Փարաջանովի մասին ֆիլմը կնկարահանվի «փարաջանովյան» բոլոր քաղաքներում, բացի Բաքվից

Централ партнершип կինոընկերությունը շուտով կսկսի աշխատել Սերգեյ Փարաջանովի մասին պատմող ֆիլմի վրա։

Հիշեցնենք, որ մեծ ռեժիսորի մասին ավելի քան երկու տասնյակ ֆիլմ է նկարահանվել, բայց սա կլինի առաջին խաղարկային ֆիլմը. Փարաջանովի դերակատարը լինելու է մոսկվացի հայտնի դերասան Սերգեյ Ղազարովը, որն, ի դեպ, շատ նման իր հերոսին։ Այս մասին հայտնում է Analitika.at.ua–ը։

Նախագծի նախաձեռնողը ԱՊՀ հումանիտար համագործակցության ֆոնդն է, ֆիլմի բյուջեն 3 մլն եվրո է։ Ֆիլմը նկարահանելու է Աննա Մելիքյանը՝ Իրակլի Կվիրիկաձեի սցենարի հիման վրա, բեմադրող–նկարիչը Ռուստամ Խամդամովն է, որի ստեղծագործական ուղին շատ բարձր է գնահատել հենց ինքը՝ Փարաջանովը։

Ֆիլմը նկարահանվելու է «փարաջանովյան քաղաքներ» համարվող Կիևում, Թբիլիսիում, Մոսկվայում, Երևանում։ Բացի «խորհրդային կինոհրապակներից» նկարահանումներ կլինեն նաև Փարիզում, Ռոտերդամում, նույնիսկ Վենետիկում։

Նշենք, որ «փարաջանովյան քաղաքների» շարքում չկա Բաքուն, չնայած Փարաջանովը 1987–1988թթ. այնտեղ է նկարահանել լերմոնտովյան մոտիվներով իր «Աշուղ Ղարիբ» ֆիլմը։ Թեև ֆիլմը նկարահանում էր Грузия-фильм ստուդիան, հայտնի է, որ ռեժիսորի համար շուտով անհարմարավետ է դառնում Բաքվում աշխատելը, և նա լքում է այդ քաղաքը։

Նոր ֆիլմի նկարահանման հրապարակների ցանկից դուրս մնալու լուրը տեղեկությունը վշտացրել է Բաքվին։ Зеркало–ում ոմն Շիրին Մանաֆովը գրել է, որ «Աշուղ Ղարիբ»–ի ստեղծման պատճառը 1987թ. դեպքն է եղել, երբ Փարաջանովը Երևան էր հրավիրվել «Մխիթար Սպարապետ» ֆիլմի պրեմիերային։

Փարաջանովին իբր դուր չի եկել ֆիլմը, նա այն անվանել է «ազգային խայտառակություն», ինչի պատճառով դարձել է պաշտոնական Երևանի թշնամին։ Իսկ արդեն 88թ., երբ Հայաստանում իմացել են Բաքվում ֆիմի նկարահանումների մասին, դատապարտել են Փարաջանովին, ցույցերի ժամանակ այրել նրա նկարները։

Ինչևէ, մաեստրո Փարաջանովի մասին ֆիլմը Բաքվում չի նկարահանվի։