Հոլոքստի թանգարաններ կան աշխարհի բոլոր խոշոր քաղաքներում, Հայոց ցեղասպանության թանգարան՝ միայն Երևանում

Այսօր միջազգային քաղաքականության մշակման մեջ կարևոր դեր են կատարում թանգարանները։ Այս մասին Հայոց ցեղասպանության թանգարան–ինստիտուտի տնօրեն Հայկ Դեմոյանն ասաց Հայաստանի ԳԱԱ-ում այսօր մեկնարկած «Մեծ եղեռնի-Հայոց ցեղասպանության 100-ամյակի տարելից. Արդարության հաստատման սահմանագիծ» համաժողովում։

«Այսօր թանգարանային բում կա աշխարհում, որովհետև թանգարանային ցուցադրությունները՝ լինեն դրանք մշտական թե շարժական, կարևոր դերակատարություն ունեն քաղաքականություն մշակելու և այն առաջ տանելու առումով»,– ասաց նա։

Դեմոյանը բերեց Հոլոքոստի օրինակը. աշխարհի բոլոր խոշորագույն քաղաքներում կան Հոլոքոստի թանգարաներ կամ հիշողության վայրեր։ Այդ թանգարաններն աշխատում են համագործակցաբար և լուծում են իրենց առջև դրված կոնկրետ խնդիրները։

«Ի՞նչ ունենք մենք։ Այսօր՝ 95 տարի անց, մենք դեռ ունենք միակ թանգարանը։ Երկրորդ թանգարանի ճակատագիրը գաղտնիք չէ։ Բոլորս տեղյակ ենք՝ ինչ է տեղի ունենում»,– ասաց նա։

Հիշեեցնենք, որ Վաշինգտոնում Հայոց ցեղասպանության Ամերիկայի թանգարանն այդպես էլ չբացվեց հայ համայնքի ներսում առաջացած տարաձայնությունների պատճառով։

Ըստ Դեմոյանի, այս հարցը վաղուց պետք է լուծված լիներ։