Երիտասարդ աստղագետները կհավաքվեն Բյուրականում
Երիտասարդ աստղաֆիզիկոսների 3–րդ միջազգային դպրոցն այս տարի կանցկացվի Բյուրականում սեպտեմբերի 12–ից հոկտեմբերի 2–ը։ Այս մասին լրագրողներին տեղեկացրեց Բյուրականի աստղադիտարանի տնօրեն Հայկ Հարությունյանը։
«Այս տարի դպրոցը թերևս իր մասնակիցների թվով և աշխարհագրությամբ ամենահարուստն է»,– ասաց նա՝ նշելով, որ այս տարի դպրոցը կտևի երեք շաբաթ նախկին 10–12 օրվա փոխարեն։
Բացի դրանից, այս տարի արձանագրվել է դիմումների աննախադեպ քանակ։ Սակայն աստղադիտարանը կարող է ընդունել 30 հոգու, որոնք արդեն ընտրվել են։
Տնօրենը տեղեկացրեց, որ մասնակիցների թվում են աստղաֆիզիկոսներ Իրանից, Թուրքիայից, Ռուսաստանից և Ուկրաինայից։ Իսկ դասախոսություններով և զեկույցներով հանդես կգան դասախոսներ Գերմանիայից, Իտալիայից, ԱՄՆ–ից, հյուրերի շարքում է նաև Միջազգային աստղադիտական միության նախագահը։
Ինչ վերաբերում է հարցի ֆինանսական կողմին, աջակցության հարցով աստղադիտարան արդեն դիմել է Գիտության պետական կոմիտեին և Գիտության ազգային ակադեմիային։ «Ամբողջ աշխարհում նմանատիպ միջոցառումները ֆինանսավորվում են նաև մասնավոր հատվածի կողմից» – ասաց տնօրենը՝ հորդորելով հայ ձեռներեցներին աստղագիտությանը ցուցաբերել օժանդակություն։
Հիշեցնենք, որ Երիտասարդ աստղաֆիզիկոսների միջազգային դպրոցը անցկացվում է երկու տարի մեկ անգամ՝ Միջազգային աստղադիտական միության հետ համատեղ։










