ԲՀԿ-ն, ՀՎ-ն և ԼՀԿ-ն Վանաձորում ստորագրել են համագործակցության հուշագիր Քրիստ Մարուքյանին սատարելու մասին

Վանաձորի Լոռի TV –ում քիչ առաջ ստորագրվել  է Վանաձորում «Բարգավաճ Հայաստան», «Հայկական վերածնունդ» և «Լուսավոր Հայաստան» կուսակցությունների համագործակցության հուշագիր, որի կետերից մեկը Վանաձորի նորընտիր ավագանու անդրանիկ  նիստին  ԼՀԿ ավագանու  ցուցակը գլխավորող համայնքի ղեկավարի թեկնածու Քրիստ Մարուքյանին պաշտպանելու մասին է:

Հուշագրին միացել են հոկտեմբերի 2-ին Վանաձորի քաղաքապետի ընտրություններում քաղաքապետարան մտած երեք ուժերի ավագանիները` ողջ կազմով և ԱԺ պատգամավորներ. ԲՀԿ-ից`  Վահե Էնֆիաջյանը և Գրիգոր Գրիգորյանը (նախկին ԱԺ պատգամավոր, Ներքին զորքերի նախկին հրամանատար «Շերիֆ»), «Հայկական վերծնունդ»-ից` Մհեր Շահգելդյան, Լևոն Դոխոլյան, «Լուսավոր Հայաստանից»` Էդմոն Մարուքյանն ու Մանե Թանդիլյանը: Այս մասին Tert.am-ին հայտնեց ԲՀԿ-ական պատգամավոր Վահե Էնֆիաջյանը` ներկայացնելով հուշագրի հիմնական կետերը:

«Վանաձորի զարգացման 5-ամյա ռազմավարական պլանի կառուցում` արդյունավետ կառավարման լավագույն սկզբունքների հիման վրա, Վանաձորի նորընտիր ավագանու անդրանիկ նիստին միասնաբար պաշտպանելու ԼՀԿ ավագանու ցուցակը գլխավորող համայնքի ղեկավարի թեկնածու Քրիստ Մարուքյանին, Վանաձորում իրականացնել թափանցիկ, հաշվետու կառավարում, որը կերաշխավորի քաղաքի զարգացումը կբացառի կոռուպցիոն ռիսկերը»,- հիմնական կետերը ներկայացրեց Վահե Էնֆիաջյանը:

Հիշեցնենք, որ Վանաձորի նորընտիր ավագանու առաջին նիստը նշանակված է հոկտեմբերի 10-ին` երկուշաբթի և սա, թերևս, ամենաինտրիգային նիստն է, եթե նկատի ունենանք, որ այդ օրը համագործակցության հուշագիրը ստորագրած երեք քաղաքական ուժերը, միասին ունենալով 18 մադնատ,  պետք է փակ գաղտնի քվեարկությամբ  պետք է Վանաձորի քաղաքապետ ընտրեն ԼՀԿ առաջին համար Քրիստ Մարուքյանին:

Սրանով Հայաստանում աննախադեպ մի իրավիճակ կլինի, երբ Վանաձորում իշխանության կգա ընդդիմությունը: Սակայն, որքան էլ 3 քաղաքական ուժերի ներկայացուցիչներն առանձին–առանձին և իրար հետ վերահաստատել են, որ իրենց ներկայացուցիչները քվեարկելու են Քրիստ Մարուքյանի օգտին, չեն դադարում շրջանառության մեջ դրվել խոսակցություններ, որ նրանցից մի քանիսը  ճնշումների կամ այլ գործոնների բերումով քվեարկելու են Վանաձորի ՀՀԿ-ական թեկնածու Մամիկոն Ասլանյանի օգտին:

Հիշեցնենք, որ այս մասին տեղեկացրել էր «Ժամանակ»-ը` նշելով, որ Վանաձորի հնարավոր համաձայնությունը ՀՎԿ-ի, ԲՀԿ-ի և «Լուսավոր Հայաստան»-ի միջև ՀՀԿ-ին գցել են ցայտնոտի մեջ, ինչի պատճառով իրավապահ և պատկան մարմինները ճնշումները են բանեցնում երեք ուժերի ավագանիների վրա։ Ըստ թերթի՝  քննիչները կանչել և սպառնացել են «Հայկական վերածնունդ» կուսակցության ավագանու ցուցակը  գլխավորող  Արկադի Փելեշյանին, որը նախօրեին ծեծի էր ենթարկել Ավետարանական եկեղեցու  հոգևոր հովիվ  Ռաֆիկ Գրիգորյանին, որ եթե  առաջիկա ավագանու նիստին  փակ գաղտնի  քվեարկությամբ չքվեարկի ՀՀԿ-ական թեկնածու  Մամիկոն Ասլանյանի օգտին, նրան կկալանավորեն։ Ըստ նույն լուրի` սպառնալիքներ է ստացել նաև ԲՀԿ-ական թեկնածուն՝ Այծեմնիկ Օհանյանը։


Tert.am–ի հարցին, թե ամեն դեպքում, եթե հոկտեմբերի 10-ին ոմանք չքվեարկեն Քրիստ Մարուքյանի օգտին, ապա ո՞վ կամ ովքեր կլինեն մեղավորները փակ քվեարկության դեպքում, ԲՀԿ նախագահ Նաիրա Զոհրաբյանը պատասխանեց՝ ասելով.«Մեր երեք ավագանիները մեկ մարդու պես կատարելու են կուսակցության որոշումը և քվեարկելու են հօգուտ Քրիստ Մարուքյանի»:

Հետագայում տարատեսակ շահարկումներ թույլ չտալու համար ԲՀԿ ղեկավարն առաջարկում է, որպեսզի ավագանու անդրանիկ նիստում լինի բաց քվեարկություն:

«Ավագանին ինքն է որոշելու քվեարկության կերպը և ձևը: Ես կարծում եմ` ամենակարճ ճանապարհը բաց քվեարկելն է, որպեսզի հետո որևէ մեկը որևէ մեկին որևէ բանում չմեղադրի: Սա կլինի ամենակարճ պատասխանը բոլոր հարցերին. Ո՞վ է իր հայտարարություններում ազնիվ և ով է անում հայտարարություն և տակից տալիս համապատասխան խաղեր»,-ասաց Նաիրա Զոհրաբյանը:

Հարցին, թե ՀՎԿ–ն պատրա՞ստ է բաց քվեարկության կուսակցության մամուլի քարտուղար Էդգար Առաքելյանն ասաց.«Այո, ինչու չէ»:

Հիշեցնենք, որ հոգևորականին ծեծի ենթարկելու մեջ մեղադրվող, «Հայկական վերածնունդ» կուսակցության Վանաձորի քաղաքապետի թեկնածու Արկադի Փելեշյանին  իրավապահները բաց էին թողել չհեռանալու մասին ստորագրությամբ:

Ինչ վերաբերում է հարցին, թե արդյո՞ք ստորագրությամբ ազատ արձակված իրենց թեկնածուն կաշկանդված չի լինելու ճնշումների դեպքում քվեարկել, Էդգար Առաքելյանն ասաց, թե այս մասին տեղեկությունն իրականությանը չի համապատասխանում:

Նշենք, որ այսօրվա դրությամբ, ինչպես հայտնել էին Քննչական կոմիտեից` Փելեշյանին մեղադրանք առաջադրված չէ: 


«Հայկական վերածնունդ» կուսակցության պատգամավոր Մհեր Շահգելդյանն էլ հարցին, թե այս համագործակցության հուշագիրը վերաբերում է միայն Վանաձոր քաղաքում երեք ուժերի համագործակցությանը, թե՞ նաև խորհրդարանական ընտրություններին, ասել է.«Հուշագիրն իհարկե, առաջին հերթին վերաբերում է Վանաձոր քաղաքին և դրա հետ մեկտեղ Վանաձորը առաջին ծիծեռնակն է, մեր համագործակցության տեսանկյունից, չնայած կա նաև Գյումրին, որտեղ ՀՎ-ն, ԲՀԿ-ն և ԳԱԼԱ-ն հայտարարել են ընդհանուր դիրքորոշումների վերաբերյալ։