Հայկական մամուլի տեսություն 30.09.08

Ներկայացնում ենք այսօր լույս տեսած օրաթերթերի, պարբերականների առավել ուշագրավ ու հետաքրքիր հրապարակումները.

«168 ժամ»

Այսօր լույս տեսած բոլոր թերթերն էլ անդրադարձել են կիրակի օրը տեղի ունեցած ՏԻՄ ընտրություններին։ Ներկայացնում ենք այդ մասին «168 ժամի» դիտարկումը։

Ընտրությունները` «Central»-ում

«Կիրակի օրը Երևանի Կենտրոն համայնքում տեղի ունեցած թաղապետի ընտրությունները ևս մեկ անգամ ապացուցեցին, որ Հայաստանում ընտրական համակարգ, որպես այդպիսին, գոյություն չունի։ Ընտրություններում կիրառվեցին հայտնի գրեթե բոլոր անօրինականությունները` լցոնումներ, վստահված անձանց ահաբեկում, զինված խմբավորումներով հարձակումներ տեղամասերում, ընտրակաշառքի բաժանում, բաց և կրկնակի քվեարկություն և այլն։ Դրա արդյունքում, ԿԸՀ-ի հրապարակած տվյալների համաձայն, Կենտրոն համայնքում «վերընտրվել» է գործող թաղապետ Գագիկ Բեգլարյանը։ ԿԸՀ-ից ետ չեն մնացել նաև ընտրությունների արդյունքները դիտարկող Եվրոպայի խորհրդի Կոնգրեսի դիտորդները, որոնք երեկ հանդես են եկել գրեթե ոչինչ չասող բավական «քնքուշ» գնահատականով։ Սակայն դիտորդներին ևս կարելի է հասկանալ, դժվար է ընտրությունների մասին օբյեկտիվ գնահատական տալ` ընտրությունների ամենաթեժ ժամերին գտնվելով «Central» ռեստորան-սրճարանում։ Ի տարբերություն եվրոպացի դիտորդների, կիրակի օրն ընտրություններին լրջորեն հետևում էին ՀՀ-ում ԱՄՆ դեսպանատան ներկայացուցիչները, և բացառված չէ, որ առաջիկա օրերին նրանք հանդես գան գնահատականով»։

«Ազգ»

Ուշագրավ մարզական լուր «Ազգից»
Կարո Մուրադը` Եվրոպայի չեմպիոն
«Սեպտեմբերի 20-ին Գերմանիայի Բիլեֆելդ քաղաքում հայտնի դարձավ բռնցքամարտի գերմիջինքաշային կարգում Եվրոպայի չեմպիոնի նոր հայկական անուն։
1983-ի սեպտեմբերի 2-ին ծնված 1,79 սմ հասակ ունեցող Կարո Մուրադը իսպանացի Գաբրիել Կամպիլլոյի դեմ 12 ռաունդանոց պայքարում միավորներով հաղթանակ ձեռք բերեց ու մնաց անպարտելի։ Պրոֆեսիոնալ ռինգում Գերմանիայի քաղաքացիություն ունեցող Մուրադի դեբյուտը կայացել է 2006-ի սեպտեմբերի 23-ին, 18 մրցամարտից 11-ում հաղթանակ է տարել նոկաուտով։ Բռնցքամարտով զբաղվում է 13 տարեկանից։ Բնակվում է Բեռլինում և Քիթցինգենում։ Նա Զաուերլանդ ակումբից է, Ուլլի Վեգների սանն է։ Հարցազրույցներից մեկում խոստովանել է, որ Վեգներն իր համար այն մարզիչն է, ում կերազեր ունենալ։ Իսկ մեծ ոգևորություն նրան պատճառել է Վեգների մյուս սանի՝ իր հայրենակից Արթուր Աբրահամի՝ Վեցլարում Էդիսոն Միրանդայի դեմ կոտրված ծնոտով տարած հաղթանակը»։

«Առավոտ»

Մեծ արձագանք է ստացել լրագրող Արթուր Սահակյանի հետ օրեր առաջ կատարված իրադարձությունը։ «Առավոտը» կարողացել է այդ մասին ինֆորմացիա ստանալ անձամբ Արթուր Սահակյանից։

«Անդրանիկին սպանելով` սպանեցին ինձ», - ասում է ընդհատակում հայտնված լրագրող Արթուր Սահակյանը:

«Երեկ «Ռադիոլուրի» պատասխանատու Արթուր Սահակյանն «Առավոտին» փոխանցեց հետևյալը. «Սեպտեմբերի 20-ի ուշ երեկոյան տեղի է ունեցել վերջին ժամանակների ամենամեծ ոճրագործությունը։ Դաժան սպանություն։ Ոստիկանությունը մինչև հիմա թաքցրել էր, և ես բոլոր հիմքերն ունեմ ենթադրելու, որ ոստիկանությունը մեղսակից է այդ ոճրագործությանը։ Ի՞նչ է տեղի ունեցել. սպանել են մի մարդու, որը պատահականորեն այդ ժամին իմ մեքենայում էր։ Բոլոր հիմքերն ունեմ ենթադրելու, որ իրենք ուզեցել են սպանել ինձ։ Մեկ շաբաթ շարունակ Անդրանիկ Բաբայանը, որն այսօր մահացել է, գտնվել է անգիտակից վիճակում։ Դեպքը տեղի է ունեցել ոստիկանության Երևանի քաղաքային վարչության և Ռազմական ոստիկանության արանքում։ Ինքս «Օդնոկլասնիկ» սրճարանից փախուստի եմ դիմել, հասկանալով, որ եկել են ինձ սպանելու։ Դուրս եմ եկել, անմիջապես դիմել ոստիկանությանը, որը կից էր սրճարանին։ Որևէ մեկը չի արձագանքել։ Մեկ ժամ տևած ծեծկռտուքից հետո զենք են պահել մարդկանց վրա (մոտ 70-80 հոգի)։ Հետո պարզվեց, որ իմ մեքենային երկու կողմից խփել են, ջարդուփշուր արել, իջել են ու միանգամից հարձակվել իմ ընկերոջ` Անդրանիկ Բաբայանի վրա ու սպանել երկու երեխաների հորը։ Այդ արյունը իմ վրա է մնացել։ Իրականում նրանք սպանել են անմեղ մարդու` կարծելով ինձ են սպանում։ Ոստիկանությունն այնքան ժամանակ է թաքուն պահել հանցագործությունը, մինչև մահացել է Հանրապետական կուսակցության անդամ Անդրանիկ Բաբայանը։ Ես տվյալներ ունեմ, որ ոստիկանության որոշ աշխատակիցներ, որոնք ենթարկվում են Ալրաղացի Լյովի բանդայի անմիջական հրամաններին, սկսել են գործ սարքել իմ դեմ։ Իմ ամենամեծ մեղքն այն է, որ այդ օրը ես շփվել եմ բանդայի պոռնիկներից մեկի հետ»։
Ա.Սահակյանը տեղեկացրեց, որ դիմել է Մարդու իրավունքների պաշտպանին, դիվանագիտական ներկայացուցչություններին»։ «... իմ կարծիքով, եթե չձերբակալվեն «մսաղացի» Լյովիկը և նրա խումբը, հետևանքը կլինեն նոր հանցագործությունները։ Այսօր վտանգված է իմ ընկերների անվտանգությունը, իմ ընտանիքի անվտանգությունը, իմ աշխատակիցների անվտանգությունը»,- ասաց Ա. Սահակյանը»։

Голос Армении

О ЧЕМ "ЗАБЫЛ" МАМЕДЪЯРОВ

Министр иностранных дел Азербайджана страдает амнезией или занимается самообманом?
После выступления на Генассамблее ООН президента РА с особым интересом ожидалось выступление азербайджанского представителя – министра иностранных дел Эльмара Мамедъярова. Казалось, он попытается каким-то образом отреагировать на достаточно серьезные обвинения, которые содержались в речи Сержа Саргсяна.
Однако речь Мамедъярова с трибуны ООН выглядела общей, размытой и безадресной. Опорные клише азербайджанской риторики типа "вывод армянских войск с оккупированных территорий", "терцелостность" и т.д. присутствовали в ней как бы между прочим. Создавалось впечатление, что выступает представитель очень миролюбивого, совершенно безобидного и предрасположенного к сотрудничеству и добрососедским отношениям государства, приверженного нормам международного права и сохранению стабильности в регионе. Более того, министр попытался выступить в роли этакого "голубя мира" из страны, которая видит исключительно мирные пути урегулирования конфликтов и всеми силами стремится развивать экономическое сотрудничество в регионе. Словом, при чтении речи Мамедъярова – по крайней мере в том варианте, в каком оно приведено на азербайджанских новостных сайтах, у сведущего в региональных развитиях человека возникает ощущение, что либо этот человек абсолютно не в курсе основных направлений внешней политики государства, которое представляет, либо, что вероятнее, сознательно вводит мировое сообщество в заблуждение…

«Կապիտալ»
Բիզնես-օրաթերթը հետաքրքիր հարցազրույց է տպագրել ՀՀ Կառավարությանն առընթեր քաղաքացիական ավիացիայի գլխավոր վարչության պետ Արտյոմ Մովսեսյանի հետ։ Ներկայացնում ենք այն կրճատումներով.
«Հայաստանի կառավարության 2001թ. որոշմամբ` սեպտեմբերի 30-ը նշվում է որպես Քաղավիացիայի օր։ Հայաստանի քաղավիացիայի ներկա վիճակը « թռիչքների և ավիացիոն անվտանգության ապահովման« հեռանկարների և ավիացոն բնագավառի վերաբերյալ այլ հարցերի մասին «Կապիտալի» հետ խոսել է ՀՀ Կառավարությանն առընթեր քաղաքացիական ավիացիայի գլխավոր վարչության պետ Արտյոմ Մովսեսյանը։
- Բնակչության շրջանում ավիատոմսերի գնի հետ կապված դժգոհություններ կան։
- «Արմավիայի» հետ կնքած մեր պայմանագրում ամրագրված է« որ տոմսի արժեքը որևէ ուղղությամբ չպետք է գերազանցի այդ նույն ուղությամբ կատարվող այլ ընկերության կողմից սահմանված տոմսի արժեքը։ Ընկերությունների գնային քաղաքականությունը դեպի բարձրացում պայմանավորված է ոչ թե գերշահույթ ստանալու նպատակով« այլ նրանով, որ վերջին մի քանի տարում լուրջ թանկացել է ավիավառելիքի գինը։ Հայաստանում ավիավառելիքի գինը 1 տոննայի համար բարձրացել է մինչև 1700 դոլար« այն դեպքում, երբ 2004թ. 1 տոննայի գինը կազմում էր 400 դոլար։ Եթե ավիավառելիքի գինը նվազի« ապա տոմսերն էլ կէժանանան։
- Արտասահմանյան շատ ավիաընկերություններ արդեն կիրառում են էլեկտրոնային տոմսեր։ Մենք ե՞րբ կարող ենք խոսել այս ծառայության մասին։
- Այսօր մենք տեխնիկապես պատրաստ ենք էլեկտրոնային տոմսերի համակարգ ներդնելուն։ Արդեն գնում ենք դեպի զարգացման երկրորդ փուլ. ներդրվում է նոր համակարգ« որի միջոցով կկատարվի այդ գործընթացը։ Այդ համակարգով հնարավոր է ոչ միայն ձեռք բերել էլեկտրոնային տոմսեր« այլ նաև հաշվառել բեռի քաշը։ Նախատեսված է« որ այս համակարգը կներդրվի մինչև 2009թ. հունվարի 1-ը։ Այսօր արդեն «Էյր Ֆրանսը» և «Չեխական ավիաուղիները» աշխատում են էլեկտրոնային տոմսերով»։

«Հայկական ժամանակ»

Երկու տեղեկություն «ՀԺ»-ից.

Հերթական լապշաների ժամանակը

«Սրասբուրգում գտնվող ԵԽԽՎ ՀՀ պատվիրակությանն այսօր ծանր օր է սպասում։ Բանն այն է, որ այսօր սպասվող ԵԽԽՎ մոնիտորինգի հանձնաժողովի նիստում պետք է քննարկվի ԵԽԽՎ 1609 և 1620 բանաձևերի պահանջների կատարման ընթացքը։ Բացի այս, մեր պատվիրակությունը պետք է բացատրի, թե ինչու է փոփոխության ենթարկվել «Հեռուստատեսության և ռադիոյի մասին» ՀՀ օրենքը, որով, չնայած ԵԽԽՎ բանաձևերի պահանջներին, «Ա1+» հեռուստաընկերությունը զրկվում է կապուղիների մրցույթներին մասնակցելու և հետևաբար նաև եթեր վերադառնալու հնարավորությունից։ Այսօր, փաստորեն, ԵԽԽՎ ՀՀ պատվիրակության ղեկավար Դավիթ Հարությունյանը պստք է ներդնի մարդկանց ականջներին լապշա կախելու իր ողջ ունակությունները։ Բայց անկախ այն բանից, թե որքանով դա կհաջողվի պարոն Հարությունյանին, ըստ ԵԽԽՎ մեր աղբյուրների, ԵԽԽՎ բանաձևերը չկատարելու պատճառով մեր պատվիրակության դեմ պատժամիջոցներ կիրառելու հարցը հունվարին, այնուամենայնիվ, կմտնի ԵԽԽՎ ձմեռային նստաշրջանի օրակարգ»։

Նոր կալանավոր

«ՀՀ գլխավոր դատախազության երեկ տարածած հաղորդագրության համաձայն, մարտի 1-ի գործով նոր ձերբակալություն է տեղի ունեցել։ Ըստ այդմ, ՀՀ ազգային անվտանգության ծառայության աշխատակիցները ձերբակալել են ԱԱԾ նախկին աշխատակից Հարություն Ղարիբյանին։ Նրան մեղադրանք է առաջադրվել ՀՀ Քրեական օրենսգրքի 225 հոդվածի 2-րդ մասով` «Զանգվածային անկարգություններ»։ Ի դեպ, մինչև սեպտեմբերի 5-ը պաշտոնապես մարտի 1-ի գործով 4 հետախուզվողի անուն էր ներկայացվում` ԱԺ պատգամավոր Խաչատուր Սուքիասյան, «Հայկական ժամանակ» օրաթերթի գլխավոր խմբագիր Նիկոլ Փաշինյան, Լևոն Տեր-Պետրոսյանի Լոռու մարզի նախընտրական շտաբի անդամ Համլետ Հովհաննիսյան և Վիրաբ Մանուկյան։ Սակայն երեկվա հաղորդագրության մեջ նշված է, որ ներկայումս հետախուզվողներն արդեն 5-ն են, բայց հինգերորդի անունը չի հրապարակվում»։

«Հայոց աշխարհ»

Լուր «Հայոց աշխարհից»։

Նախկին նախարարին փոխարինեց գործող նախարարը

«Երեկ հրավիրված գլխավոր համաժողովում Համահայկական խաղերի համաշխարհային կոմիտեն ունեցավ նոր ղեկավարություն։ Կազմակերպությունը երեք տարի գլխավորելուց հետո նախկին արտգործնախարար Վարդան Օսկանյանը հրաժարական տվեց նախագահի պաշտոնից։ Ընտրվեց մինչ այդ ՀԽՀԿ գլխավոր քարտուղար, նաև սպորտի և երիտասարդության հարցերի նախարար Արմեն Գրիգորյանը»։

«Հրապարակ»

Հետաքրքիր նորություն է տպագրել «Հրապարակը»։

«ԽՄ վերջին նախագահ Մ. Գորբաչովը մտադիր է վերադառնալ Ռուսաստանի ակտիվ քաղաքականություն։ Նա ռուս մեծահարուստ Ալեքսանդր Լեբեդևի հետ ստեղծում է «Ռուսաստանի անկախ դեմոկրատական կուսակցությունը», որով կմասնակցի 2011թ. խորհրդարանական ընտրություններին։ Նա նախորդ տարի ընտրվել է ՌԴ «Սոցիալ-դեմոկրատների միություն» շարժման ղեկավար, որի հիմնադիր համագումարում ընդունվեց այդպիսի հայտարարություն. «Երկրում բացակայում է իսկական և գործող ընդդիմություն»։ Շատ մոտ է Հայ ազգային կոնգրեսի ստեղծման նախապատմությանը»։

«Չորրորդ իշխանություն»

«ԲՀԿ-ն Իշխան Զաքարյանի համար քաղաքական պատասխանատվություն չի կրել ու չի կրում», -ասում է Գագիկ Ծառուկյանը։

«Երեկ «Բարգավաճ Հայաստան» կուսակցության նախագահ Գագիկ Ծառուկյանը եկել էր խորհրդարան` ընտրելու իր ընկեր Հովիրկ Աբրահամյանին։ Նա մինչ այդ պատասխանեց լրագրողների հարցերին.
- Ճի՞շտ են տեղեկություններն այն մասին, որ Դուք պատրաստվում եք առաջադրվել Երևանի քաղաքապետ։
- Երևանի քաղաքապետ ես չեմ պատրաստվում առաջադրվել։ Դա իմ համար շատ փոքր բան է։
- Վերահսկիչ պալատի նախագահի եզրակացությունները վերաբերում էին նաև ձեր կուսակցական նախարար Վարդան Վարդանյանի գործունեությանը, որի ընթացում չարաշահումներ են կատարվել։ Հնարավո՞ր է` փոխեք նախարարին։
- Եթե դա ապացուցվի, իմացեք, որ նախարարը հաստատ կփոխվի։ Մենք եկել ենք աշխատելու, այլ ոչ թալանելու։ Վարդան Վարդանյանը 5 ամիս է աշխատել։ Ու եթե այսօր մարդիկ իրենց անձնական խնդիրները վերածում են քաղաքականության ու առաջին հերթին ստուգում է հենց իր կուսակցությունը, ով իրեն առաջարկել է, ով իր կողքին է կանգնել, այսօր այդպիսի մոտեցում է ցուցաբերում, բոլորն էլ հասկանում են, որ դա անձնական է։ ԲՀԿ-ն Իշխան Զաքարյանի համար ոչ մի քաղաքական պատասխանատվություն չի կրում, չի էլ կրելու։ Այսօր Վարդան Վարդանյանի մոտ ստուգում է նախագահի վերահսկողության ծառայությունը։ Եթե որևիցե մեկը սրտացավ է, գնացեք Իշխան Զաքարյանին ասեք` տվեք ակտը, որովհետև Ծառուկյանը հայտարարել է, որ եղել է ծավալների խախտում, որ դեռ շինարարությունը ավարտված չէ, վճարված է, կատարված է ավել աշխատանք։ Այսօրվա կարգավիճակով նոր ստուգում է կատարվում։
- Այսինքն` անձնական խնդի՞ր է լուծում Իշխան Զաքարյանը։
- Դուք կարող եք մեր կուսակցության անդամներին հարցնել։ Նրա բաջանաղը, որ մի տարի գործի չի գնացել, Վարդան Վարդանյանը ասել է, որ ինքը պիտի գործից դուրս գա, ոչ թե վարչության պետ լինի, բայց հիմա վերահսկիչ պալատում է վարչության պետ ու ինքն էլ ստուգումները կատարել է։
- ՎՊ նախագահի պաշտոնում Դուք եք երաշխավորել Իշխան Զաքարյանին։
- Եթե մարդը թույլ է լինում ու ամեն ինչ վեր է ածում անձնականի... պապենական ասացվածք կա. ասում են` պաշտոնը տուր, նոր մարդու դեմքը կճանաչես…»։

«Փակագիծ»

Երեկ Ազգային ժողովը նոր նախագահ ունեցավ։ Հովիկ Աբրահամյանը դարձավ Հայաստանի ԱԺ 7-րդ նախագահը։ Այս մասին է «Փակագծի» անդրադարձը։

ԱԺ նախագահի առաջին սուտը

«Ազգի վերջին ընտրյալներից մեկը` Հովիկ Աբրահամյանը, դեռ չէր ընտրվել ԱԺ-ի նախագահ, երբ քվեարկությունից րոպեներ առաջ հայտնվեց լրագրողների «ուռկանում»։ Բանակցությունների արդյունքում ԶԼՄ-ների ներկայացուցիչները, խոստմանը համաձայն, անջատեցին իրենց ձայնագրիչներն ու, ոչ մի հարց չուղղելով, տնավարի զրույցի բռնվեցին։ Ի նշան հարգանքի, Հովիկ Աբրահամյանն էլ իր հերթին խոստացավ քվեարկությունից հետո, ժամը 16-ն անց 30-ին պատասխանել լրագրողների հարցերին։ Բայց իր ընտրած պահին նա աննկատ դուրս եկավ նիստերի դահլիճից և այլևս... մամուլի ասուլիսը հօդս ցնդեց։ Սա նրա պաշտոնավարության առաջին պահի առաջին խաբսն էր։ Ի միջի այլոց, դրանից առաջ Հովիկ Աբրահամյանը հանդիսավոր պայմաններում ավելի մեծ սխալ էր թույլ տվել. լրագրողների և մի քանի պատգամավորների շրջանում նա խոստացավ իր ձայնը տալ ԱԺ-ի նախագահի մյուս թեկնածուին` Լարիսա Ալավերդյանին ու դրժեց խոստումը։ Ժառանգության ներկայացուցչի օգտին քվեարկել էին միայն նրա 5 կուսակիցները։ Կուլիսների ետևում շրջանառվողը մի տեսակետ էր. «Հովիկ Աբրահամյանի առաջին սուտը կամ հումորը տղամարդկային չէր»»։