Գրողների միությունը փաստերն աղավաղող լրագրողների համար սահմանում է «Կեղանք» մրցանակ

Առաջին անգամ Հայաստանում կսահմանվի «Կեղանք» մրցանակ այն լրատվամիջոցների և լրագրողների համար, որոնք իրենց հրապարակած նյութերում աղավաղել են փաստերը: Այս մասին այսօրվա ասուլիսի ժամանակ ասաց Հայաստանի գրողների միության նախագահ Լևոն Անանյանը:
Հաղթողներին կշնորհվեն դիպլոմներ և 1937թ. 3-ռուբլիանոցների պատճեններ:

«Այսօր մամուլի ծառը գլխիվայր է աճում: Այն, ինչ կատարվում է էջերի վրա, դա մղձավանջ է»,- ասաց նա:

Անանյանի խոսքով` հասարակության մի մասը պահպանում է երկիրը, զարգացնում այն, իսկ մյուս մասն անում է ամեն ինչ, որպեսզի երկիրը չկայանա:

«Այս իրավիճակում մարդը մնում է անպաշտպան: Տեղի է ունենում հասարակության ներքին պատերազմ»,- նշեց նա:

Խոսելով մրցանակի մասին` Անանյանը նշեց, որ այն կապում են «37թ. խայտառակ մատնագրերի հետ»:

«Այստեղ իրենց խիղճը երեք ռուբլով վաճառելու խնդիրն է: Շատ ավելի գերադասելի և բարոյական է կրկեսի մոտ մարմինը վաճառել երեք ռուբլով, քան խիղճը վաճառել դրամով, ուզում է՝ լինի երեք ռուբլի, թե երեք մլն եվրո», - ասաց Անանյանը:

Միության նախագահը տեղեկացրեց, որ մրցույթը կամփոփվի այս տարվա դեկտեմբերին:

Նկարիչների միության նախագահ Կարեն Աղամյանն ասաց, որ Նկարիչների միությունը ևս կմիանա այս նախաձեռնությանը:

«Մրցույթը կանցկացվի տարբեր նոմինացիաներով` տպագիր մամուլ, հեռուստատեսություն, ռադիո և այլն»,- ասաց նա:

Բացի այդ, 7 միություններ պատրաստվում են ստեղծել Ստեղծագործական միությունների ղեկավարների խորհուրդ: