Ուսանողները ռեկտորի աշխատասենյակի դիմաց նստացույց են իրականացնում (տեսանյութ)

17:50

Ուսանողները ռեկտորի աշխատասենյակի դիմաց իրակացնում են նստացույց: Նրանց մի մասը ԵՊՀ  գիտխորհրդի դահլիճում են տեղավորվել և հայտարարում են, որ չեն պատրաստվում հեռանալ մինչև ռեկտոր Արամ Սիմոնյանը հրաժարական չտա:  

 
Ուսանողները, իրենց պահանջը, ի հակառակ ռեկտոր Արամ Սիմոնյանի համոզման, օրինական են համարում: Tert.am-ի հետ զրույցում «Հանուն գիտության զարգացման» նախաձեռնության անդամները նշեցին, որ դիմել են կառավարությանը հոգաբարձուների խորհուրդը լուծարելու համար, սակայն դեռևս արձագանք չկա:

Ի դեպ, «Ռեսթարթ» նախաձեռնության անդամ Դավիթ Պետրոսյանը իր ֆեյսբուքայն էջում գրել է. «Նոր մտա Արամ Սիմոնյանի մոտ, ասեց, որ իրեն լավ է զգում, մենք ասեցինք, որ չենք խոչընդոտի
իր դուրս գալը, բայց նացանկանում է մնալ»:




16:08

ԵՊՀ ռեկտոր Արամ Սիմոնյանին տեղեկացրեցին, որ ուսանողները փակել են նրա աշխատասենյակի դուռը, որպեսզի թույլ չտան, որ այնտեղից դուրս գալ: Սիմոնյանն ասաց, որ անօրինական է նրանց գործողությունները: «Նրանք խախտում են իմ սահմանադրական իրավունքները»,-ասաց նա, բայց նշեց, որ չնայած դրան, ինքը չի պատրաստվում ոստիկան հրավիրել:

«Պետք է բացատրեմ, համոզեմ, ասեմ, չարեցին՝  կգիշերեմ այստեղ»,-ասաց նա:

Դիտարկմանը, թե նրանք վճռական են տրամադրված, ասաց. «Վճռական են տրամադրված իրենց գործն է, ես ոստիկան չեմ հրավիրի այստեղ, ես դեմ եմ այդպիսի բաներին, միշտ էլ դեմ եմ եղել»:

Հարցին, որ եթե 2000 ստորագրություն հավաքեն, ասաց որ կմտածի դրա մասին. «Դա արդեն մտածելու տեղիք կտա»:

Արամ Սիմոնյանը նշեց, որ այսօր ռեկտորատի նիստ է եղել, որի ժամանակ դասախոսների կողմից եղել են քննադատություններ, բայց ոչ մեկ չի պահանջել հրաժարական տալ, դեռ ընդհակառակը:

«Ես բացատել եմ իրենց վիճակը, ասել եմ, որ ես կպած չեմ այս աթոռից, այս աթոռն ինձ նեղություն է տալիս որպես անձի: Ես այստեղ պլյուսներ չունեմ, կամ ունեմ՝ շատ քիչ, իմ մինուսները շատ են, անկեղծ ասում եմ, այս տարիների ընթացում ես ստացել եմ մեծ բավականություն, որովհետև ստեղծել եմ բաներ, որոնք մնայուն են»,-ասաց նաև թվարկեց կատարած աշխատանքները, որոնք, իր խոսքով, չեն գնահատվում:

«Շատ գործ եմ արել, բայց գիտեմ, որ շատերի աչքին քոռ կոպեկ արժեք չունի, որովհետև գիտեմ մարդկանց արածը արժեք չունի: Ես չեմ խնդրում իմ վաստակը գնահատեն, քավ լիցի, բայց ես բավական գործ արել եմ»,-ասաց նա:

15։54 

Լրագրողների հետ զրույցում արդեն Դավիթ Պետրոսյանը նշեց, թե իրենք ռեկտորին մտադրություն չունեին փակել դահլիճում, ուղղակի իրենց բողոքի ակցիան իրականացրին և ցույց տվեցին, որ ուսանողները համալսարանում իշխանություն են: 

«Մենք ունենք մարդկային, արժեքային սկզբունքները, որի համար էլ թողեցինք դուրս գա»,-ասաց նա:

Դավիթ Պետրոսյանը նշեց, թե հանդիպումը կառուցողական չէր, որովհետև հասկացան, որ քննարկելն իմաստ չունի, քան որ լիարժեք պատասխաններ չտրվեցին: Նա տեղեկացրեց, որ իրենք կառավարությունն են դիմել, որպեսզի ԵՊՀ խորհրդի կազմը ցրեն:   

Արամ Սիմոնյանն իր աշխատասենյակում պատասխանեց  լրագրողների հարցին և նշեց, որ ուսանողները արժեզրկեցին հանդիպումը՝ բռնություն կիրառելով և թույլ չտալով իրենց դուրս գալ նիստերի դահլիճից: «Մինչդեռ ես պատրաստ էի իրենց հետ քննարկել մեր խնդիրները»,-ասաց նա:

Ռեկտորը նաև պարզաբանեց որոշ չարաշահումների մասին տեղեկությունները՝ ասելով, որ դրանք տեղին չեն, որոնք կարող են փաստաթղթերով ապացուցել:

Արամ Սիմոնյանը պատասխանելով հարցին, թե իրեն փոխարինողներ տեսնո՞ւմ է, ասաց որ այո, պրոռեկտորները, բայց չի պատրաստվում հրաժարական տալ այն պատճառով, որովհետև իրեն բռնի ուժով են ստիպում:

«Ինձ ստիպում են հիմա, բռնի, այս ձևով հեռանալ, ես կամավոր կարող եմ գնալ, երբ լինի իրավական հարթության վրա, բայց ոչ ստիպելով: Ես այն մարդը չեմ, որ ստիպելով որևէ բան անեմ»,-ասաց նա։

Հարցին, թե որքա՞ն ժամանակ է տեսնում իրեն այս պաշտոնում, ասաց, որ չի կարող ասել: «Համենայնդեպս չեմ պատրաստվում երկար այստեղ մնալ, ես իրավունք ունեմ երրորդ անգամ ընտրվելու, որը չեմ անի»,-ասաց նա:



15:30

ԵՊՀ գիտխորհրդի նիստերի դահլիճում ուսանողների հանդիպումը ԵՊՀ ռեկտոր Արամ Սիմոնյանի հետ ընդհատվեց, քանի որ ռեկտորի ինքնազգացողությունը դահլիճում վատացավ և ցանկացավ դուրս գալ:

Չնայած դրան՝ ուսանողները դուռը փակել էին և չէին թողնում, որ ռեկտորը դուրս գա նիստերի դահլիճից: Նրանք վանկարկում էին «Արամ հեռացիր, ԵՊՀ-ն մոռացիր»:

Անվտանգության աշխատակիցը պահանջում էր բացել դուռը, բայց ուսանողները անդրդվելի էին մնում և հիշեցնում էին, թե իրենց հետ ինչպես է ռեկտորը վարվել:

«Երիտասարդ խնդրում եմ, թույլ տուր, որ անցնեմ»,-ասաց ռեկտորը՝ խնդրելով իր տարիքը հաշվի առնել:

Տեսնելով, որ Արամ Սիմոնյանը իսկապես լավ չի զգում, բացեցին դուռը և թույլ տվեցին, որ Արամ Սիմոնյանը դուրս գա:




15:22 

Բազմաթիվ հարցերն ու ոչ հստակ պատասխանները խոսում են նրա մասին, որ համալսարանն ունի լուրջ փոփոխությունների կարիք, և որոշ մարդիկ պետք է հեռանան իրենց պաշտոններից. Երևանի պետական համալսարանի ղեկավարության հետ հանդիպմանն ասաց «Ռեսթարթ» նախաձեռնության անդամ Դավիթ Պետրոսյանը: 

Ամփոփելով քննարկումը՝ նա ասաց, որ ստացվում է, որ ուսանողը ուսանողական քարտով կարող է գալ համալսարան, բայց անվտանգության աշխատողը նրան չթողնի ներս, բայց կարմիր բերետավորը կարող է մտնել և համալսարանում մարդ բռնել: 

«Իսկ դա այն դեպում, երբ անվտանգության ծառայությանը 87 մլն դրամ են վճարում, որը փաստորեն չի կարողանում իրականացնել իր պարտականությունը: Բայց ոչ թե չի կարողանում իրականացնել, այլ երբ պետք է կարողանում է, երբ պետք է՝ չի կարողանում»,-ասաց նա: 

Նա շարունակեց, թե փաստորեն պարզվում է, որ ԵՊՀ-ն 7,5 հազար ուսանողի համար է նախատեսված, բայց այդտեղ սովորում է 17 հազար ուսանող:

«Երեք անգամ ավելի մարդ կա, բայց տեխնիկան, ամեն ինչը ապահովված է այդքան մարդու համար, ֆիզիկապես անհնար է ապահովել կրթության բարձր որակ, էլ խոսքը չի գնում ուրիշ բաների մասին»,-ասաց նա: 

Դավիթ Պետրոսյանի խոսքով՝ այսքան ժամանակ համալսարանը եղել է գումար աշխատելու վայր: «Ուսանողից գումար է վերցրել և 130 մլն տվել է Երիտասարդական հիմնադրամին ինչ-որ նպատակների համար»,-ասաց նա: 

Սորոսի հետ կապված նա ասաց, որ ինքը Լեհաստանում եղել է ոչ թե Սորոսի ծրագրով, այլ այլ կրթական ծրագրով և իր հասցեին մեղադրանքները սուտ են և կարող է ապացուցել: 

Նա շարունակեց, թե երբ իրենք հացադուլ էին անում, Սիմոնյանն ասել էր՝ ոչինչ, սոված կմնան՝ դուրս կգան: «Դա ռեկտորի կողմից անթույլատրելի վերաբերմունք է  սեփական բուհի ուսանողի նկատմամբ»,-ասաց նա: 

Ինչ վերաբերում է այն պարզաբանմանը, թե շատ խնդիրներ կապված են տնտեսության հետ, որի պատճառով  բուհն ավարտած ուսանողները չեն գտնում աշխատանք, ապա Դավիթ Պետրոսյանը նշեց, թե 20 տարուց ավելի լինելով ՀՀԿ կուսակցության անդամ՝ նույն  Արամ Սիմոնյանը ոչինչ չի արել, որ երկրում լինի տնտեսություն:   

Նա շարունակեց, թե համալսարանում այնպիսի իրավիճակ է, որ տարկետման հետ կապված խնդիրն առաջացել է, որովհետև ով ուզում է՝ ատենախոսություն է գրում: «Ո՞վ է մեղավոր, սովորող ուսանողը մեղավո՞ր է, որ հարուստի  երեխաներն են ատենախոսություն գրում ու տարկետումից օգտվում»,-ասաց նա: 

Այնուհետև նա ամփոփեց, թե իրենք շատ լավ գիտեն, թե համալսարաններում ինչ է կատարվում և եզրափակեց. «Մի լուծում է մնում՝ ԵՊՀ ռեկտորը պետք է հրաժարական տա, աուդիտ պետք է կատարվի և այդ ժամանակ էլ կդիտարկվի մնացած աշխատողներին իրենց աշխատանքի մնալու հարցը»,-ասաց նա և նաև Ուսխորհրդին կոչ արեց միանալ այս պայքարին: 

14։47

Ուսանողներից մեկի հարցն ուղղված էր ոչ թե բուհի ռեկտոր Արամ Սիմոնյանին, այլ «Ռեսթարթ» նախաձեռնության անդամ Դավիթ Պետրոսյանին: 

«Ես վեց տարի սովորել եմ, չեմ տեսել, որ ԵՊՀ-ում չկա ակադեմիական միջավայր, որի մասին խոսում եք: Ես՝ որպես օբյեկտիվ քաղաքացի, մինչև վերջ գնալու եմ՝ հասկանալու, որ եթե ինչ-որ մեկը հրաժարական տվեց՝ ձեր գոռգոռալու հիման վրա՞ տվեց, թե իրական փաստերի ու իրական հիմքերի»,-ասաց նա և ապա դիմելով Արամ Սիմոնյանին՝ նշեց. «Պարո՛ն ռեկտոր, Ձեզ էլ խնդում եմ, եթե հրաժարականի դիմում ներկայացրեք, դա պետք է լինի հիմնավոր, եթե մենակ աղմուկի վրա լինի, ամեն գնով գնալու եմ՝ տեսնելու հիմք ունի՞»:  

Իսկ թե որն էր հարցը, նշեց, թե պարզաբանեն, թե ակադեմիական միջավայր ասելով՝ ինչ են հասկանում: 

Դավիթ Պետրոսյանը թվարկեց՝ այն, որ ԵՊՀ ստացած կրթությունով ուսանողները չեն կարողանում գտել աշխատանք, և դիպլոմները դառնում են հուշանվեր, թեև, ըստ նրա, դա չի վերաբերում բոլոր մասնագիտություններին: 

«Եթե բավարար գիտելիք չեն ստանում աշխատանք գտնելու համար, ուրեմն ակադեմիական կրթության հետ խնդիր կա: Եթե ուսանողները հետապնդվում են սեփական քաղաքական հայացքների համար, ուրեմն ունենք ակադեմիական ազատության խնդիր: Եթե գրադարանում ունենք հին գրքեր, իսկ ժամանակից գրականություն չկա, ուրեմն ունենք ակադեմիական ազատության խնդիր: Եթե 40 հոգու համար նախատեսված լսարանում 80 հոգով են նստում, ուսանողը չգիտի՝ թերթով իրեն հով անի, թե փակի դեմքը, որ արևը չընկնի վրան, քանի որ վարագույր չկա կախած, ուրեմն ունենք ակադեմիական միջավայրի խնդիր: Ես կարող եմ այսպես անթիվ անհարմար շարունակել: Եթե զուգարանում թուղթ չկա, որ մարդ իր հետույքը սրբի, ուրեմն դժվար կարողանա ակադեմիական միջավայր ընդհանրապես ունենա»,-ասաց նա:  

Ռեկտորի հրաժարականի պահանջին դեմ ուսանողը նշեց, թե արդյո՞ք պահանջները բավարարելու դեպքում  նշած խնդիրները լուծվելու են: «Եթե այո, ես երկու կարմիր դիպլոմ ունեմ ու ես էլ ունեմ աշխատանքի խնդիր, հիմա հետո գտնելո՞ւ եմ աշխատանք, երբ հրաժարականներ լինեն»,-ասաց նա: 

Դավիթ Պետրոսյանը նշեց, թե աշխատանքի հետ կապված չի սիրում, երբ մարդիկ դիմում են աշխատանք գտնելու: «Բայց եթե դիմեք, կփորձենք օգնել: Իսկ ընդհանրապես համալսարանն ունի լուրջ փոփոխությունների կարիք, և այստեղ այն մարդիկ, ովքեր վերցրել են պարտավորություն այդ փոփոխությունը հասցնելու համար»,-ասաց նա:  

14:29

Մենք ուզում ենք արժանապատիվ կրթություն ունենալ, որի համար համալսարանում համապատասխան պայմաններ չկան և տարվող գործընթաց էլ նկատելի չի. ԵՊՀ ռեկտորի Արամ Սիմոնյանին դիմելով՝ ասաց ուսանողներից մեկը:

«Պարո՛ն Սիմոնյան, դուք խանգարում եք մեր արժանապատիվ կրթություն ունենալուն, և մեր պահանջներն այսօր արդար են: Խնդրում ենք, որ կատարեք մեր բոլոր պահանջները»,-ասաց նա և թվարկեց դրանք,- «Առաջանայինը՝ ձեր հրաժարականը, հոգաբարձուների խորհրդի լուծարումը, աուդիտի իրականացումը, որովհետև վստահ ենք, որ համալսարանի միջոցները, մեր միջոցները չեն ծառայել իրական նպատակի, արհմիությունների և բոլոր տեսակի ուսխորհրդի գործունության դադարեցում, որը հետո կվերականգնվի:

Արամ Սիմոնյանը նշեց, որ այդ բոլոր պահանջները իրավաչափ չեն: «Ռեկտորի հրաժարականը կարող է լինել երկու դեպքում միայն, երբ դիմում է տալիս, և երբ հոգաբարձուների խորհուրդը հետ է կանչում նրան, կամ քվեարկում է, որպեսզի նա թողնի պաշտոնը»,-ասաց նա:

Դահլիճից արձագանքեցին, թե երկու հարցն էլ իր ձեռքում է:

«Ոչ, երկու դեպքն էլ իրավական հողի վրա են և իմ ձեռք տակ չեն: Ես օրինականության կողմնակից եմ և գտնում եմ, որ ամեն ինչ պետք է արվի օրենքով»,-ասաց նա:  

Ինչ վերաբերում է  հոգաբարձուների խորհրդին, ռեկտորը նշեց, թե խորhուրդը ինքը չի ընտրել: «Դա կառավարության որոշմամբ է ընտրվել, ես ինքս անդամ չեմ, և որևէ ուժ չունի իմ կարծիքը հոգաբարձուների խորհրդի հետ կապված: Դա պետք է հասցեագրեք ոչ թե ինձ, այլ կառավարությանը»,-ասաց նա:

Խոսելով աուդիտի մասին՝ Արամ Սիմոնյանը նշեց, որ պահանջից առաջ պետք է իմանալ՝ ինչ է աուդիտը, իմանալ ՀՀ օրենքը, ըստ այդմ էլ, երբ է կազմակերպվում և ինչ դեպքում: «Ազատ աուդիտ կազմակերպվում է հիմնադրամի համար՝ նրա հոգաբարձուների խորհրդի որոշմամբ, տարին մեկ անգամ»,-ասաց նա:   

Արհմիության մասով ասաց, որ կասեցումը դատական համակարգով է տարվում, իսկ ուսխորհուրդը անկախ մարմին է, որն էլ որոշում է իր կասեցման մասին: «Այստեղ ռեկտորատը կապ չունի»:

Ուսանողը նշեց, թե կան հոգաբարձուների խորհրդի անդամներ, որոնք օրենքով պետք է պաշտոնյա լինեն, բայց նրանք այսօր պաշտոնյա չեն, ինչպես Սերժ Սարգսյանն է:

Արամ Սիմոնյանը նշեց, որ հոգաբարձուների ցուցակի հաստատման հետ որևէ առնչություն չունի:  

14:06

Ուսանողներից Վահան Կոստանյանը մինչ հարցը տալը մեջբերեց Արամ Սիմոնյանի քիչ առաջ արված այն արտահատությունը, թե ես չեմ տիրապետում այդ իրավիճակին: «Դուք ճիշտ եք, չեք տիրապետում այն իրավիճակին, որ կա ԵՊՀ-ում»,-ասաց նա: 

Արամ Սիմոնյանն ընդհատեց, որ ինքը այդպիսի բան չի ասել, որ չեմ տիրապետում իրավիճակին: «Բառերը խորհուրդ կամ ճիշտ օգտագործել, ես ասացի՝ տվյալ դեպքին չեմ տիրապետում»,-ասաց նա:

Իսկ հարցը վերաբերում էր նրան, թե ինչպես է զգում այս մարդկանց կողքին, որոնց որակել է «Սորոսի շպիոններ»:

««Բաց հասարակությունների հիմնադրամից» ԵՊՀ-ն ստացել է 1,5 մլն դոլարի գրանտ, կատարվել են ծրագրեր, որից մի մասը վատ են կատարվել. ինչպե՞ս եք Ձեզ զգում, երբ Ձեր ձախ կողմում նստած երիտասարդին այդքանից հետո նման մեղադրանքներ եք ներկայացնում»,-ասաց նա:

Վահան Կոստանյանը նշեց, թե ռեկտորի շրջապատի անձինք ծառերի հետևից ծիկրակելով նկարում էին դասադուլի օրերին: «Բացի այդ, երբ ուսանողներից հացադուլ էին անում, երբեք չգնացիք՝ տեսեք, թե ինչ է եղել, հիմա ասում եք, որ չի եղել դեպք, երբ ուսանողները հարց ունենա, ու չկարողանան դիմել իրեն»,-ասաց նա:

Արամ Սիմոնյանը նշեց, որ դա ուսանողի կարծիքն է, որը չի կիսում:

Նա պատասխանելով «Սորոսի հիմնադրամին» վերաբերող հարցին, ասաց, որ այո բուհը ստացել է և այդ գումաների զգալի մասը տրվել է գիտական դրամաշնորհների ձևով: «Իհարկե դա օգուտ է, բայց ես ունեմ իմ կարծիքը «Բաց հասարակության հիմնադրամի մասին»: Ով էլ ուզում է լինի, ինձ չի կարող հակառակը ապացուցել, ես գտնում եմ, որ այդ հաստատությունը ստեղծվել է շատ ուրիշ նպատակների համար: Իմ կարծիքն է, կիսում եք դա, թե չեք կիսում, դա ձեր խնդիրն է»,-ասաց նա:

Ինչ վերաբերում է հացադուլավորներին, ապա Արամ Սիմոնյանը նշեց. «Բա էդ հացադուլավորներին, որ թույլ էին տալիս ուտելիքը տաք, խմելիքը տաք, ծխելիքը տաք, բարձրը տաք, օգտվել սանհանգույցներից, դա իրան-իրան էր արվում, սիրելիներս»:

Սիմոնյանին ընդհատեց Դավիթ Պետրոսյանը. «Դա սուտ է, հացադուլի ժամանակ անվտանգության աշխատակիցները ներկա են եղել, ես հատուկ գնացել եմ հիվանդանոց, որ մեր ստամոքսը եղել է դատարկ, ես պահանջում եմ ներողություն խնդրել»: 

Նման հայտարարությունից հետո ուսանողները վրդովվեցին, ու սկսեցին սեղաններին հարվածել:

«Այո, ես երևի ճիշտ չարտահայտվեցի, խոսքը վերաբերում էր ջրին, ծխախոտին, ադեալներին, եղել է, որ արգելք եմ հանդիսացել»,-ասաց Սիմոնյանը:

Ուսանողներից Կոստանյանը նկատեց, թե դա հուշում է, որ բուհում ռեկտորը բռնապետության կանոններով է առաջնորդվում:

13:40

Ուսանողներից մեկը ԵՊՀ ռեկտոր Արամ Սիմոնյանին հարցրեց, թե որքանո՞վ էր օրինական, հեղափոխության օրերին ուսանողների առաջ դռները փակելը:

Ըստ նրա՝ ապրիլի 18-ին կարմիր բերետավորները ուսանողներին համալսարանական տարածքից բերման էին ենթարկում, որտեղ կանգնած էր պրոռեկտորների մեկը: «Արդյոք օրինական էր»,-հարցրեց նա:

Արամ Սիմոնյանը նշեց, թե իրենք միշտ ասել, հայտարարել են, որ այն կարծիքի են, որ ոստիկանությունն իրավունք չունի մուտք գործել ԵՊՀ տարածք, առանց դրա համար իրավունքն ունենալու:

Ինչ վերաբերում է բուհի դռները փակվելուն, ապա հաստատեց, այո՛ եղել են, բայց դրանք արվել են անվտանգության պահպանման համար: «Մի րոպե պատկերացրեք բուհի ղեկավարության վիճակը, երբ օրական 20-25 հազար մարդ մուտք է գործում բուհ, այն դեպքում, երբ ուսանողների և դասախոսների անվտանգության ապահովումը ոչ բարձր մակարդակի վրա է: Այո,  մենք վախենում էինք, այսօր էլ վախենում ենք, որ կարող էր որևէ անհավասարակշիռ մարդ, որ կապ չունի ոչ շարժման հետ, ոչ էլ համալսարանի, փորձի ինչ-որ վտանգավոր միջոցներ ձեռնարկել, ընդհուպ մինչև ահաբեկչական ակտ կատարի»,-ասաց նա և նշեց, որ նման դեպքերում կարելի է դուռ փակել, քանի որ անվտանգության խնդիրներն իրենց համար առաջնային են: «Իսկ ընդհանրապես, համալսարանի ոչ մի դուռ փակ չի լինում»,-ասաց նա:

13:27

ԵՊՀ գիտխորհրդի նիստերի դահլիճում մեկնարկեց ուսանողների հանդիպումը ԵՊՀ ռեկտոր Արամ Սիմոնյանի և բուհի պրոռեկտորների հետ:

Նշենք, որ հանդիպմանը մասնակցում են նաև որոշ դասախոսներ, ովքեր ևս դժգոհ են բուհի կառավարումից:

Արամ Սիմոնյանը նշեց, որ պատրաստ են պատասխանել ուսանողներին մտահոգող հարցերին:

13։04

Բողոքի ակցիայի մասնակից ուսանողները հանդիպեցին ԵՊՀ ղեկավարության հետ։ Հանդիպմանը ներկա էր նաև ռեկտոր Արամ Սիմոնյանը։ Պայմանավորվածություն ձեռք բերվեց հանդիպել գիտխորհրդի նիստերի դահլիճում։
 

12։55

ԵՊՀ տարբեր մասնաշենքեր մտնելուց հետո ուսանողները վերադարձան ԵՊՀ կենտրոնական մասնաշենք, որի կամարների տակ մուտք գործեցին բուհ վանկարկման ու ծափերի ներքո:

Ճանապարհին նրանք վանկարկում էին՝ «ու–սա–նող մի–ա–ցիր», «դա–սա–խոս, մի–ա–ցիր»:

Ապա աստիճանների մոտ բարձրախոսով ելույթ ունեցավ Դավիթ Պետրոսյանը, ով հայտարարեց. «Այսօր մենք իրականացնում ենք մեր բողոքի ակցիան, որն ունի 4 պահանջ. ԵՊՀ ռեկտոր Արամ Սիմոնյանի հրաժարական, հոգաբարձուների խորհրդի լուծարում, համալսարանում աուդիտի անցկացում և ուսխորհրդի և արհմիության գործունեության ժամանակավոր դադարեցում»:

Պահանջներն ընդունվեցին ծափերով։

«Հայաստանում տեղի է ունեցել Թավշյա հեղափոխություն. արժեքների և սկզբունքների հեղափոխություն, ինչպես որ այժմ տեղի է ունենում մշակութային հեղափոխություն, բայց քանի դեռ ուսանողների ու դասախոսների համար ԵՊՀ-ում ստեղծված չեն արժանապատիվ պայմաններ, սովորելու և դասավանդելու համար անհրաժեշտ նախադրյալներ, հեղափոխությունը ԵՊՀ չի մտել»,- հայտարարեց Դավիթ Պետրոսյանը:

Նա նաև ասաց, քանի դեռ Արամ Սիմոնյանը նշում է, որ բուհի ֆինանսավորումը հերիքի, նույնիսկ եթե այն ավելանա 2-3 անգամով, այդ մարդը այդքան ժամանակ ոչ թե բուհի ռեկտոր է, այլ բիզնես կենտրոնի ներկայացուցիչ:
 

12:23

Ցուցարարներին մոտեցավ «Ես դեմ եմ անհիմն ռեստարտին» գրությամբ պաստառով մի երիտասարդ, որը, դիմելով ուսանողներին, կոչ արեց միանալ իրեն, սակայն ուսանողները բացասաբար ընդունեցին նրան՝ հայտնի՝ բթամատը ներքև ժեստը ցույց տալով:

«Որովհետև առանց փաստերի, աուդիտի, պատկան մարմինների գնահատականի անընդունելի եմ համարում այսքան մարդկանց հավաքվելը: Համոզված եմ, որ հավաքվածներից մի մասը գոնե չգիտի՝ ինչի համար են հավաքվել»,-ասաց նա:

Ներկայայանալու առաջարկին ի պատասխան նա ներկայացավ՝ ԵՊՀ նախկին շրջանավարտ և մագիստրոս, որը պատրաստվում է ուսումը շարունակել մայր բուհում:

12:01

Ուսանողները ԵՊՀ կենտրոնական մասնաշենքի մոտից իրազեկման երթ սկսեցին դեպի բուհի տարբեր ֆակուլտետներ ու մասնաշենքեր:

Նշենք, որ իրազեկման ակցիային մանսակցում են ԵՊՀ տարբեր մասնաճյուղերից:

Ուսանողները բարձրաձայնում են բուհում տեղի ունեցող ֆինանսական չարաշահումների մասին:

Ուսանողները նաև հնչեցնում են «Ազատ, անկա ուսանող» կարգախոսը:




11:38 ԵՊՀ ռեկտորը պարտավոր է հասկանալ, որ իրավիճակ է փոխվել, ժամանակներ. Դավիթ Պետրոսյան

Այս պահին ԵՊՀ Կենտրոնական մասնաշենքի դիմաց հավաքվել են մի քանի տասնյակ ուսանողներ՝ պահանջելով ռեկտոր Արամ Սիմոնյանի հրաժարականը:

«ԵՊՀ Ռեստարտ» նախաձեռնության կազմակերպիչներից Դավիթ Պետրոսյանն ասաց. «Մենք մոտ մեկ ամիս սպասեցինք, հուսով էինք, որ համալսարանում տեղի կունենան որոշակի բարեփոխումներ: Նախաձեռնություն կլինի ղեկավար կազմից, ինչ-որ հայտարարություններ կլինի ուսանողներին աջակցելու, բայց մենք էլի շարունակում ենք ուսանողներից, դասախոսներից ստանալ զանգեր, որում նշվում է, որ մարդիկ, որոնք մասնակցել էին ցույցերի, մեղմ ասած, լավ վերաբերմունքի չեն արժանանում: Այս պայմաններում, հաշվի առնելով ԵՊՀ-ում բազմաթիվ խնդիրների առկայությունը՝ սկսած կրթական խնդիրներից՝ կրթության որակը, ակադեմիական ազատությունը, կառավարման թափանցիկությունը, ռեսուրսների ծախսման ոչ արդյունավետությունը, ավելին՝ վատնումը, մեզ այլ բան չի թողնում, քան պահանջել ղեկավար կազմի՝ այդ թվում՝ ռեկտորի հրաժարականը:

Դավիթ Պետրոսյանը, անդրադառնալով ռեկտոր Արամ Սիմոնյանի այն հայտարարությանը, որ մի քանի բախտախնդիրների պատճառով չի պատրաստվում հրաժարական տալ, ասաց. «Մենք մեկուկես տարի է՝ անմիջական շփվում ենք ռեկտորի հետ, բայց մի բան պարզ է, որ համալսարանն ուսանողակենտրոն չէ: Եվ այսպես շարունակվել չի կարող:  Իրավիճակ է փոխվել, ժամանակներ, և եթե իրենք չեն կարողանում փոխվել, ուրեմն պետք է հեռանան»:

Հարցին, թե Վերահսկողական ծառայության ղեկավար Դավիթ Սանասարյանը երեկ հայտարարել է, որ պատրաստվում են ֆինանսական ստուգումներ անել մայր բուհում, նախաձեռնության ղեկավարն ասաց, որ որոշ թվերի ծանոթ են:

«Իհարկե, հետո 2016 թ, հաշվետվությունը «փախավ» կայքից ու 2 միլիոն 600 հազար դրամով առնել սեղան, 1 միլիոնով առնել աթոռ. 141 միլիոն դրամ տրամադրել մաքրման ծառայության համար, երբ հավաքարարները մինիմալ աշխատավարձ են ստանում, էս ամենը ցույց է տալիս, որ կան շատ խնդիրներ, որոնք պետք է բացել և հասկանալ, թե այդ գումարներն ուր են գնում»,-ասել է նա:

Անդրադառնալով մայր բուհի ռեսուրսների ոչ արդյունավետ ծախմանը՝ «ԵՊՀ-Ռեստարտ» նախաձեռնության ղեկավարը վերարձանագրեց, որ 130 միլիոն դրամն այլևս չի ուղղվում Հայաստանի երիտասարդական հիմնադրամ։

«Ռեսուրսների արդյունավետ կառավարումը համալսարանի համար շատ կարևոր է, իսկ ռեկտորը հայտարարեց, որ եթե համալսարանի գումարն անգամ 2-3 անգամ շատ լինի, միևնույն է՝ էլի չի բավարարելու: Այստեղ ուղղակի փաստն այն է, որ ռեսուրսների արդյունավետ մենեջմենթ տեղի չի ունենում»,-ասաց Դավիթ Պետրոսյանը:

Ինչ վերաբերում է հոգաբարձուների խորհուրդը լուծարելուն, ապա նա նշեց, որ հոգաբարձուների խորհրդի անդամների 25 տոկոսն այժմ գոյություն չունի, քանի որ նրանք նախկին պաշտոնյաներ են: Իսկ մյուս 25 –ին տոկոսին, որոնք ներկայացնում են Կրթության և գիտության նախարարությունը, հետկանչի կոչ է արվելու:

Հիմնական խնդիրն է, որ ԵՊՀ կառավարման մեջ՝ ղեկավար կազմում, չլինեն կուսակցական և քաղաքական պաշտոնյաներ: Նրա խոսքով՝ սա միայն Երևանի պետական համալսարանի խնդիրը չէ, այն կա գրեթե բոլոր բուհերում:

Ինչ վերաբերում է հարցին, թե ով կարող է փոխարինել Արամ Սիմոնյանին, ապա Դավիթ Պետրոսյանն ասաց, որ կոնկրետ որևէ թեկնածու չունեն:





10։51


Մեկնարկել է «ԵՊՀ Ռեստարտ» նախաձեռնության բողոքի ակցիան՝ ԵՊՀ ռեկտոր Արամ Սիմոնյանի հրաժարականի պահանջով: 

Հիշեցնենք, որ նրանք հայտարարություն էին տարածել՝ ուսանողներին, դասախոսներին և աշխատակազմի ներկայացուցիչներին կոչ անելով ժամը 11:00-ին, սկսել դասադուլ և գործադուլ հետևյալ պահանջներով` ԵՊՀ ռեկտոր Արամ Սիմոնյանի հրաժարական, Հոգաբարձուների խորհրդի լուծարում, ֆինանսական աուդիտի անցկացում, ՈՒԽ-ի և արհմիության գործունեության կասեցում: 

Որպես նման քայլի դիմելու պատճառ մատնանշված են մայր բուհի բազմաթիվ խնդիրները՝ կրթության ցածր որակ, կենցաղային ոչ արժանապատիվ պայմաններ, ֆինանսների անարդյունավետ օգտագործում, ակադեմիական միջավայրի բացակայություն, դասախոսների և ուսանողների հետապնդումները քաղաքական հայացքների համար, բուհ-ի և նրա մի շարք կառույցների կուսակցականացվածությունը, բազմաթիվ ուսանողների և դասախոսների բողոքները, համալսարանում ուսանողների և դասախոսների շահերը պաշտպանող երկու կառույցների՝ ՈՒԽ-ների և արհմիության գործունեության ցածր արդյունավետությունը:

«Հայաստանում տեղի է ունեցել Թավշյա հեղափոխություն, Հայաստանում տեղի է ունեցել մշակույթի և մտքի հեղափոխություն, և ԵՊՀ-ում տիրող և՛ մթնոլորտը, և՛ իրավիճակը չեն համապատասխանում հեղափոխության հռչակած սկզբունքներին և արժեքներին: Համապատասխանեցումը շատ արագ պետք է իրականացվի: Կեցցե՛ ազատ, անկախ ուսանողը, կեցցե՛ ազատ, անկախ դասախոսը, կեցցե՛ ազատ, անկախ ԵՊՀ-ն»,- ասված է նախաձեռնության հայտարարության մեջ: