Հեղափոխության ամենադժվար պահին, երբ չգիտեինք՝ վաղն ինչ է լինելու, Ա. Սարգսյանն ու մյուսները հակառակ քայլեր էին անում. ՔՊ անդամը հակադարձում է

«Քաղաքացիական պայմանագիր» կուսակցության վարչության անդամ, ԱԺ պատգամավոր Հովիկ Աղազարյանը Tert.am-ի հետ զրույցում անդրադառնում է դեռևս գոյություն ունեցող «Ելք» դաշինքի անդամ «Հանրապետություն» կուսակցության նախագահ Արամ Զ. Սարգսյանի՝ դժգոհություններին, որոնք երեկ արդեն վերջնագրային էին: Հիշեցնենք, որ պատասխանելով մեղադրանքներին, թե «Լույս» դաշինքը համագործակցում է նախկին ռեժիմի հետ՝ նրանց հետ բերելու համար, ասել էր. «Հերի՛ք է էդ ասֆալտին փռելուց, քշելուց, դիակներից ու եսիմ ինչերից խոսենք, հերիք է՝ չկա էդ բանը: Էս ընտրարշավում չկա որևէ ուժ, ում դեմ պայքարես»: Ապա, ըստ էության, հիշեցնելով, թե ում շնորհիվ է Նիկոլ Փաշինյանը խորհրդարանում ընտրվել, ասել էր. «Ի՞նչ սևի ու սպիտակի խնդիր է։ Էդ նույն «Բարգավաճ Հայաստանն» իր 31 պատգամավորով համապատասխան պահին կանգնեց ձեր կողքին, Դաշնակցությունն իր 7 պատգամավորով կանգնեց ձեր կողքին, մենք եկանք՝ քվեարկեցինք: Հո խնդիրը միայն նրանում չէ, որ ով ձեզ հետ քայլել է, նա էլ պետք է լինի. եթե միայն ձեզ հետ քայլածներով եք ուզում իշխանություն ստեղծել, ես ձեզ էլ ասելու բան չունեմ»: Նաև Արամ Սարգսյանը հասկացնել տվեց՝ դեռ կմտածեն ՝ քվեարկե՞լ ԱԺ արտահերթ ընտրությունների համար, թե ոչ:

-Պարո՛ն Աղազարյան, չե՞ք համարում, որ «Ելք» դաշինքում այլևս ոչ թե «ոխերիմ բարեկամներ են», այլ ձեր ճանապարհներն այլևս թշնամական նոտայով բաժանվում են: Եվ արդյոք սրանում ձեր մեղքի բաժինը չե՞ք տեսնում:

-Նախ, ասեմ, որ ինչքանով ճանաչում եմ Նիկոլ Փաշինյանին, երևի թե, ինքը միակ մարդն է, որ որ որևէ մեկի առաջ չունի պարտավորություն: Եվ եթե Արամ Զ. Սարգսյանը, Էդմոն Մարուքյանը, ես, մյուսները բերել ենք մեր համեստ մասնակցությունը ընդհանուր իրավիճակին, ապա մենք արել ենք ոչ թե Նիկոլ Փաշինյանի համար, այլ դա արել ենք յուրաքանչյուրս մեր համար, մեր հայրենիքի համար: Հետևաբար, այստեղ ոչ «երեսով» տալու խնդիր կա, ոչ էլ հիմք: Նաև սպառնալ, որ կվերանայեն իրենց մոտեցումները արտահերթ ընտրությունների վերաբերյալ… ակնհայտ է, որ այս ԱԺ-ում նման իրավիճակ չի ստեղծվի: Ակնհայտ է, որ այս հարցերը պետք է լուծվեն հանրաքվեների միջոցով և որ պետք է լինեն արտահերթ ընտրություններ, ինչը խիստ անհրաժեշտություն է՝ քաղաքական կայունություն ապահովելու համար:

-Ամեն դեպքում, «Իմ քայլը» դաշինքի բառապաշարը չնպաստե՞ց այս իրավիճակին, արդյոք նախադեպը Հայկ Մարությա՞նից չէր, որն էլ սկսեց «սևերից ու սպիտակներից» խոսել: Դուք, որպես քաղաքական ուժ, դրան չնպաստեցի՞ք: Մարդիկ նեղանում են՝ Արամ Սարգսյան, Էդմոն Մարուքյան, Արարատ Զուրաբյան, Նաիրա Զոհրաբյան: Սրանք համախոհներ են եղել, ողջունել են հեղափոխությունը, հիմա, փաստորեն, ըստ ձեր բառաֆոնդի՝ դարձել են սև:

-Հեղափոխությանը ողջունել է հանրապետության 95 տոկոսը: Իհարկե, այսօր տարբեր մակարդակներում, նաև՝ քաղաքական բարձր էշելոններում մարդիկ են հանդես գալիս, տարբեր պահանջներ են ներկայացնում, որ ողջունել են հեղափոխությունը, և, հետևաբար, պետք է ինչ-որ բան ստանան: Բայց մեր պատասխանն այն է, որ դու արել ես քո համար, և եթե Արամ Սարգսյանը, Էդմոն Մարուքյանը, Արարատ Զուրաբյանը ողջունել են ու իրենց ավանդն են ներդրել հեղափոխության կայացմանը, ապա այսօր ունենք մի իրավիճակ, որ 90-ականներից ի վեր հիմա են Հայաստանում անցնում ամենաարդար, թափանցիկ ընտրությունները: Ինչ վերաբերում է որակումներին՝ սևի ու սպիտակի, ապա կոնկրետ ես գտնում եմ, որ այն ուժերը, որոնք Սերժ Սարգսյանի և Ռոբերտ Քոչարյանի շրջանակներից են, հարում են կամ մոտ են, ապա դրանք սևերն են: Իմ համար նրանք սևերն են: Նաև Էդմոն Մարուքյանն ասում է, որ ժողովրդին բաժանում են սևերի ու սպիտակների… չէ, ժողովրդին չեն բաժանում սևերի ու սպիտակների, քաղաքական գործիչներին են բաժանում սևերի ու սպիտակների, և ժողովրդին ասում՝ դուք ընտրեք՝ սևերի՞ն եք ընտրում, թե՞ սպիտակներին: Սա պամանական արտահայտություն է:

-Բայց ի՞նչ եղավ, սկզբում Նիկոլ Փաշինյանը կարծես համաձայն չէր Մարությանի հետ, ասում էր՝ ավելի վառ գույներ կան, սակայն հայտնի գաղտնալսումից հետո բարկանալով՝ մտքափոխվեց ու դիմելով Մարությանին՝ ասաց՝ դու մի բան գիտեիր:

-Ինքը որպես գաղափար է ասել: Ես, իհարկե, ներողություն եմ խնդրում, բայց հեղափոխության ամենաթեժ, դժվար պահին, երբ չգիտեինք՝ վաղն ինչ է լինելու, այս կողմ, թե այն կողմ, իրենք հակառակ քայլերն էին անում: Դե էդ չկողմնորոշվելու պահը շատ հստակ է, էլի:

-Ինչևէ, այս փուլից հետո «Ելք»-ի կուսակցությունների միջև ջրբաժան է սկսվում: Իհարկե, եթե վերջին 2 օրերի հայտարարությունները չեն տեղավորվում PR –ի ու հակափիառի մեջ: Դուք չե՞ք զգալու քաղաքական ուժերի, դեմքերի պակաս: Ու ինչպե՞ս եք այդ բացը լրացնելու:

-Կոնկրետ ես ոչ միայն հիմա, մեկ կամ երկու տարի առաջ էլ քաղաքակական ուժի պահանջ չէի զգում, որովհետև մեր թիմն ունի մարդկային այն պոտենցիալը, որ կա և՛ քանակի, և՛ որակի իմաստով: Եվ դա մեր թիմն է: Ի վերջո, պարտադիր չէ, որ բոլորը լինեն մեր քաղաքական թիմի անդամ, մեզ հետ եղել են մարդիկ, որոնք իրենց կյանքով ապացուցել են, որ կարող են կանգնել պետականության կողքը և մասնակից լինել այսօր տեղի ունեցող գործընթացներին: Այսիքն՝ քաղաքական թիմը կարող է լինել 100 հոգուց բաղկացած կամ 2, բայց իրենց շրջանակները, իրենց հայացքները կիսող հայրենակիցները լինեն շատ ավելի շատ: Հիմա Արամ Զավենի Սարգսյանը, որ էդպիսի բան է ասում, բայց չէ՞ որ եթե իրենք ինչ-որ չափով օժանդակել են մեր կուսակցությանն ու համախոհներին, մի քանի անգամ ավելի էֆեկտով ստացել են: