ԱԺ նոր կանոնակարգով կփոխվի կառավարության հետ հարցուպատասխանի ֆորմատը, կերկարի նիստերի տևողությունը. Հ. Սահակյան (տեսանյութ)

ԱԺ կանոնակարգի նոր օրենքի մշակումն ավարտվել է, այն պատրաստ է: Tert.am-ի հետ զրույցում այս մասին ասաց ԱԺ պետաիրավական հարցերով մշտական հանձնաժողովի նախագահ Հովհաննես Սահակյանը՝ նշելով, որ նոր փաստաթուղթն ուղարկված է խորհրդարանական բոլոր խմբակցություններին: Սահակյանը նշեց, որ առաջարկված կանոնակարգի համաձայն ԱԺ-ն կաշխատի բավական ծանրաբեռնված գրաֆիկով: Կփոխվի կառավարության հետ հարց ու պատասխանի ֆորմատը, ըստ որի՝ գրավոր հարցերն այսուհետ ԱԺ ամբիոնից չեն հնչի, իսկ ժամային սահմանափակում չի լինի: Այսինքն՝ գրանցված բոլոր պատգամավորները կհնչեցնեն իրենց հարցերը, և նիստը կփակվի միայն բոլոր հարցրի պատասխանները լսելուց հետո: Նույնը, Հովհաննես Սահակյանի փոխանցմամբ, կգործի նաև ԱԺ հայտարարությունների համար. գրանցված բոլոր պատգամավորները հայտարարություն կանեն:

-Ի՞նչ փուլում է ԱԺ կանոնակարգ նոր օրենքի մշակումը:

- ԱԺ կանոնակարգ օրենքն արդեն իսկ պատրաստ է: Նախագծի նախնական տարբերակը մենք տրամադրել ենք բոլոր խմբակցություններին, հանձնաժողովներին, որ մեր գործընկերները ծանոթանան նախնական տարբերակին, առաջարկություններ անեն, որպեսզի ևս մեկ անգամ լրամշակվի, ապա դրվի շրջանառության մեջ:

- Բոլոր խմբակցություններին եք ուղարկե՞լ:

- Բոլոր խմբակցություններին, բոլոր հանձնաժողովներին անխտիր ուղարկել ենք: Մենք այս ընթացքում քննարկումներ ենք ունեցել Նախագահի հրամանագրով ձևավորված Սահմանադրական բարեփոխումներին աջակցող հանձնաժողովում:

- Խմբակցություններից արձագանք կա՞:

- Անհատ պատգամավորներից ունենք բազմաթիվ արձագանքներ, ընդդիմադիր խմբակցությունների մեր գործընկերները ևս արձագանքել են: Կարծում եմ, որ նախնական փուլում խմբակցություն առ խմբակցություն կքննարկվի օրենքը, որովհետև այն բավական բարդ է, ու իմ խորին համոզմամբ՝ հենց Սահմանադրությունից հետո ամենակարևորը ԱԺ կանոնակարգ օրենքն է, որովհետև խորհրդարանական կառավարմամբ պետության պարագայում ընթացակարգային այլ գործընթացներ կարգավորվելու են այստեղ: Կարևոր է, որ բոլոր խմբակցությունները քննարկեն, մասնակից դառնան:

- Դժգոհություններ կա՞ն նախնական կանոնակարգի վերաբերյալ:

- Այս փուլում դեռևս չասեմ՝ կան դժգոհություններ, թե բավարարված են, որովհետև խիստ նախնական քննարկումներ են: Մենք էլ քննարկում ենք: Երբ կհասնենք այն փուլին, որ կընդունենք կամ կմերժենք որևէ առաջարկ, այն ժամանակ կերևա դժգոհությունը:

- Պարո՛ն Սահակյան, նոր կանոնակարգը շա՞տ է տարբերվելու նախորդից: Առանցքային ի՞նչ փոփոխություններ են լինելու:

- Նախ ասեմ, որ կառուցվածքի առումով բավական փոփոխություններ են եղել, դարձել է բավական մատչելի օգտագործման առումով: Ներկայիս ԱԺ կանոնակարգ օրենքը լաբիրինթոսի է նման, որ մտնում ես, էլ չես կարողանում հարցիդ պատասխանը գտնել: Բովանդակային առումով մեծ փոփոխություններ կան, որովհետև մշակվել է նոր Սահմանադրության դրույթների հիման վրա: Սկսած ԱԺ մարմիններից, նրանց գործառույթներից, մինչև ԱԺ աշխատանքների կազմակերպման ձևեր:

- Մի փոքր կբացե՞ք փակագծերը:

- Օրինակ, ստեղծվել է ԱԺ խորհուրդ, որը մի շարք գործառույթներ կիրականացնի: Այն ձևավորված է խմբակցությունների ղեկավարներից, հանձնաժողովի նախագահներից, ԱԺ նախագահից ու տեղակալներից: Քննիչ հանձնաժողով կա, որը բավական լուրջ գործառույթ ունեցող մարմին կլինի: Տարբեր երկրներում քննիչ հանձնաժողովներն անվանվում են ընդդիմության ձեռքի թուր: Վերահսկողական ֆունկցիաներն են տարբեր: Գիտենք, որ պետական պաշտոնների նշանակումը ԱԺ կողմից է լինելու այսուհետ: Սա բավական լուրջ առաջընթաց է: Այսուհետ, թեկնածուներ առաջադրելու իրավունքը վերապահվում է բոլոր խմբակցություններին՝ անկախ նրանից ընդդիմադիր է, թե իշխանական: Հետևաբար, ընդդիմության դերակատարումը բավականին մեծանում է: Կարծում եմ, որ մինչև մյուս շաբաթվա վերջ կունենանք ավելի բովանդակային, բաց քննարկում:

- Նախորդ նստաշրջանում դժգոհություններ կային կառավարության հետ հարցուպատասխանի վերաբերյալ: Ընդդիմությունն ասում էր, որ գործադիր մարմնին ուղված գրավոր հարցերի վերընթերցումը դահլիճից թույլ չի տալիս իրենց ավելի շատ հարցեր ուղղել: Այս առումով փոփոխություններ կա՞ն:

- Այս առումով մենք ամրագրել ենք հետևյալ սկզբունքը. գրավոր հարցերը չեն հնչեցվում ԱԺ-ում: Ամենակարևորը, որ հաջորդականության սահմանումը ևս փոխվել է: Մենք առաջարկել ենք էլեկտրոնային գրանցումից հետո առաջին հարցի իրավունքը տալ ընդդիմությանը, ապա իշխանությանը և հերթափոխ սահմանել, ըստ հերթագրման, ընդդիմություն հետո իշխանություն, հետո նորից ընդդիմություն, հետո իշխանություն և այսպես շարունակ: Կարծում եմ, որ սա բարելավում է:

Եվս մեկ նորամուծություն կա՝ հայտարարությունների ժամի ու հարց ու պատասխանի ժամերի առումով, որ մինչև վերջին հերթագրվածը իր հայտարարությունը չանի կամ հարցը չհնչեցնի, նիստը փակված չի համարի: Այսինքն՝ բոլոր հերթագրվածները, անկախ քանակից, իրենց հարցը տալու են կամ հայտարարությունը հնչեցնելու են:

- Այսինքն՝ նիստերի օրերը երկարելո՞ւ են, հնարավոր է, որ քառօրյան դառնա հնգօրյա՞:

- Այո, հնարավոր է, մենք ավելի ինտենսիվ ենք աշխատելու: Քանի որ խմբակցություններն ավելի մեծ իրավունքներով, լիազորություններով են օժտված լինելու, ապա նաև որոշակի շաբաթների ընթացքում խմբակցությունները պետք է պարտադիր նիստ անեն, որ որոշումները լինեն լեգիտիմ: Ուստի գալիք ԱԺ-ում բավական ինտենսիվ աշխատանք է սպասվում: Բավական զբաղված գրաֆիկ, բավական երկարատև ժամանակով: Աշխատանքն էլ, կարծում եմ, շուտ կսկսենք, հավանաբար, 10:00-ից, նիստերն էլ երկու օրը կերկարաձգվեն:

Մանրամասները` Tert.am-ի տեսանյութում.