Իրանում արգելվել է Կոելյոյի գրքերի հրատարակությունը

Աշխարհի ամենահայտնի գրողներից մեկը՝ բրազիլացի Պաուլո Կոելյոն, իր ցանցային օրագրում հայտարարել է, թե Իրանի իշխանություններն արգելել են իր գրքերի հրատարակումը Իրանում։

Կոելյոն ասել է, թե ինքը դա իմացել է Արաշ Հեջազիի՝ Caravan Books հրատարակչության տնօրենի նամակից. Հեջազիին իրավունք է վերապաված հրատարակել հայտնի արձակագրի գրքերն Իրանում։

«Ցավոք, ինձ տեղեկացրել են, որ Իրանի մշակույթի և իսլամական կենսակերպի նախարարությունը արգելել է Ձեր բոլոր գրքերը... Իմ ընկերներին ասել են, որ այսուհետև Իրանում կարգելվեն Կոելյոյի բոլոր գրքերը»,– իր բլոգում Կոելյոն մեջբերում է Հեջազիի նամակը։
Կոելյոն նշում է, որ իր գրքերը Իրանում հրատարակվում են 1998թ.–ից, դրանց ընդհանուր տպաքանակը երկրում գերազանցում է 6 միլիոնը։

«Ես հույս ունեմ, որ այս թյուրիմացությունը կլուծվի առաջիկա շաբաթվա ընթացքում։ Եվ ես հույս ունեմ, որ Բրազիլիայի կառավաորւթյունն ինձ կաջակցի»,–գրել է նա։

Հեջազին իր նամակում խորհուրդ է տվել Կոելյոյին պարսկերեն թարգմանված իր ստեղծագործությունները տեղադրել համացանցում, բայց միաժամանակ խոստովանել է, որ այդ նախագիծը շահութաբեր չի լինի, քանի որ Իրանում համացանցով առևտուրը տարածված չէ։