Համազգայինում կբացվի քանդակագործ Դավիթ Մինասյանի ցուցահանդեսը

Նոյեմբերի 8–ին Համազգային պետական թատրոնի ճեմասրահում կբացվի հայտնի քանդակագործ Դավիթ Մինասյանի աշխատանքների ցուցահանդեսը։ Այս մասին այսօր լրագրողներին տեղեկացրեց թատրոնի ղեկավար Վարդան Մկրտչյանը։

«Իտալական կադրեր» ցուցահանդեսը սկիզբ կդնի նոյեմբերի 8–13-ը Երևանում նախատեսվող իտալական ժամանակակից ֆիլմերի շաբաթվա բացմանը։

Հայաստանում Իտալիայի դեսպան Բրունո Սկապինին նշեց, որ շատ հաճելի է տեսնել քանդակների և ֆիլմերի համադրությունը։

Միաժամանակ նա հավելեց, որ Մինասյանի քանդակները իտալական շունչ ունեն։

«Այսպիսով, սա լավ առիթ է ավելի ամբողջական ներկայացնելու Իտալիայի պատկերը։ Դավիթի աշխատանքներում իտալական մշակույթը յուրովի է մեկնաբանվում»,– նշեց նա։

Քանդակների հեղինակն իր հերթին հավելեց, որ այս մտահաղացումը վաղուց սպասում էր իրականացման։ «Հուսով եմ, որ այս պրոյեկտը շարունակական է լինելու, քանի որ իտալական մշակույթն անսպառ է»,– ասաց նա։