ոստիկանությունը պետք է հետևողական լինի, որ անձը իսկապես ծանուցվի: Այս մասին պաշտպանը հայտարարությամբ է հանդես եկել և հորդորել ոստիկանությանն ավելի էֆեկտիվ կիրառել գործող ծանուցման միջոցները, իսկ անհրաժեշտության դեպքում՝ նոր միջոցներ կիրառել»,-ասաց նա և ընդգծեց, որ անհրաժեշտ է ուժեղացնել ծանուցման ինստիտուտը: