Բնապահպանության նախարարին մտահոգո՞ւմ է թունաքիմիկատների գերեզմանոցը

14:05 • 04.05.10

ՀՀ բնապահպանության նախարարության կենսառեսուրսների կառավարման գործակալության բնության հատուկ պահպանվող տարածքների կառավարման բաժնի պետ Արամ Աղասյանն այսօր լրագրողների հետ հանդիպմանը, պատասխանելով Նուբարաշենի թունաքիմիկատների գերեզմանոցի վերաբերյալ հարցին, վստահեցրեց, որ խնդիրը գտնվում է բնապահպանության նախարարի ուշադրության կենտրոնում: «Իրավիճակը նախարարին մտահոգում է, նա տեղյակ է և զբաղվում է այդ խնդրով»,- ասաց Աղասյանը: Նշենք, որ նախօրեին Թեղուտի պաշտպանության խմբի անդամ Մարիամ Սուխուդյանն ու լրագրող Էդիկ Բաղդասարյանն այս առնչությամբ անգործության մեջ էին մեղադրել բնապահպանության նախարարին` նշելով, որ պատրաստվում են պահանջել նրա հրաժարականը:

Հանուն մարդկային կայուն զարգացման ասոցիացիայի նախագահ Կարինե Դանիելյանը ահազանգեց, որ թունաքիմիկատների գերեզմանոցը լրջորեն կարող է վնասել շրջակա միջավայրը, աղտոտվում են մակերեսային և ստորգետնյա ջրերը:

Ասուլիսին ներկա բնապահպանները ծիծաղեցին՝ լսելով Արտակարգ իրավիճակների նախարարության այն պատճառաբանությունը, թե գերեզմանոցը գանձեր որոնելու նպատակով են քանդել:

«Ալավերդիի մկնդեղի գերեզմանոցն էլ էին քանդել, որոշ մարդիկ լուրեր էին տարածել, թե ոսկի կար»,- ասաց Դանիելյանը:

Ըստ նրա` Հայաստանում թունաքիմիկատների մի քանի լքված գերեզմանոցներ կան, որոնցով ոչ մի գերատեսչություն չի զբաղվում: «Աշխատանքի թերացման արդյունք է սա, համակարգային խնդիր կա, տարբեր գերատեսչություններ միմյանց հետ չեն համագործակցում»,- ասաց բնապահպանը: