Մինասի երկու որմնանկարներ անժամկետ ու անհատույց իրավունքով կտրամադրվեն «Զվարթնոցին»

Կառավարության այսօրվա նիստում հաստատվեց «Մինաս Ավետիսյան» մշակութային բարեգործական հիմնադրամի, «Արմենիա» միջազգային օդանավակայաններ» փակ բաժնետիրական ընկերության միջոցներով Գյումրի քաղաքի «Էլեկտրատեխնիկական գործարան» փակ բաժնետիրական ընկերության նախկին ճաշարանի և «Գալվանոմետր գործարան (Օմեգա)» փակ բաժնետիրական ընկերության շենքերում գտնվող որմնանկարների տեղափոխման և վերականգնման մասին որոշումը:

Ինչպես կառավարության նիստում տեղեկացրեց մշակույթի նախարար Հասմիկ Պողոսյանը, դա վարչապետի հանձարարությունն է, որի նպատակը Մինաս Ավետիսյանի որմնանկարները ոչնչացումից փրկելն է:

Նախարարի խոսքով` որոշման համաձայն` անժամկետ ու անհատույց իրավունքով «Արմենիա» միջազգային օդանավակայաններ» ընկերությանը կտրամադրվի Մինաս Ավետիսյանի որմնանկարներից երկուսը, այն պայմանով, որ դրանք համապատասխան պայմաններով տեղափոխվեն, վերականգնվեն, պահպանվեն և փակցվեն օդանավակայանում:

«Այսինքն` սեփականության իրավունքը մնո՞ւմ է պետությանը»,- ճշտեց վարչապետը: «Անպայման»,- արձագանքեց նախարարը:

«Այսուհետև օդանավակայանում մեր բոլոր քաղաքացիները կարող են վայելել Մինասի այս հիասքանչ որմնանկարները: Մեծ դիմադրություն կա, ասում են` ոնց կարելի է մասնավորին տալ: Բա ավելի լավ ա փչանա՞ն այդ որմնանկարները»,- նշեց Տիգրան Սարգսյանը:

Հասմիկ Պողոսյանը տեղեկացրեց, որ որմնանկարներից մեկը կփակցվի պատվավոր հյուրերի, մյուսը` ընդհանուր սրահում: