Կիմ Երիցյանի հոգեհանգիստը տեղի կունենա դեկտեմբերի 28-ին

ՀՀ ժողովրդական արտիստ Կիմ Երիցյանի հուղարկավորման առթիվ ստեղծված պետական հանձնաժողովը տեղեկացնում է, որ արտիստի հոգեհանգիստը տեղի կունենա դեկտեմբերի 28-ին՝ ժամը 18:00-ին, Վարդանանց 2-րդ նրբանցքի 4-րդ շենքի բնակարան 6 հասցեում։ Վերջին հրաժեշտի արարողությունը` դեկտեմբերի 29-ին՝ ժամը 12:00-14:00-ը` Երևանի Կոմիտասի անվան կամերային երաժշտության տանը: Հուղարկավորությունը տեղի կունենա Երևանի քաղաքային պանթեոնում: Այս մասին տեղեկացնում է ՀՀ մշակույթի նախարարությունը։

Նշենք, որ Կիմ Երիցյանը ծնվել է 1930 թ. Թբիլիսիում և 1951 թ.-ից ապրել է Երևանում:

1957 թ. գերազանց դիպլոմով ավարտել է Երևանի Գեղարվեստաթատերական ինստիտուտի դերասանական բաժինը։

1955-1973 թթ. որպես դերասան աշխատել է Հ. Պարոնյանի անվան երաժշտական կոմեդիայի թատրոնում՝ ապրելով ստեղծագործական մեծ առաջընթաց, անձնավորելով բազմաթիվ ուշագրավ և գլխավոր դերեր: Այս թատրոնում տաղանդավոր արտիստին համընդհանուր ճանաչում է բերել Պըլը Պուղու դերը Ա. Բարսեղյանի «Պըլը Պուղի» հերոսական կատակերգությունում, որը Կիմ Երիցյանը խաղացել է 350-ից ավելի անգամ՝ լեփ-լեցուն դահլիճներում։

1973-2006 թթ. աշխատել է Հ. Ղափլանյանի անվան դրամատիկական թատրոնում, որտեղ էլ ավելի է բացահայտվել Կիմ Երիցյանի ինքնատիպ տաղանդը: Նրա խաղաոճին բնորոշ է ողբերգականի և կատակերգականի միասնությունը: Երիցյանը տպավորիչ գունեղությամբ կերտել է բազմաթիվ կերպարներ հայ և համաշխարհային կերպարներից, որոնք դերասանական արվեստի ակնառու նվաճումներ են. Ագրիպաս աղա, Գնդապետ, Թովմաս, Սերգեյ Կարպիչ, Մաշու, Ալդոմիրցի և այլն:
Կիմ Երիցյանը նկարահանվել է հայկական կինեմատոգրաֆիայի բազմաթիվ ֆիլմերում` «Նվագախմբի տղաները», «Շրթներկ N 4», «Սուտլիկ որսկանը», «Քաոս», «Հող և ոսկի» և այլն։ Կիմ Երիցյանը բազմաթիվ դերեր է խաղացել նաև հեռուստաթատրոնում:

Իր ստեղծագործական կյանքի ընթացքում նա մարմնավորել է ավելի քան 100 դեր, արժանացել հանդիսատեսի ջերմ վերաբերմունքին և անկեղծ համակրանքին:

Հայ թատրոնին մատուցած ակնառու ծառայությունների համար Կիմ Երիցյանին 2009թ. շնորհվել է ՀՀ ժողովրդական արտիստի բարձր կոչում։ Վերջերս մեծ շուքով նշվել էր սիրված արտիստի ծննդյան 80-ամյա հոբելյանը, հոբելյարը պարգևատրվել էր ՀՀ մշակույթի նախարարության ոսկե մեդալով։