Զեմֆիրան Ռուսաստանը ժողովրդավարական երկիր չի համարում

Ռուսաստանյան ռոք աստղ Զեմֆիրան Ռուսաստանը ժողովրդավարական երկիր չի համարում։ Միևնույն ժամանակ, նա խոստովանել է, որ պատրաստ չէ աջակցել ընդդիմադիրներին, քանի որ ոչինչ չգիտի նրանց գործունեության մասին։ Այս մասին նա ասել է երեկ կայացած ասուլիսի ժամանակ՝ պատասխանելով այն հարցին, թե արդյո՞ք ինքը Ռուսաստանը համարում է ժողովրդավարական երկիր, ինչի մասին այդքան սիրում է խոսել ռուս վարչապետ Վլադիմիր Պուտինը։

«Ոչ, ես չեմ կարծում, որ Ռուսաստանը ժողովրդավարական երկիր է,- ասել է նա։- Ինչո՞ւ։ Որովհետև մեզ մոտ բազմաթիվ խնդիրներ կան, կաշառակերություն։ Մինչև գրպանը փող չխցկես, չեն թողնի՝ մեքենադ կայանես, չեն թողնի՝ մտնես հիվանդանոց... Ինչպե՞ս թե ինչու։ Որովհետև շատ բաներ, որոնք պետք է բնորոշեն ժողովրդավարական հասարակությանը, այս երկրում չեմ տեսնում»,- ասել է Զեմֆիրան։
Խոսելով ընդդիմության մասին՝ նա ասել է, որ ինքը հեղափոխական չէ և չի սիրում զանգվածային կուտակումներ։ Երգչուհին նաև նշել է, որ ինքը իր դիրքորոշումն արտահայտում է համերգների ժամանակ, ալբոմներում, և որ ինքն այն մարդկանցից է, որ բարիկադների վրա բարձրանալ չեն սիրում։